തെലങ്കാനയില് വെറ്റിനറി ഡോക്ടറെ ബലാത്സംഗം ചെയ്ത് കൊന്ന കേസിലെ പ്രതികളെ ഏറ്റുമുട്ടലില് വധിച്ച സംഭവത്തില് പ്രതികരണവുമായി സിനിമാ ലോകം. തെലങ്കാന പോലീസിനെ അഭിനന്ദിച്ചും എതിര്ത്തും സിനിമാ രംഗത്തു നിന്നും നിരവധി പേര് രംഗത്തെത്തിയിട്ടുണ്ട്. തെലുങ്ക് സിനിമ താരങ്ങളായ അല്ലു അര്ജുന്, സമാന്ത, ജൂനിയര് എന്ടിആര്, തമിഴ് താരം വിശാല് തുടങ്ങിയവര് മുതല് മലയാള താരങ്ങളായ അജു വര്ഗ്ഗീസ്, ജയസൂര്യ, ഉണ്ണി മുകുന്ദന്, കുഞ്ചാക്കോ ബോബന് വരെയുള്ളവര് പോലീസ് നടപടിയെ അഭിനന്ദിച്ചു.
ഭയമാണ് ഒരേയൊരു പ്രതിവിധിയെന്നായിരുന്നു സാമന്തയുടെ പ്രതികരണം. നീതി നടപ്പിലാക്കപ്പെട്ടുവെന്ന് അല്ലു അര്ജുനും സോഷ്യല് മീഡിയയില് കുറിച്ചു. നാഗാര്ജുനയും പോലീസ് നടപടിയിലൂടെ നീതി നടപ്പിലായെന്ന് അഭിപ്രായപ്പെട്ടു.
പോലീസ് എന്ന ചുരുക്കെഴുത്തിലെ ഓരോ അക്ഷരങ്ങളും എന്തിനെയൊക്കെ പ്രതിനിധാനം ചെയ്യുന്നുവെന്ന് പറഞ്ഞു കൊണ്ടായിരുന്നു ഉണ്ണിമുകുന്ദന്റെ പോസ്റ്റ്. ഉച്ചത്തില് വ്യക്തമായി എന്നും ഉണ്ണി മുകുന്ദന് പോസ്റ്റില് കുറിച്ചിട്ടുണ്ട്. ഏറ്റുമുട്ടലില് പ്രതികള് കൊല്ലപ്പെട്ടെന്ന വാര്ത്തയും താരം പങ്കുവെച്ചു. നേരത്തെ പോലീസ് നടപടിയെ സ്വാഗതം ചെയ്ത് കുഞ്ചാക്കോ ബോബനും രംഗത്തെത്തിയിരുന്നു. ഇതിന് പിന്നാലെയാണ് ഉണ്ണി മുകുന്ദനും അഭിപ്രായം രേഖപ്പെടുത്തിയത്.
ഇതിനെയാണ് കര്മ്മഫലം എന്ന് പറയുന്നതെന്നായിരുന്നു കുഞ്ചാക്കോ ബോബന്റെ പ്രതികരണം. ഡ്യൂട്ടി എന്നാല് ഇതിനപ്പുറം ഒന്നുമല്ലെന്നും താരം പ്രതികരിച്ചു. മനസ്സിന് വല്ലാത്ത ഒരു സന്തോഷം. പോലീസ് ചെയ്തത് ശരിയോ തെറ്റോ എന്നുള്ളതല്ല ഇപ്പോള് ചിന്തിക്കുന്നത് ഈ പ്രതികളെ എന്റെ കയ്യില് കിട്ടിയാല് ഞാന് ഇതിനേക്കാള് ഭാകരമായി ശിക്ഷിച്ചേനെ. പോലീസ് കുപ്പായമിട്ടിട്ടും ഒരച്ഛന്റെ മനസ്സോട് കൂടി ജനങ്ങളുടെ മനസിലുണ്ടായ നീതി നടപ്പാക്കിയ എസ്പിയ്ക്ക് സല്യൂട്ട് എന്നായിരുന്നു സുരഭി ലക്ഷ്മിയുടെ പ്രതികരിച്ചു.
''കേരളത്തില് ബഹുമാനപ്പെട്ട കോടതി നിരവധി കൊടും കുറ്റവാളികളെ വധശിക്ഷക്കു വിധിക്കുന്നുണ്ടെങ്കിലും 1991 മുതല് 28 വ4ഷമായ് സാങ്കേതിക കാരണങ്ങളാല് ആരേയും തൂക്കിലേറ്റിയില്ല എന്ന് വാ4ത്ത. ഗോവിന്ദ ചാമിയടക്കം പലരും വധശിക്ഷ കാത്തിരിക്കുന്നു.'' എന്നാണ് സന്തോഷ് പണ്ഡിറ്റ് പ്രതികരിച്ചത്.
അതേസമയം ആര്ട്ടിക്കിള് 15, മുള്ക്ക് തുടങ്ങിയ സിനിമകളുടെ സംവിധായകനായ അനുഭവ് സിന്ഹ സംഭവത്തില് പോലീസിനെ പ്രതികൂലിച്ചാണ് രംഗത്തെത്തിയത്. നീതി നടപ്പിലാക്കാന് മിര്സാപൂരില് എത്ര എന്കൗണ്ടറുകള് നടക്കണമെന്നായിരുന്നു അദ്ദേഹത്തിന്റെ പ്രതികരണം. രാജ്യം ഏങ്ങോട്ടാണ് പോകുന്നതെന്ന് നടന് അതുല് കുല്ക്കര്ണിയും ട്വീറ്റ് ചെയ്തിട്ടുണ്ട്. ഇരുവരും തെലുങ്കാന സംഭവത്തെ നേരിട്ട് പരാമര്ശിക്കാതെയാണ് പ്രതികരിച്ചത്.
നീതിയുടെ പരാജയത്തെ നീതിയെന്ന് കൊട്ടിഘോഷിക്കുന്ന കാലത്താണ് നമ്മള് ജീവിക്കുന്നെതന്നായിരുന്നു ബോളിവുഡ് സംഗീത സംവിധായകന് വിശാല് ഡാഡ്ലാനിയുടെ പ്രതികരണം. വിചാരണയില്ലാതെ പോലീസ് ആളുകളെ വെടിവച്ച് കൊല്ലുന്നത് ഒരുനാള് നിങ്ങളുടെ വാതിലിലുമെത്തുമെന്നും അദ്ദേഹം പറഞ്ഞു.
നവംബര് 27 നാണ് രാജ്യത്തെ നടുക്കിയ സംഭവമുണ്ടാകുന്നത്. വെറ്റിനറി ഡോക്ടറായ യുവതിയെ നാലംഗ സംഘം ബലാത്സംഗം ചെയ്ത് തീ കൊളുത്തി കൊല്ലുകയായിരുന്നു. ബെംഗളൂരു ഹൈദരാബാദ് ദേശീയപാതയ്ക്ക് സമീപം രംഗറെഡ്ഡി ജില്ലയില് ഷംഷാബാദിലുള്ള ടോള് ബൂത്തിന് സമീപമാണ് സംഭവം നടന്നത്.
ഇന്ന് പുലര്ച്ചെ മൂന്നരയോടെയായിരുന്നു പ്രതികളെ തെളിവെടുപ്പിനായ സംഭവ സ്ഥലത്തെത്തിച്ചത്. പ്രതികള് രക്ഷപ്പെടാന് ശ്രമിച്ചെന്നും തുടര്ന്നുണ്ടായ ഏറ്റുമുട്ടലില് വെടിവയ്ക്കുകയായിരുന്നുവെന്നുമാണ് പോലീസ് പറയുന്നത്.
