ക്വാലലംപൂര്: ലോകം മുഴുവന് കൊറോണാ വൈറസിന്റെ പിടിയില് അമര്ന്നുകൊണ്ടിരിക്കുമ്പോള് നാട്ടിലേക്ക് മടങ്ങാനാകാതെ മലേഷ്യയിലും ഫിലിപ്പീന്സീലും ഇറ്റലിയിലും ഇറാനിലും കുടുങ്ങി മലയാളികള് അടക്കമുള്ള ഇന്ത്യാക്കാര്. കൊറോണയ്ക്ക് എതിരേയുള്ള പോരാട്ടത്തില് മിക്ക രാജ്യങ്ങളും യാത്രാ വിലക്കുകളും വിമാന സര്വ്വീസ് നിര്ത്തി വെയ്ക്കലുകളും നടത്തുമ്പോള് വിമാനത്താവളത്തില് മണിക്കൂറുകളായി കുടുങ്ങിക്കിടക്കുകയാണ് മലയാളികള് ഉപ്പെടെയുള്ള ഇന്ത്യാക്കാര്.
ക്വാലലംപൂര് വിമാനത്താവളത്തില് 20 മണിക്കൂറിലേറെയായി മലയാളികള് ഉള്പ്പെട്ട സംഘം കുടുങ്ങിക്കിടക്കുകയാണ്. ഇവരെ സ്വന്തരാജ്യത്ത് എത്തിക്കുമെന്ന് വിദേശകാര്യമന്ത്രാലയം വ്യക്തമാക്കിയിട്ടുണ്ടെങ്കിലും ഒന്നിനും പരിഹാരമായിട്ടില്ല. യാത്രാവിലക്ക് നില നില്ക്കുന്നതിനാല് വിമാനങ്ങള്ക്ക് ഇവിടെ നിന്നും പുറപ്പെടാനായിട്ടില്ല. ചൊവ്വാഴ്ച ഉച്ചയ്ക്ക് വിമാനത്താവളത്തില് എത്തിയ 400 ഇന്ത്യാക്കാരില് 70 ലധികം പേരും മലയാളികളാണ്. വിശാഖപട്ടണത്തും ഡല്ഹിയിലും ഇവരെ എത്തിക്കാനാണ് നിര്ദേശമെങ്കിലും പ്രതിസന്ധിക്ക് പരിഹാരമായിട്ടില്ല.
ഫിലിപ്പീന്സില് മെഡിക്കല് വിദ്യാര്ത്ഥികള് അടക്കമുള്ളവരാണ് മനിലയില് കുടുങ്ങിയിരിക്കുന്നത്. മനിലയിലെ പെര്പെച്വല് സര്വകലാശാലയില് നിന്നുള്ള 400 എംബിബിഎസ് വിദ്യാര്ത്ഥികളാണ് കുടുങ്ങിക്കിടക്കുന്നത്. ഇവരില് മലയാളികളും ഉണ്ട്. വൈറസ്ബാധയുടെ സാഹചര്യത്തില് ഫിലിപ്പീന്സ് സര്ക്കാര് വിമാന സര്വീസുകള് റദ്ദാക്കിയതോടെ നേരത്തേ ടിക്കറ്റ് ബുക്ക് ചെയ്തവര്ക്ക് പോലും തിരിച്ചു വരാന് കഴിയാതായി. ഇറ്റലിയിലും ഇന്ത്യാക്കാര് കുടുങ്ങിക്കിടക്കുകയാണ്.
അതിനിടയില് സ്ഥിതി രൂക്ഷമായ ഇറ്റലിയില് നിന്നും ഇന്ത്യാക്കാരെ മടക്കി കൊണ്ടുവരാന് ഇറ്റലിയിലെ ഇന്ത്യന് എംബസി നടപടികള് സ്വീകരിച്ചതായി വിവരമുണ്ട്. ഇവരുടെ കോവിഡ് പരിശോധനയ്ക്കുള്ള സാമ്പിള് ശേഖരണം നടത്തിയ ഫലം ഉടന് പുറത്തുവരും. 300 ഇന്ത്യന് വിദ്യാര്ത്ഥികളാണ് ഇറ്റലിയില് കുടുങ്ങി കിടക്കുന്നത്. സ്പെയിനിലും ഇറ്റലിയിലും മരണനിരക്ക് ഉയരുന്ന സാഹചര്യത്തില് യൂറോപ്യന് യൂണിയന് സമ്പൂര്ണ്ണ പ്രവേശന വിലക്ക് ഏര്പ്പെടുത്തിയിട്ടുണ്ട്.
ഇറാനിലുള്ള 254 ഇന്ത്യാക്കാര്ക്കാണ് കൊറോണ സ്ഥിരീകരിച്ചിരിക്കുന്നത്. ലഡാക്കില് നിന്നും ഇറാനിലേക്ക് പോയ തീര്ത്ഥാടകരാണ് ഇവര്. 850 പേരില് 200 ഓളം പേരെ നേരത്തേ തന്നെ തിരിച്ചയച്ചിരുന്നു. എന്നാല് വിദേശകാര്യ മന്ത്രാലയം വാര്ത്ത ഇപ്പോള് സ്ഥിരീകരിക്കാന് കഴിയില്ലെന്ന നിലപാടാണ് എടുത്തത്. മലേഷ്യ, ഫിലിപ്പീന്സ്, അഫ്ഗാനിസ്ഥാന് എന്നിവിടങ്ങളില് നിന്നുള്ള വിദേശികള്ക്ക് ഇന്ത്യ തല്ക്കാലം യാത്രാവിലക്ക് ഏര്പ്പെടുത്തിയിട്ടുണ്ട്. രാജ്യത്ത് കോവിഡ് 19 രണ്ടാംഘട്ടത്തിലേക്ക് കടന്നിരിക്കെ കടുത്ത നടപടികളാണ് സ്വീകരിച്ചിരിക്കുന്നത്. മൂന്നാംഘട്ടത്തിലേക്ക് കടന്നാല് നിയന്ത്രിക്കാന് കഴിയാതെ വരുമെന്നാണ് ആശങ്ക.
