കൊച്ചി : പൗരത്വ ഭേദഗതി നിയമത്തിനെതിരെ കൊച്ചിയില് സംഘടിപ്പിച്ച പ്രതിഷേധ റാലിയില് പങ്കെടുത്ത നോര്വീജിയന് വനിതയോട് ഇന്ത്യവിട്ടുപോകാന് നിര്ദേശിച്ച് അധികൃതര്. യഥേ ജോഹാന്സണ് എന്ന വിദേശ വനിതയോടാണ് ഇന്ത്യ വിട്ടുപോകാന് നിര്ദേശം നല്കിയിരിക്കുന്നത്.
വിസ ചട്ടങ്ങള് ലംഘിച്ചുവെന്ന് ചൂണ്ടിക്കാട്ടിയാണ് നടപടി. എഫ്ആര്ആര്ഒ ഇന്നലെ ഇവരെ വിളിച്ചു വരുത്തുകയും ചോദ്യം ചെയ്യുകയും ചെയ്തിരുന്നു. ടൂറിസ്റ്റ് വിസയിലാണ് ഇവര് ഇന്ത്യയില് എത്തിയതെന്നും ഈ വിസയില് എത്തിയവര് പ്രതിഷേധ പ്രകടനങ്ങളില് പങ്കെടുക്കാന് പാടില്ലെന്നുമാണ് അധികൃതരുടെ വിശദീകരണം.
കലാ സാംസ്കാരിക രംഗത്തെ പ്രമുഖര് പങ്കെടുത്ത പ്രതിഷേധ റാലി കഴിഞ്ഞ 13 നാണ് കൊച്ചിയില് സംഘടിപ്പിച്ചത്. തന്റെ ഫേസ്ബുക്ക് പേജില് ജോഹാന്സണ് ഇത് പോസ്റ്റ് ചെയ്യുകയും ചെയ്തിരുന്നു. ഇതേതുടര്ന്നാണ് അധികൃതര് ഇവരെ വിളിച്ചു വരുത്തുകയും ഇന്ത്യ വിട്ടുപോകാന് നിര്ദേശിക്കുകയും ചെയ്തത്.
