കൊല്ക്കത്ത: കോവിഡ് 19നെ പ്രതിരോധിക്കാന് ഗോമൂത്രമാണ് ഏറ്റവും മികച്ച ഔഷദമെന്ന തരത്തിലുള്ള പ്രചാരണങ്ങള് പലയിടങ്ങളിലായി നടന്നുവരുന്നുണ്ട്. എന്നാലിത് തികച്ചും അശാസ്ത്രീയമായ വാദമാണെന്നും അപകടകരമായ പ്രചാരണമാണെന്നും ചൂണ്ടിക്കാട്ടി പലതവണ ആരോഗ്യ രംഗത്ത് നിന്നുള്ളവര് രംഗത്തെത്തിയിരുന്നു. ഇതിന് ശേഷവും ഇത്തരം അടിസ്ഥാനമില്ലാത്ത പ്രചാരണങ്ങള് തുടരുകതന്നെയാണ്. ഹിന്ദുമഹാസഭ ഒരു ഗോ മൂത്രസത്കാരം തന്നെ സംഘടിപ്പിക്കുകയുണ്ടായി.
സമാനമായി കൊല്ക്കത്തയിലും പശുവിനെ ആരാധിക്കുന്നതിന്റെ പ്രാധാന്യം ഉയര്ത്തിക്കാണിക്കാന് വേണ്ടി നടത്തിയ ഒരു പരിപാടിയില് ഗോമൂത്രം വിതരണം ചെയ്തിരുന്നു. ബിജെപിയുടെ പ്രാദേശിക നേതാക്കളും പ്രവര്ത്തകരും ചേര്ന്നായിരുന്നു ഈ പരിപാടി സംഘടിപ്പിച്ചത്.
എന്നാല് ഈ പരിപാടിക്കിടെ ഗോമൂത്രം കഴിച്ചൊരാള്ക്ക് പിന്നീട് ദേഹാസ്വാസ്ഥ്യം അനുഭവപ്പെടുകയായിരുന്നു. ഇദ്ദേഹത്തിന്റെ ആരോഗ്യ നില തൃപ്തികരമെന്നാണ് സൂചന. ഗോമൂത്രം കുടിച്ചതിന് ശേഷം ഉദരസംബന്ധമായ പ്രശ്നം നേരിടുകയും തുടര്ന്ന് അവശനായതോടെ ആശുപത്രിയില് ചികിത്സ തേടുകയുമായിരുന്നു. തുടര്ന്ന് ഇദ്ദേഹം പരിപാടിക്കെതിരെ പോലീസില് പരാതി നല്കി. പോലീസ് നടത്തിയ അന്വേഷണത്തിനൊടുവിലാണ് ബിജെപി പ്രവര്ത്തകന് അറസ്റ്റിലായത്.
ജൊറസാഖോ സ്വദേശിയായ നാരായണ് ചാറ്റര്ജി എന്ന 40 കാരനാണ് അറസ്റ്റിലായിരിക്കുന്നത്. അതേസമയം അറസ്റ്റില് ബിജെപിയുടെ പ്രാദേശിക ഘടകം പ്രതിഷേധം രേഖപ്പെടുത്തിയിട്ടുണ്ട്. നാരായണ് ചാറ്റര്ജി ആരേയും നിര്ബന്ധിപ്പിച്ച് ഗോമൂത്രം കഴിപ്പിച്ചിട്ടില്ലെന്നും അതിന്റെ ഗുണങ്ങള് വിവരിച്ച ശേഷം വിതരണം ചെയ്യവേ പരാതിക്കാരന് സ്വമേധയാ വന്ന് കുടിച്ചതാണെന്നും ബിജെപി വക്താവ് സയന്തന് ബസു പറയുന്നു.
