തിരുവനന്തപുരം: പൗരത്വ നിയമഭേദഗതിക്കെതിരേ സംസ്ഥാനം സുപ്രീംകോടതിയെ സമീപിച്ചതിനെ തുടര്ന്ന് ഉണ്ടായ വിവാദത്തില് ഗവര്ണറെ കണ്ട് കാര്യങ്ങള് വിശദീകരിക്കാന് ചീഫ് സെക്രട്ടറി രാജ്ഭവനില്. സര്ക്കാരിന്റെ നിലപാട് വ്യക്തമാക്കുകയാണ് ലക്ഷ്യം. റൂള്സ് ഓഫ് ബിസിനസ് ലംഘിച്ചിട്ടില്ലെന്ന നിലപാടാകും സര്ക്കാര് ഗവര്ണറെ അറിയിക്കുക.
നടപടി തന്നോട് ആലോചിക്കാതെ എടുത്തതില് ഗവര്ണര് ശക്തമായ നിലപാട് എടുത്തത് സംസ്ഥാന സര്ക്കാരുമായുള്ള ഭിന്നതയ്ക്ക് ഇടയാക്കിയിരുന്നു. അതേസമയം പൗരത്വ റജിസ്റ്ററും ജനസംഖ്യാ റജിസ്റ്ററും സംസ്ഥാനത്ത് നടപ്പാക്കേണ്ടതില്ല എന്ന തീരുമാനമാണ് സംസ്ഥാന സര്ക്കാര് എടുത്തിരിക്കുന്നത്. ഇക്കാര്യം സെന്സസ് ഡയറക്ടറെ അറിയിക്കാനും മന്ത്രിസഭായോഗം തീരുമാനം എടുത്തിരുന്നു.
എന്നാല് കേന്ദ്രസര്ക്കാരിന്റെ സെന്സസ് നടപടികളോട് മുഖം തിരിക്കില്ല. അതേസമയം ഇതിലെ മാതാപിതാക്കളെ സംബന്ധിച്ച വിശദാംശങ്ങളും ജനനത്തീയതിയുമായി ബന്ധപ്പെട്ട കാര്യങ്ങളും ഒഴിവാക്കും. ഈ ചോദ്യങ്ങള് അനാവശ്യമെന്നാണ് സര്ക്കാരിന്റെ നിലപാട്. നേരത്തേ പൗരത്വ നിയമ ഭേദഗതിയുമായി ബന്ധപ്പെട്ട് ആദ്യം മുതല് ഗവര്ണറും സര്ക്കാരും ഭിന്നതയിലാണ്.
