ഭോപ്പാല്: കോണ്ഗ്രസ് നേതാവായ ജ്യോതിരാദിത്യ സിന്ധ്യേ ബിജെപിയില് ചേക്കേറിയതിന് പിന്നാലെ കോണ്ഗ്രസും ബിജെപിയും എംഎല്എ മാരെ മുക്കുന്നു. കൂടുതല് അടിയൊഴുക്കുകള് ഒഴിവാക്കാന് മദ്ധ്യപ്രദേശില് നിന്നും സ്വന്തം എംഎല്എ മാരെ മറ്റ് സംസ്ഥാനങ്ങളിലേക്ക് മാറ്റി. തങ്ങളുടെ സര്ക്കാരുള്ള ഹരിയാനയിലേക്കും കര്ണാടകയിലേക്കും ബിജെപി എംഎല്എ മാരെ മാറ്റിയപ്പോള് കോണ്ഗ്രസ് രാജസ്ഥാനിലേക്കാണ് ബാക്കിയുള്ളവരെ മാറ്റിയിരിക്കുന്നത്.
കമല്നാഥ് സര്ക്കാരിനെ വെട്ടിലാക്കി കോണ്ഗ്രസ് വിട്ട ജ്യോതിരാദിത്യ സിന്ധ്യേ ഇന്നലെ ബിജെപി അംഗത്വം സ്വീകരിച്ചിരുന്നു. സിന്ധ്യേയ്ക്ക് പിന്നാലെ പോയ കോണ്ഗ്രസ് എംഎല്എ മാരുടെയും സ്ഥാനം പുറത്താകുമെന്ന് കോണ്ഗ്രസ് മുന്നറിയിപ്പും നല്കിയിട്ടുണ്ട്. എന്നാല് സിന്ധേയ്ക്കൊപ്പം നില്ക്കുന്ന എംഎല്എ മാരും നേതാവിന്റെ പിന്നാലെ ബിജെപിയിലേക്ക് തന്നെയാണെന്ന സൂചനയാണ് നല്കിയത്. തിങ്കളാഴ്ച ബിജെപി ചേരുക ലക്ഷ്യമിട്ട് ഇവര് പ്രത്യേക വിമാനത്തില് ബംഗലുരുവിലേക്ക് പോയതായിട്ടാണ് വിവരം.
സിന്ധ്യേയോട് യോജിപ്പ് പ്രകടമാക്കിയത് 20 ലധികം എംഎല്എ മാരാണ്. ഗുര്ഗോണില് ഒരു റിസോര്ട്ടില് പാര്പ്പിച്ചിരിക്കുന്ന എംഎല്എ മാര്ക്ക് പുറത്ത് നിന്നുള്ള ഇടപെടല് ഉണ്ടാകാതിരിക്കാന് ബിജെപി കനത്ത കാവല് ഏര്പ്പെടുത്തുകയും ചെയ്തിട്ടുണ്ട്. കോണ്ഗ്രസ് ജെയ്പൂരിലേക്കാണ് തങ്ങളുടെ എംഎല്എ മാരെ മാറ്റിയിരിക്കുന്നത്. ബംഗലുരുവിലേക്ക് പറന്നിരിക്കുന്ന വിമതരുമായി ബന്ധപ്പെട്ടെന്നും ഇവരില് ഭൂരിപക്ഷം പേരും തിരിച്ചുവരാന് ഒരുക്കമാണെന്ന് അറിയിച്ചതായും കോണ്ഗ്രസ് നേതാവ് ഡികെ ശിവകുമാര് പറയുന്നു. തങ്ങളെ സിന്ധ്യേ നിര്ബ്ബന്ധപൂര്വ്വം രാജിവെപ്പിച്ചതാണെന്ന് മന്ത്രിമാര് പറഞ്ഞതായി കമല്നാഥിനോട് അടുപ്പമുള്ളവരും ആരോപിക്കുന്നു.
എന്നാല് സിന്ധ്യേയ്ക്ക് ഒപ്പം തന്നെ നില്ക്കുമെന്ന് എംഎല്എ മാര് പറയുന്നതിന്റെ വീഡിയോ ദൃശ്യങ്ങള് പുറത്തുവിട്ടാണ് വിമത എംഎല്എമാര് തിരിച്ചടിച്ചത്. സ്വന്തം ഇഷ്ടപ്രകാരമാണ് കോണ്ഗ്രസ് വിട്ടതെന്നും തുടര്ന്നും സിന്ധ്യേയെ പിന്തുണയ്ക്കുമെന്നും മുന് മന്ത്രിമാര് ഉള്പ്പെടെ ആറ് വിമതരുടെ ഓഡിയോ ക്ളിപ്പുകളും ബിജെപി പുറത്തു വിട്ടിട്ടുണ്ട്. തുള്സി സിലാവത്, ഗോവിന്ദ് സിംഗ് രജ്പുത്, മഹേന്ദ്ര സിംഗ് സിസോദിയ, ഇമാര്ത്തി ദേവി, പ്രഭുറാം ചൗധരി, പ്രദ്യുമ്നാ സിംഗ് തോമാര് എന്നിവരുടെ വീഡിയോ ക്ളിപ്പുകള് കഴിഞ്ഞ ദിവസം സാമൂഹ്യ മാധ്യമങ്ങളിലും ടെലിവിഷന് ചാനലുകളിലും പ്രത്യക്ഷപ്പെട്ടിരുന്നു. സിന്ധ്യേ ബിജെപിയില് അംഗത്വം എടുത്ത ദിവസം തന്നെയാണ് വീഡിയോയും പ്രത്യക്ഷപ്പെട്ടത്.
