ന്യൂഡല്ഹി: ആഗ്ര–ലക്നൗ എക്സ്പ്രസ്വേയിലുണ്ടായ വാഹനാപകടത്തില് പതിനാല് പേര് മരിച്ചു. ഇരുപത് പേര്ക്ക് പരുക്കേറ്റു. ഡല്ഹിയില്നിന്ന് ബിഹാറിലേക്ക് പോവുകയായിരുന്ന സ്വകാര്യബസ് ട്രക്കിന് പുറകില് ഇടിച്ചുകയറുകയായിരുന്നു.
പരിക്കേറ്റവരേയും മരിച്ചവരേയും യുപി റൂറല് ഇന്സ്റ്റിറ്റ്യൂട്ട് ഓഫ് മെഡിക്കല് സയന്സ് ആശുപത്രിയിലേക്ക് മാറ്റി. ഫിറോസാബാദില് രാത്രി പത്തുമണിയോടെയായിരുന്നു അപകടം. ബസില് 45 യാത്രക്കാരാണുണ്ടായിരുന്നത്. എക്സ്പ്രസ്വേയില് പൊട്ടിയ ടയര് മാറ്റിയിടുന്നതിനായി നിര്ത്തിയിട്ട ട്രക്കിന് പിന്നില് വന്ന് ബസ് ഇടിക്കുകയായിരുന്നു.
ഫിറോസാബാദ് ജില്ലയിലെ നഗ്ല ഖന്ഗര് പോലീസ് സ്റ്റേഷന് പരിധിയിലാണ് അപകടം നടന്നത്. മൂന്നു മണിക്കൂറോളം നീണ്ട രക്ഷാപ്രവര്ത്തനത്തിന് ഒടുവിലാണ് മരിച്ചവരുടെ മൃതദേഹങ്ങളും പരിക്കേറ്റവരേയും ബസില് നിന്ന് പുറത്തേക്ക് എത്തിക്കാനായത്.
