വര്ഷങ്ങളുടെ അനുഭവ സമ്പത്തും അഭിനയ പാരമ്പര്യവുമുള്ള അഭിനേതാക്കള്ക്കും പലപ്പോഴും സിനിമ കയ്യെത്തി പിടിക്കാവുന്ന ഇടമാകാറില്ല. 31 വര്ഷം മുന്പ് സുകുമാരന് അഭിനയിച്ച സിനിമയില് ചെറിയ റോളിലെത്തി മിന്നിമറഞ്ഞ നടന് ഇന്ന് പൃഥ്വിരാജും ബിജു മേനോനും നായകനായി എത്തുന്ന അയ്യപ്പനും കോശിയും എന്ന സിനിമയില് കയ്യടി നേടുന്ന കഥാപാത്രമായി. പൃഥ്വി അവതരിപ്പിക്കുന്ന കോശിയുടെ ഡ്രൈവറായി എത്തുന്ന കുമാരേട്ടന് എന്ന കഥാപാത്രത്തെ അവതരിപ്പിച്ച കോട്ടയം രമേശ്, ഉപ്പും മുളകും എന്ന പരമ്പരയിലൂടെ ശ്രദ്ധേയനുമാണ് കോട്ടയം രമേശ് ഇപ്പോള്.
ബാലചന്ദ്രമേനോന് സംവിധാനം ചെയ്ത ഞങ്ങളുടെ കൊച്ച് ഡോക്ടര് എന്ന സിനിമയില് സുകുമാരന് അവതരിപ്പിക്കുന്ന ഡോക്ടര് കഥാപാത്രത്തെ ചോദ്യം ചെയ്യാനെത്തുന്ന ഉദ്യോഗസ്ഥന്റെ റോളിലാണ് കോട്ടയം രമേശ് അന്ന് എത്തിയത്. മൂന്ന് പതിറ്റാണ്ട് കഴിഞ്ഞ് ഇപ്പോള് സുകുമാരന്റെ മകന് പൃഥ്വിരാജിനൊപ്പം മുഴുനീള കഥാപാത്രമായെത്തിയിരിക്കുകയാണ് അദ്ദേഹം. സിനിമ കണ്ടിറങ്ങിയ ശേഷം കോട്ടയം രമേശിനോട് സംസാരിച്ച അഫ്സല് കരുനാഗപ്പള്ളിയാണ് ഇക്കാര്യം ഫേസ്ബുക്കില് പങ്കുവച്ച്.
ഫേസ്ബുക്ക് പോസ്റ്റിന്റെ പൂര്ണരൂപം,
ഇന്നലെ അയ്യപ്പനും കോശിയും കണ്ടു കഴിഞ്ഞു കുമാരേട്ടനെ കെട്ടിപ്പിടിച്ചു സന്തോഷം പങ്കു വെച്ചപ്പോള് രമേഷേട്ടന് പഴയ ഒരു ഓര്മ്മ പങ്കു വെച്ചു.
1989 ല് ബാലചന്ദ്രമേനോന് സംവിധാനം ചെയ്ത 'ഞങ്ങളുടെ കൊച്ചു ഡോക്ടര്' എന്ന സിനിമയില് സുകുമാരന് അവതരിപ്പിക്കുന്ന ഡോക്ടര് കഥാപാത്രത്തെ ചോദ്യം ചെയ്യാന് വരുന്ന ഉദ്യോഗസ്ഥന്റെ വേഷമായിരുന്നു രമേഷേട്ടന്.
ഒരു പാട്ട് രംഗത്തില് സെക്കന്റുകള് മാത്രം സ്ക്രീനില് വന്നു പോകുന്ന വേഷം. എവിടെയാണ് വന്നു പോകുന്നതെന്ന് കൃത്യമായി രമേഷേട്ടന് പറഞ്ഞു തന്നത് കൊണ്ട് അപ്പോള് തന്നെ യൂട്യൂബില് കയറി ആ സീനിന്റെ സ്ക്രീന്ഷോട്ട് എടുത്തു.
സുകുമാരനൊപ്പമുള്ള ആ പഴയ ഫോട്ടോയും തലേന്ന് പൃഥ്വിരാജ് ഫേസ്ബുക്കില് പോസ്റ്റ് ചെയ്ത കുമാരനോടൊപ്പമുള്ള ഫോട്ടോയും കണ്ടപ്പോള് ഒരുപാട് സന്തോഷം തോന്നി.
കാലം കാത്തു വെക്കുന്ന ചില കൗതുകങ്ങള് ഉണ്ട് അച്ഛനൊപ്പമുള്ള പേരില്ലാത്ത കഥാപാത്രത്തില് നിന്നും മകന് 'കുമാരാ' എന്നു നീട്ടി വിളിക്കുന്ന തലയെടുപ്പുള്ള കഥാപാത്രത്തിലേക്കുള്ള വളര്ച്ച. അഭിമാനം രമേഷേട്ടാ
