കോഴിക്കോട്: പാര്ട്ടിയില് ചേര്ന്ന് ആറു മാസം പോലും തികയ്ക്കും മുമ്പ് സംസ്ഥാന ബിജെപിയ്ക്ക് തിരിച്ചടി നല്കി പാര്ട്ടിയിലെ ന്യൂനപക്ഷ മോര്ച്ചാ സംസ്ഥാന എക്സിക്യുട്ടീവ് അംഗം ബാഫഖി രാജിവെച്ചു. ഓഗസ്റ്റില് പാര്ട്ടിയില് ചേര്ന്ന സയ്യിദ് താഹ ബാഫഖി ഡിസംബറില് രാജി പ്രഖ്യാപനം നടത്തി. മുസ്ളീംലീഗ് സ്ഥാപക നേതാക്കളില് പെടുന്ന അബ്ദു റഹിമാന് ബാഫഖി തങ്ങളുടെ കൊച്ചുമകനായ താഹ ബാഫഖി ലീഗിനെയും കോണ്ഗ്രസിനെയും ഞെട്ടിച്ചായിരുന്നു ബിജെപിയിലെത്തിയത്.
പൗരത്വ ഭേദഗതി നിയമത്തില് പ്രതിഷേധിച്ചാണ് രാജി. ബാഫഖി തങ്ങള് ട്രസ്റ്റിന്റെ നേതാവ് കൂടിയായ താഹ ബാഫഖി ന്യൂനപക്ഷ വിഭാഗത്തില് പെടുന്ന മറ്റ് 23 പേര്ക്കൊപ്പമായിരുന്നു ലീഗ് വിട്ട് നേരത്തേ ബിജെപിയിലേക്ക് പോയത്. ഇന്ത്യയിലെ ഇസ്ളാമിക സമുദായം ഇപ്പോള് പരിഭ്രാന്തിയിലാണെന്നും പരിഹരിക്കാനാവശ്യമായ ഒന്നും ചെയ്യുന്നില്ലെന്നും ആക്ഷേപിച്ചാണ് ബിജെപി വിട്ടിരിക്കുന്നത്. രാജ്യത്തെ ഇസ്ളാമിക വിഭാഗത്തിന്റെ പരിഭ്രാന്തി പരിഹരിക്കാന് ആവശ്യമായ കാര്യങ്ങള് കേന്ദ്ര സര്ക്കാര് ചെയ്യുന്നില്ല. ഇക്കാര്യത്തില് ഒരു സര്വകക്ഷിയോഗം പോലും വിളിക്കുന്നില്ല എന്നും അദ്ദേഹം ആരോപിക്കുന്നു.
രണ്ടാഴ്ചയോളം കേന്ദ്രസര്ക്കാര് നടപടിയെടുക്കുമോ സര്വകക്ഷിയോഗം വിളിക്കുകയോ ചെയ്യുമെന്ന കരുതി കാത്തിരുന്നെന്നും എന്നാല് ഒരു നടപടിയും ഉണ്ടായില്ല. രാജ്യത്തിന്റെ പല ഭാഗങ്ങളിലും അക്രമങ്ങള് നടക്കുകയാണ്. രാജ്യസഭയിലും ലോക്സഭയിലും ബില് പാസ്സായി എന്ന് കരുതി ജനങ്ങളുടെ വികാരം കണക്കിലെടുക്കാതിരിക്കുന്നത് എന്തു നീതിയാണെന്നും ചോദിക്കുന്നു. ഒരു പ്രത്യേക മത വിഭാഗത്തിന്റെ വികാരം കണക്കിലെടുക്കുന്നേയില്ല. സ്വന്തം സമുദായത്തെ ദു:ഖത്തിലാഴ്ത്തി ഇനിയും പാര്ട്ടിയില് നില്ക്കാന് താല്പ്പര്യമില്ലെന്ന് വ്യക്തമാക്കിക്കൊണ്ടാണ് രാജി പ്രഖ്യാപനം നടത്തിയിട്ടുള്ളത്.
