കൊച്ചി : നടന് ഷെയിന് നിഗത്തിനെതിരെ നിര്മാതാക്കളുടെ സംഘടനയുടെ വിലക്ക് പിന്വലിപ്പിക്കാനുള്ള നീക്കങ്ങള് സജീവം. അടിയന്തരമായി പ്രശ്നത്തില് ഇടപെടണമെന്ന് ആവശ്യപ്പെട്ട് ഫെഫ്കയും താരസംഘടനയായ അമ്മയും പ്രൊഡ്യൂസേഴ്സ് അസോസിയേഷന് കത്ത് നല്കും. മോഹന്ലാലിനെയും മമ്മൂട്ടിയേയും ഉള്പ്പെടുത്തി പ്രശ്നം പരിഹരിക്കാനാണ് ഫെഫ്കയുടെയും അമ്മയുടെയും നീക്കം.
വിലക്ക് നീക്കാന് ഇടപെടണമെന്ന് ആവശ്യപ്പെട്ട് ഷെയിനുമായി ബന്ധപ്പെട്ടവര് ഫെഫ്കയ്ക്കും കത്ത് നല്കും. വെയില്, ഖുര്ബാനി സിനിമകളുമായി ബന്ധപ്പെട്ട് ഉയര്ന്ന പ്രശ്നങ്ങളെ തുടര്ന്ന് ക്ഷെയ്നെ വിലക്കിയ സംഭവത്തില് ഇടപെടണമെന്ന് ആവശ്യപ്പെട്ടിട്ട് ഷെയിന്റെ മാതാവ് സുനില കഴിഞ്ഞ ദിവസം താരസംഘടനയായ അമ്മയുടെ സെക്രട്ടറി ഇടവേള ബാബുവിന് കത്ത് നല്കിയിരുന്നു. ഇതോടെയാണ് വിഷയം അടിയന്തരമായി പരിഹരിക്കണമെന്ന് ആവശ്യപ്പെട്ട് പ്രൊഡ്യൂസേഴ്സ് അസോസിയേഷന് കത്തു നല്കാന് അമ്മ സംഘടന തയ്യാറെടുക്കുന്നത്.
