കോഴിക്കോട്: കവര്ച്ചക്കേസില് പിടിയിലായ പ്രതി പോലീസില് ജീപ്പില് നിന്നിറങ്ങി ഓടി രക്ഷപെട്ടു. മലപ്പുറം പെരിന്തല്മണ്ണ തിരൂര്ക്കാട് ഓടപ്പറമ്പില് അജ്മല് (25) ആണ് കോഴിക്കോട് തൊണ്ടയാണ് ബൈപ്പാസില് വച്ച് രക്ഷപെട്ടത്. വെള്ളിയാഴ്ച വൈകിട്ടാണ് സംഭവം.
നവംബര് 29ന് അജ്മല് ഉള്പ്പെടെ മൂന്നംഗ സംഘം സഞ്ചരിച്ചിരുന്ന ജീപ്പ് അപകടത്തില്പ്പെടുകയും ഇവരുടെ പക്കല് നിന്ന് മോഷണ മുതല് കണ്ടെടുക്കുകയും ചെയ്തിരുന്നു. ഇതേതുടര്ന്നാണ് അജ്മലും ഒപ്പമുണ്ടായിരുന്ന ആലുങ്കല് ജുനൈദും അറസ്റ്റിലാകുന്നത്. കോഴിക്കോട് കൊടുവള്ളിയില് വച്ച് അപകടത്തില്പ്പെട്ട ജീപ്പില് നിന്ന് മറ്റൊരാള് ഓടി രക്ഷപെട്ടിരുന്നു.
അജ്മലിനെയും ജുനൈദിനെയും അറസ്റ്റ് രേഖപ്പെടുത്തി കോടതിയില് ഹാജരാക്കി റിമാന്ഡ് ചെയ്തിരുന്നു. തുടരന്വേഷണത്തിനായി ഇരുവരെയും കൊടുവള്ളി പോലീസ് മൂന്ന് ദിവസത്തെ കസ്റ്റഡിയില് വാങ്ങി തിരികെ ജയിലിലേക്ക് എത്തിക്കുന്നതിനിടെയാണ് തൊണ്ടയാട് ബൈപ്പാസിലെ സിഗ്നലില് വാഹനം നിര്ത്തിയപ്പോള് ഇരുവരും വാഹനത്തില് നിന്നിറങ്ങി ഓടിയത്.
ജുനൈദിനെ പോലീസ് പിന്തുടര്ന്ന് പിടികൂടിയെങ്കിലും അജ്മലിനെ കണ്ടെത്താനായില്ല. കൈ വിലങ്ങുമായാണ് പ്രതി രക്ഷപെട്ടിരിക്കുന്നത്. പതിനെട്ടോളം മോഷണക്കേസുകളിലെ പ്രതിയാണ് അജ്മല്. സംഭവത്തില് മെഡിക്കല് കോളജ് പോലീസ് കേസെടുത്ത് അന്വേഷണം തുടങ്ങി.
