നെടുമ്പാശ്ശേരി: കഴിഞ്ഞ തവണ മുടങ്ങിപ്പോയ ശബരിമല ദര്ശനം ഇത്തവണ സാധ്യമാക്കാന് തൃപ്തിദേശായിയും സംഘവും കേരളത്തില്. ശബരിമല പ്രവേശനം ലക്ഷ്യമിട്ട് ഇന്ന് പുലര്ച്ചെ നാലു മണിയോടെ നെടുമ്പാശ്ശേരിയില് വിമാനമിറങ്ങിയ തൃപ്തിദേശായി നേതൃത്വം നല്കുന്ന ആറംഗ സംഘം ശബരിമല ദര്ശനത്തിനായി യാത്ര തിരിക്കുന്നതിന് മുേന്നാടിയായി െകാച്ചി കമ്മീണര് ഓഫീസിലുണ്ട്.
കഴിഞ്ഞ തവണ മുടങ്ങിപ്പോയ ശ്രമം ഇത്തവണ പൂര്ത്തിയാക്കുമെന്നാണ് പറഞ്ഞിരിക്കുന്നത്. തൃപ്തിക്കൊപ്പം കഴിഞ്ഞ തവണ ശബരിമല ദര്ശനം നടത്തിയ ബിന്ദു അമ്മിണിയും ഉണ്ട്. തൃപ്തി ദേശായിയെയും ബിന്ദു അമ്മിണിയെയും കൂടാതെ സംഘത്തിലുള്ളത് ഛായാപാണ്ഡേ, കാംബ്ളെ ഹരിനാക്ഷി, മീനാക്ഷിഷിന്ഡേ, മനീഷാ എന്നിവരാണ്. എന്തുവന്നാലും ഇത്തവണ ശബരിമല ദര്ശനം നടത്തുമെന്നാണ് തൃപ്തിദേശായി പറയുന്നത്. കോടതി സ്ത്രീകളുടെ ശബരിമല ദര്ശനം വിലക്കിയിട്ടില്ലെന്നും സുരക്ഷ കിട്ടിയാലും ഇല്ലെങ്കിലും ഇത്തവണ ദര്ശനം നടത്തുമെന്നും പറഞ്ഞിട്ടുണ്ട്.
വിമാനത്താവളത്തില് നിന്നും പോലീസ് സംരക്ഷണ ആവശ്യപ്പെട്ട തൃപ്തി അത് കിട്ടാതെ വന്നതിനെ തുടര്ന്ന് കൊച്ചി സിറ്റി കമ്മീഷണര് ഓഫീസില് എത്തിയിട്ടുണ്ട്. തൃപ്തി മല കയറാന് എത്തിയത് അറിഞ്ഞ് അനേകം സംഘപരിവാര് പ്രവര്ത്തകരും കമ്മീഷണര് ഓഫീസിന് മുന്നില് തടിച്ചു കൂടിയിട്ടുണ്ട്. ഇവര് ശക്തമായ പ്രതിഷേധമാണ് നടത്തുന്നത്. ഇവര്ക്കൊപ്പം എത്തിയ ബിന്ദു അമ്മിണിയ്ക്ക് നേരെ സംഘപരിവാര് പ്രവര്ത്തകര് മുളകുപൊടി വിതറി. ഒരു തരത്തിലും തൃപ്തി ദേശായിയെയും സംഘത്തെയും ശബരിമലയിലേക്ക് പോകാന് അനുവദിക്കില്ലെന്ന നിലപാടിലാണ് പ്രതിഷേധക്കാര്. തൃപ്തിദേശായിയെ സുരക്ഷാ പ്രശ്നം പറഞ്ഞു മനസ്സിലാക്കാനുള്ള ശ്രമത്തിലാണ് പോലീസ്.
േനരേത്ത സുരക്ഷ ആവശ്യപ്പെട്ട് പ്രധാനമന്ത്രി, കേന്ദ്ര ആഭ്യന്തരമന്ത്രി, കേരളാ മുഖ്യമന്ത്രി, ഡിജിപി എന്നിവര്ക്ക് കത്തയച്ചിരുന്നതായും ഇതിന് മറുപടി കിട്ടിയില്ലെന്നും തൃപ്തിദേശായി പറഞ്ഞു. സുപ്രീംകോടതി ശബരിമലയില് യുവതിപ്രവേശം ആദ്യ തവണ വിധിച്ചതിന് പിന്നാലെ തൃപ്തിദേശായിയും സംഘവും കഴിഞ്ഞ തവണ മലകയറാന് എത്തിയിരുന്നു. എന്നാല് അയ്യപ്പഭക്തന്മാരും ഹിന്ദു സംഘടനകളും ചേര്ന്ന് കടുത്ത പ്രതിരോധം തീര്ത്തു വിമാനത്താവളത്തില് തന്നെ തടഞ്ഞു. ഇതോടെ ശ്രമം ഉപേക്ഷിച്ചു മടങ്ങിയ അവര് ഇത്തവണ വീണ്ടും വന്നിരിക്കുകയാണ്.
കഴിഞ്ഞ തവണ വലിയ പ്രതിഷേധങ്ങള്ക്ക് വഴി വെച്ച ശബരിമലയിലെ യുവതീ പ്രവേശം ഇത്തവണ അനുവദിക്കേണ്ടെന്ന നിലപാടിലാണ് സര്ക്കാര്. കോടതിയുത്തരവുമായി എത്തിയാല് മാത്രം മതി സുരക്ഷ എന്ന നിലയില് തീരുമാനം എടുത്തിരുന്നു. അതേസമയം ശബരിമലയില് യുവതികള് പ്രവേശിക്കുന്നതുമായി ബന്ധപ്പെട്ട പുന: പരിശോധനാ ഹര്ജികള് ഏഴംഗ ഭരണഘടനാ ബഞ്ചിന് നല്കിക്കൊണ്ട് സുപ്രീംകോടതി ഉത്തരവിടുകയായിരുന്നു. കഴിഞ്ഞ തവണ ശബരിമല കയറ്റം പാതിവഴിയില് ഉപേക്ഷിക്കേണ്ടി വന്ന രഹനാ ഫാത്തിമയും മല കയറാനുള്ള ശ്രമത്തിലാണ്. ഇതിനായി ഇവര് സര്ക്കാരിനോട് സുരക്ഷ ആവശ്യപ്പെട്ടിട്ടുണ്ട്. ഇക്കാര്യത്തില് സര്ക്കാര് നിയമോപദേശം തേടിയിരിക്കുകയാണ്.
