ലക്നൗ: വിവാഹ പരിപാടിയില് നൃത്തം നിര്ത്തിയതിന് നര്ത്തകിക്ക് നേരെ വെടിയുതിര്ത്തു. ലക്നൗവില് നടന്ന സംഭവത്തില് വെടിയേറ്റ് നര്ത്തകി ഗുരുതരാവസ്ഥയില് ആശുപത്രിയിലാണ്. സമീപത്ത് നിന്നും ഒരു യുവതി പകര്ത്തിയ സംഭവത്തിന്റെ ഒരു മിനിറ്റ് ദൈര്ഘ്യമുള്ള വീഡിയോ സാമൂഹ്യ മാധ്യമങ്ങളില് വ്യാപകമായി പ്രചരിക്കുന്നുണ്ട്.
നൃത്തസംഘത്തിലെ മറ്റൊരാള്ക്കൊപ്പം സ്റ്റേജില് നില്ക്കുകയായിരുന്ന യുവതിയുടെ മുഖത്താണ് വെടിയേറ്റത്. ഇവരുടെ കവിളിനാണ് പരിക്കേറ്റത്. നര്ത്തകര് നൃത്തം അവസാനിപ്പിച്ച് നില്ക്കുമ്പോള് മദ്യലഹരിയില് ഒരാള് വെടിവെയ്ക്കുമെന്ന് പറയുന്നത് കേള്ക്കാം. തുടര്ന്ന് സീധീര് ഭയ്യാ നിങ്ങള് വെടിവെയ്ക്കൂ എന്ന് മറ്റൊരാളുടെ മറുപടിയും കേള്ക്കാം. ഇയാള് പെട്ടെന്ന് പെണ്കുട്ടിയുടെ മുഖത്തേക്ക് വെടിയുതിര്ക്കുന്നതും പെണ്കുട്ടി മുഖം പൊത്തി താഴേയ്ക്ക് വീഴുന്നതും വീഡിയോയില് കാണാം.
ഡിസംബര് 1 ന് സുധീര് സിംഗ് പട്ടേല് എന്നയാളുടെ മകളുടെ വിവാഹചടങ്ങിലാണ് സംഭവം നടന്നത്. ഗ്രാമത്തലവന്റെ കുടുംബാംഗമാണ് വെടിവെച്ചതെന്നാണ് വിവരം. ഞായറാഴ്ച വരന്റെ മറ്റൊരമ്മാവന് കേസ് കൊടുത്തിട്ടുണ്ട്. പ്രതിയെ അറസ്റ്റ് ചെയ്യാനുള്ള ശ്രമത്തിലാണ് പോലീസ്. വരന്റെ അമ്മാവന്മാരായ മിഥിലേഷ്, അഖിലേഷ് എന്നിവരും സ്റ്റേജില് ഉണ്ടായിരുന്നു.
കാണ്പൂരിലെ ആശുപത്രിയിലാണ് വെടിയേറ്റ യുവതിയെ പ്രവേശിപ്പിച്ചിരിക്കുന്നത്. 2016 ലും സമാനമായ സംഭവം നടന്നിട്ടുണ്ട്. പഞ്ചാബിലെ ബതിന്ഡയില് ഗര്ഭിണിയായ നര്ത്തകിക്ക് നേരെയായിരുന്നു വെടിവെയ്പ്പ് ഉണ്ടായത്. വയറില് വെടിയേറ്റ യുവതി സ്ഥലത്ത് വെച്ചു തന്നെ മരണത്തിന് കീഴടങ്ങുകയും ചെയ്തു.
