ടെഹ്റാന് : അമേരിക്കയുമായി ഇറാന് സംഘര്ഷത്തില് ഏര്പ്പെടുന്നു നില്ക്കുന്ന സാഹചര്യത്തില് ടെഹ്റാനിലെ വിമാനത്താവളത്തിനടുത്ത് യുക്രെയിന് വിമാനം തകര്ന്നു വീണു. 180 യാത്രക്കാരുമായി ടെഹ്റാനില് നിന്നും പറയുന്നയര്ന്ന യുക്രെയിന് ഇന്റര്നാഷണല് എയര്ലൈന്സിന്റെ ബോയിംഗ് 707 വിമാനമാണ് തകര്ന്നു വീണത്. വിമാനത്തില് ഉണ്ടായിരുന്ന എല്ലാവരും മരണപ്പെട്ടതായാണ് വിവരം.
ഇന്ത്യന് സമയം പുലര്ച്ചെ 12 മണിയോടെയാണ് അപകടം ഉണ്ടായത്. ഇറാനിയന് അത്യാഹിത വിഭാഗം ജീവനക്കാരന് പിര് ഹൊസൈന് കുളിവന്ദിനെ ഉദ്ധരിച്ച് പ്രാദേശിക മാധ്യമങ്ങളാണ് യാത്രക്കാരുടെ മരണവിവരം പുറത്തുവിട്ടിരിക്കുന്നത്. ഇറാനിലെ ഇമാം ഖുമൈനി വിമാനത്താളത്തില് നിന്നും യുക്രെയിനിലെ കീവിലേക്ക് പുറപ്പെട്ട വിമാനമാണ് തകര്ന്നുവീണത്. ഇറാന് - അമേരിക്കന് സംഘര്ഷവുമായി സംഭവത്തിന് ഏതെങ്കിലും തരത്തില് ബന്ധമുണ്ടെന്ന് കണ്ടെത്താനായിട്ടില്ല. രക്ഷാ പ്രവര്ത്തകര് ഉടന് തന്നെ സ്ഥലത്തെത്തുകയും ചെയ്തിരുന്നു. സാങ്കേതിക തകരാറാണ് അപകട കാരണമെന്നാണ് വിവരം. സംഭവത്തില് അന്വേഷണം ആരംഭിച്ചതായി ടെഹ്റാന് സിവില് ഏവിയേഷന് വക്താവ് വ്യക്തമാക്കിയിട്ടുണ്ട്.
170 യാത്രക്കാരും പത്തു ജീവനക്കാരുമായി ഖൊമേനി അന്താരാഷ്ട്ര വിമാനത്താവളത്തില് നിന്നും പറന്നുയര്ന്ന ശേഷം പറാന്ഡിനും ഷഹരിയാറിനും ഇടയില് വെച്ച് വിമാനം തകര്ന്നുവീഴുകയായിരുന്നു. വിമാനത്തില് ഉണ്ടായിരുന്ന എല്ലാവരും മരിച്ചതായി പിര് ഹൊസൈന് ഇറാന് സ്റ്റേറ്റ് ടെലിവിഷനോട് വ്യക്തമാക്കി. രക്ഷാ പ്രവര്ത്തകര് മൃതദേഹം കണ്ടെത്താനുള്ള ശ്രമത്തിലാണെന്നും വ്യക്തമാക്കിയിട്ടുണ്ട്. ഇറാനും അമേരിക്കയും തമ്മില് സംഘര്ഷം രൂക്ഷമായിരിക്കുന്ന സാഹചര്യത്തില് അമേരിക്കന് സൈനികകേന്ദ്രം ഇറാന് ആക്രമിച്ചതിന് പിന്നാലെ ആയിരുന്നു വിമാനാപകടം.
