മലയാളത്തില് ഹിറ്റുകള് സമ്മാനിച്ച തിരക്കഥാകൃത്താണ് സച്ചി. അടുത്തിടെ സച്ചിയുടെ തിരക്കഥയില് ഇറങ്ങിയ മലയാള ചിത്രങ്ങളായ ഡ്രൈവിംഗ് ലൈസന്സും, അയ്യപ്പനും കോശിയും സൂപ്പര് ഹിറ്റുകളായിരുന്നു. രണ്ട് ചിത്രത്തിലും പൃഥ്വിരാജായിരുന്നു താരം. ഡ്രൈവിംഗ് ലൈസന്സില് പൃഥ്വിക്കൊപ്പം സുരാജും, അയ്യപ്പനും കോശിയില് പൃഥ്വിക്കൊപ്പം ബിജു മേനോനും നായകന്മാരായി.
സൂപ്പര് സ്റ്റാറും അയാളുടെ ആരാധകനുമായിരുന്നു ഡ്രൈവിംഗ് ലൈസന്സിലെ കേന്ദ്രകഥാപാത്രങ്ങള്. സൂപ്പര് സ്റ്റാര് ആയത് പഥ്വിരാജും ആരാധകന് ആയത് സുരാജും ആയിരുന്നു. എന്നാല് പൃഥ്വി ഈ ചിത്രത്തിലേക്ക് വരുന്നതിന് മുന്പ് തന്റെ ആ കഥാപാത്രമാകേണ്ടിയിരുന്നത് മമ്മൂട്ടി ആയിരുന്നുവെന്ന് തുറന്നു പറയുകയാണ് സച്ചി പറയുന്നു. പ്രമുഖ മാധ്യമത്തിന് നല്കിയ അഭിമുഖത്തിലാണ് ഇതേ കുറിച്ച് സച്ചി തുറന്നു പറഞ്ഞത്.
'' ഡ്രൈവിംഗ് ലൈസന്സിന്റെ തുടക്കത്തില് ആലോചിച്ചിരുന്നത് മമ്മൂക്കയെ ആണ്. കാരണം, ഡ്രൈവിംഗ് ക്രേസി ആയിട്ടുള്ള നടന്, സൂപ്പര് സ്റ്റാര് എന്നിങ്ങനെയൊക്കെയുള്ള ഘടകങ്ങളുണ്ടായിരുന്നു. മമ്മൂക്കയ്ക്ക് അവസാന ഭാഗത്തുണ്ടായ ചില കണ്ഫ്യൂഷന്സ് ഉണ്ടായിരുന്നു. അത് അദ്ദേഹത്തിന്റെ ഭാഗത്തു നിന്നു നോക്കിയാല് 100 ശതമാനം ശരിയാണ്. സിനിമ കണ്ടുകൊണ്ടിരിക്കുമ്പോള് ഹരീന്ദ്രന് എന്ന കഥാപാത്രത്തെ മറന്ന് എല്ലാവരും മമ്മൂക്കയുടെ പിറകെ പോകും. അങ്ങനെ കഥാപാത്രം മുങ്ങി പോവുകയും നടന് ഉയര്ന്നു വരികയും ചെയ്യും.
അവിടെ മമ്മൂട്ടിക്ക് ഡ്രൈവിംഗ് ലൈസന്സ് ഇല്ലാതെ അതിനു വേണ്ടി ഇത്രയും സ്ട്രഗിള് ചെയ്യുന്നു എന്നുവരുമ്പോള് പ്രേക്ഷകര്ക്ക് അത് വിശ്വാസയോഗ്യമാകില്ല. അതുകൊണ്ടാണ് ഇതിനിങ്ങനെ ഒരു കുഴപ്പമുണ്ടെന്ന് മമ്മൂക്ക പറഞ്ഞത്. മമ്മൂക്കയെ വച്ച് സിനിമ ചെയ്യണമെന്ന് ഉറപ്പായും എനിക്ക് ആഗ്രഹമുണ്ട്. അത്രയധികം നമ്മളെ സ്വാധീനിച്ച നടന്, അത് മോഹന്ലാല് ആയാലും. അങ്ങനെയുള്ളവരെ വച്ച് ഒരു സിനിമ ചെയ്യുമ്പോള് അവര് ചെയ്ത കഥാപാത്രങ്ങളില് നിന്ന് വ്യത്യസ്മായ ഒന്നുവേണം. അവര് രണ്ടുപേരും ചെയ്യാത്ത കഥാപാത്രങ്ങള് ഇല്ലെങ്കിലും വ്യത്യസ്തമായ കഥാപരിസരമെങ്കിലും ഉണ്ടാകണമെന്ന് ആഗ്രഹമുണ്ട്. '' - സച്ചി പറയുന്നു.
