തിരുവനന്തപുരം: ആറ് ദിവസം പ്രായമുള്ള കുഞ്ഞിന് ഷഹ്ല ഷെറിന് എന്ന് പേരിട്ടു. തിരുവനന്തപുരം ശിശുക്ഷേമ സമിതിയുടെ അമ്മത്തൊട്ടിലില് നിന്നും കിട്ടിയ കുഞ്ഞിനാണ് അധികൃതര് ഷഹ്ല ഷെറിന് എന്ന് പേരിട്ടത്. സുല്ത്താന്ബത്തേരി സര്വ്വജന ഹയര് സെക്കന്ററി സ്കൂളിലെ ക്ലാസ് മുറിയില് നിന്നും പാമ്പു കടിയേറ്റു മരിച്ച ഷഹ്ല ഷെറിന്റെ ഓര്മ്മയ്ക്കായാണ് കുഞ്ഞിന് ഇതേ പേരിട്ടത്.
ആറു ദിവസം മാത്രം പ്രായമുള്ള കുഞ്ഞിന് മൂന്ന് കിലോ ഭാരമുണ്ട്. കഴിഞ്ഞ ഫെബ്രുവരിയില് ശിശുക്ഷേമ സമിതിയുടെ തിരുവനന്തപുരം ആസ്ഥാനത്ത് ആരംഭിച്ച അമ്മത്തൊട്ടിലില് ലഭിക്കുന്ന പതിനാലാമത്തെ കുഞ്ഞാണ് ഷഹ്ല.
നവംബര് 20 നാണ് ഷഹ്ല ഷെറിന് ക്ലാസ് മുറിയില് വെച്ച് പാമ്പു കടിയേറ്റ് മരിച്ചത്. ക്ലാസ് നടക്കുന്നതിനിടെ കുട്ടിയുടെ കാല് ഭിത്തിയോട് ചേര്ന്ന പൊത്തില്പ്പെട്ട് മുറിവു പറ്റുകയായിരുന്നു. വിദ്യാര്ഥിനിയുടെ കാല് പരിശോധിച്ചപ്പോള് പാമ്പ് കടിയേറ്റതു പോലുള്ള പാടുകള് കണ്ടു. വിവരം അറിയിച്ചതിനെ തുടര്ന്ന് പിതാവ് എത്തി ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
