പൊലീസുകാര്ക്ക് തലവേദനയായി മഹാരാഷ്ട്രയിലെ ശിവജി കോട്ടയിലെ കാവല്സംഘമെന്ന് സ്വയം വിശേഷിപ്പിക്കുന്നവര്. 'വിജിലന്റ് ഗ്രൂപ്പ്'(ജാഗ്രതക്കൂട്ടം) എന്ന് സ്വയം വിശേഷിപ്പിക്കുന്ന സംഘത്തിന്റെ പ്രവൃത്തികളാണ് ഇപ്പോള് പൊലീസുകാര്ക്ക് തലവേദനയായിരിക്കുന്നത്. ശിവജി കോട്ടകളില് മദ്യപിക്കാന് എത്തുന്നവരെ നഗ്നരാക്കി മര്ദിച്ച് മാപ്പ് പറയിപ്പിക്കുന്ന കാവല് സംഘത്തിന്റെ വിഡിയോ കഴിഞ്ഞ ദിവസം സോഷ്യല് മീഡിയയില് വൈറലായിരുന്നു.
പുതുവര്ഷത്തലേന്ന് റെയ്ഗാഡ് ജില്ലയിലെ കര്ജതിന് അടുത്തുള്ള ശിവജി കോട്ടയില് ന്യൂ ഇയര് ആഘോഷിക്കാന് മുംബൈയില് നിന്നെത്തിയ പത്തംഗ സംഘത്തെ കാവല് സംഘം മര്ദിച്ച് തുണികള് വലിച്ചുരിഞ്ഞ് മാപ്പ് പറയിക്കുന്ന വിഡിയോ വൈറലാണ്. ഇവര് തന്നെയാണ് ഈ വിഡിയോ ചിത്രീകരിച്ചത്. പത്തുപേരെയും തറയില് അടിവസ്ത്രം മാത്രം ധരിപ്പിച്ച് മുട്ടുകുത്തി നിര്ത്തുന്നതും പേര് പറഞ്ഞ് പരിചയപ്പെടുത്താന് നിര്ബന്ധിക്കുന്നതും ശിവജിയെ ബഹുമാനിച്ചുകൊള്ളാമെന്ന് പ്രതിജ്ഞയെടുപ്പിക്കുന്നതുമാണ് വിഡിയോയിലുള്ളത്.
ശിവ്നേരി കോട്ട, റെയ്ഗാഡ കോട്ട, വികാത്ഗാഡ് പെബ കോട്ട തുടങ്ങിയ സ്ഥലങ്ങളില് മദ്യവുമായി എത്തുന്നവരെ ഇവര് മര്ദിക്കുന്ന വീഡിയോകളുണ്ട്. ഒരു വീഡിയോയില് സംഘം പൊലീസിനെ മര്ദിക്കുന്നുമുണ്ട്. അതേസമയം, സംഭവത്തില് കണ്ടാലറിയാവുന്ന ചിലര്ക്കെതിരെ കേസെടുത്തിട്ടുണ്ടെന്നും അന്വേഷണം പുരോഗമിക്കുകയാണെന്നും പൊലീസ് വ്യക്തമാക്കി.
