സെഹോര്: പരമ്പരാഗത ഹിന്ദു ആചാരങ്ങള് മാറ്റിവെച്ച് ഭരണഘടന വായിച്ച് ഒരു വിവാഹം. മധ്യപ്രദേശിലെ സെഹോറില് നിന്നുള്ള ദമ്പതികളാണ് വേറിട്ട വിവാഹം നടത്തിയത്. വിവാഹത്തില് പങ്കെടുക്കാനെത്തിയ അതിഥികളും ഭരണഘടന വായിച്ചു. ഫെബ്രുവരി 16നായിരുന്നു വിവാഹം.
ആഘോഷപൂര്വ്വമായ വിവാഹഘോഷയാത്രയ്ക്കും മാറ്റമുണ്ടായിരുന്നു. ഭരണഘടനയും കയ്യില് പിടിച്ചായിരുന്നു വരന് വിവാഹവേദിയിലേക്ക് എത്തിയത്. വരനും വധുവും ഭരണഘടനയില് പിടിച്ച് പ്രതിജ്ഞയെടുത്തു. മുതിര്ന്ന അംഗം പ്രതിജ്ഞ ചൊല്ലിക്കെടുത്തു. അതിഥികളും പ്രതിജ്ഞ ചൊല്ലുകയും ഭരണഘടന പാലിക്കുമെന്നും പ്രതിജ്ഞയെടുത്തു.
ഭരണഘടനയില് പറഞ്ഞിരിക്കുന്ന ആദര്ശങ്ങള് പരിപാലിക്കുന്നതില് ജനങ്ങള് അതേകുറിച്ച് അറിഞ്ഞിരിക്കേണ്ടത് അനിവാര്യമാണെന്നായിരുന്നു വരന്റെ സഹോദരന് ഇതേകുറിച്ച് പ്രതികരിച്ചത്. പൗരത്വ നിയമ ഭേദഗതിക്കെതിരെ രാവജ്യവ്യാപകമായി നടന്ന സമരങ്ങളിലും ഭരണഘടനയുടെ ആമുഖം വായിച്ചുള്ള പ്രതിഷേധം അരങ്ങേറിയിരുന്നു.
വാലന്റൈന്സ് ദിനമായ 14നും വേറിട്ട വിവാഹം രാജ്യത്ത് നടന്നിരുന്നു. പശ്ചിമ ബംഗാളിലെ ഐ.എ.എസ് ഓഫീസറായ തുഷാര് സിംയും ഐ.പി.എസ് ഓഫീസറായ നവ്ജ്യോതി സിമിയും ഓഫീസില് വച്ചാണ് വിവാഹിതരായത്. തിരക്കേറിയ ജോലിക്കിടെ ആഘോഷമായ വിവാഹത്തിന് സമയമില്ലാത്തതിനാലാണ് ഓഫീസിനുള്ളില് വിവാഹം നടത്തിയത്. 2021ല് പശ്ചിമ ബംഗാള് നിയമസഭാ തെരഞ്ഞെടുപ്പ് കഴിഞ്ഞ ശേഷം സുഹൃത്തുക്കള്ക്കും കുടുംബാംഗങ്ങള്ക്കുമായി വിപുലമായ വിരുന്ന് ഒരുക്കുമെന്നും ഇവര് പറയുന്നു.
