ന്യൂഡല്ഹി: ഇന്ത്യ ആകാംഷയോടെ കാത്തിരുന്ന ഡല്ഹി തെരഞ്ഞെടുപ്പില് ആം ആദ്മി പാര്ട്ടിക്ക് വന് വിജയം നേടാനായെങ്കിലും ഉപമുഖ്യമന്ത്രി മനീഷ് സിസോദിയ പരാജയത്തിലേക്ക്. പട്പട് ഗഞ്ചില് നിന്നും മത്സരിച്ച മനീഷ് സിസോദിയ ആറ് റൗണ്ട് വോട്ടെണ്ണല് പൂര്ത്തിയാകുമ്പോള് 2000 വോട്ടുകള്ക്ക് ബിജെപി സ്ഥാനാര്ത്ഥി രവി നെഗിയേക്കാള് പിന്നിലാണ്. വോട്ടെണ്ണല് രണ്ടാം റൗണ്ട് പൂര്ത്തിയായത് മുതല് സിസോദിയ പിന്നിലേക്ക് പോയി. രണ്ടാം റൗണ്ടില് 74 വോട്ടുകളുടെ ഭൂരിപക്ഷമാണ് ഉണ്ടായിരുന്നത്. പിന്നീടുള്ള റൗണ്ടുകളില് നെഗി മുന്നിലേക്ക് എത്തി.
2015 തെരഞ്ഞെടുപ്പില് ബിജെപി സ്ഥാനാര്ത്ഥി വിനോദ് കുമാര് ബിന്നിയെ സിസോദിയ പരാജയപ്പെടുത്തിയത് 54 ശതമാനം വോട്ടു ഷെയര് നേടിയാണ്. എന്നാല് ഇത്തവണ ആറ് റൗണ്ട് പൂര്ത്തിയാകുമ്പോള് 2183 വോട്ടുകള്ക്കാണ് പിന്നില് നില്ക്കുന്നത്. ഇനി ഏതാനും റൗണ്ടുകള് കൂടി വോട്ടെണ്ണല് ബാക്കി നില്ക്കേ സിസോദിയ പരാജയത്തിലേക്കാണ് നീങ്ങുന്നതെന്ന കാര്യം വ്യക്തമാക്കുകയാണ്. അതേസമയം ന്യൂഡല്ഹി മണ്ഡലത്തില് നിന്നും മത്സരിച്ച അരവിന്ദ് കെജ്രിവാള് മികച്ച മുന്നേറ്റമാണ് നടത്തുന്നത്. ആറു റൗണ്ട് കഴിയുേമ്പാള് 10,000 വോട്ടുകളുടെ ഭൂരിപക്ഷത്തില് ബിജെപിയുടെ സുനില്കുമാര് യാദവിനെയാണ് പിന്നിലാക്കിയിരിക്കുന്നത്. 64 ശതമാനം വോട്ട് ഇത്തവണ നേടാനും ആം ആദ്മി പാര്ട്ടിക്കായി. അതേസമയം കല്ക്കജിയില് നിന്നും മത്സരിച്ച ആതിഷി, ബിജെപിയുടെ ധരംബീര് സിംഗിന് പിന്നിലാണ്.
ഇത്തവണ 15 പുതുമുഖങ്ങളെയാണ് ആംആദ്മി പാര്ട്ടി രംഗത്ത് ഇറക്കിയത്. ബിജെപി സീറ്റ് നല്കിയത് കഴിഞ്ഞ തവണ മത്സരിച്ച 30 പേര്ക്കാണ്. കോണ്ഗ്രസിന്റെ മുന്നിര സ്ഥാനാര്ത്ഥിമാരായ ഡോ. അശോക് കുമാര്, അല്ക്കാ ലാംബ, എന്നിവരെല്ലാം പിന്നിലാണ്. മുമ്പ് ആപ്പില് നിന്നും ജയിക്കുകയും പിന്നീട് കോണ്ഗ്രസിലേക്ക് പോകുകയും ചെയ്തയാളാണ് അല്ക്കാ ലാംബ. മോഡല് ടൗണില് നിന്നും ലീഡ് ചെയ്യുന്ന കപില് മിശ്രയും ആപ്പില് നിന്നും, ബിജെപിയില് എത്തിയയാളാണ്.
