പ്രണയ ദിനത്തില് യാതൊരു ആഘോഷങ്ങളും സംഘടിപ്പിക്കാനായി അനുവദിക്കില്ലെന്ന് തെലങ്കാന ബജ്റംഗദള്. വിദേശ കമ്പനികളുടെ ലാഭത്തിനായി ഇന്ത്യന് സംസ്കാരത്തെ തകര്ക്കുന്ന ഒന്നും അനുവദിക്കില്ലെന്നാണ് ബജ്റംഗദള് നിലപാട്. പാര്ക്കുകളിലോ പബ്ബുകളിലോ കമിതാക്കള് ഒരുമിച്ച് എത്തിയാല് അവരെ തടയുമെന്നും മുന്നറിയിപ്പുണ്ട്.
ഫെബ്രുവരി 14 പുല്വാമ ദിനമായി ആചരിക്കണമെന്നും അന്ന് രക്തസാക്ഷികള്ക്ക് ആദരാഞ്ജലികള് അര്പ്പിക്കാനുള്ള ദിവസമായി കണക്കാക്കണമെന്നുമാണ് ബജ്റംഗദളിന്റെ വാദം. ''കമിതാക്കള് തോന്ന്യാസം കാണിക്കരുത്. പ്രണയത്തിന്റെ പേരും പറഞ്ഞ് പാര്ക്കിലും പബിലും കറങ്ങി നടക്കുന്ന കമിതാക്കളെ തടയും. അവര് ഇന്ത്യന് സംസ്കാരത്തിനു കളങ്കം വരുത്തുകയാണ്'' ബജ്റംഗദള് തെലങ്കാന കണ്വീനര് സുഭാഷ് ചന്ദര് പറഞ്ഞു.
കുത്തക കമ്പനികളാണ് പ്രണയദിനം പ്രോത്സാഹിപ്പിക്കുന്നത്. പ്രത്യേക ഓഫറുകള് നല്കി കമ്പനികള് യുവതീയുവാക്കളെ വഴി തെറ്റിക്കുന്നു. ഇന്ത്യന് സംസ്കാരത്തെ തകര്ക്കുന്നുവെന്നും ബജ്റംഗ്ദള് ആരോപിക്കുന്നു.
