തിരുവനന്തപുരം: അതിഥി തൊഴിലാളികള്ക്കടക്കം ഭക്ഷണം നല്കാന് സര്ക്കാരും തദ്ദേശ ഭരണ സ്ഥാപനങ്ങളും സന്നദ്ധ സംഘടനകളും മറ്റും ചേര്ന്ന് ആരംഭിച്ച സമൂഹ അടുക്കളകള് പലയിടത്തും തലവേദനയാകുന്നു. ആലപ്പുഴ ജില്ലയിലെ ഒരു കമ്യൂണിറ്റി കിച്ചനില് ഭക്ഷണം നാലിലൊന്നായി കുറയ്ക്കേണ്ടിവന്നു. തൃക്കുന്നപ്പുഴ പഞ്ചായത്തിലെ അടുക്കള പൂട്ടി.
ഇതുതന്നെയാണ് എറണാകുളത്തും ചിലയിടങ്ങളി-ലെ സ്ഥിതി. ചില സ്ഥലങ്ങളില് പോലീസ് ഇടപെട്ട് ഭക്ഷണസാധനങ്ങള് എത്തിക്കുന്നതുകൊണ്ട് പാചകം നടക്കുന്നു. പത്തനംതിട്ടയിലെ സ്ഥിതിയും വ്യത്യസ്തമല്ല.തുടക്കത്തിലെ ആവേശം ചോര്ന്നുപോയതായാണ് പല കേന്ദ്രങ്ങളില്നിന്നുമുള്ള റിപ്പോര്ട്ട്. എല്ലാവര്ക്കും വേണ്ട ഭക്ഷണം നല്കുന്നതിനു സാധനങ്ങള് ലഭിക്കാത്തതാണ് മറ്റൊരു പ്രശ്നം. ഭക്ഷണം നല്കിയിട്ടും അതിഥി തൊഴിലാളികളടക്കം അതില് തൃപ്തരുമല്ല. ഭക്ഷണത്തിനുപകരം ചില സ്ഥലങ്ങളില് കിറ്റ് പരീക്ഷിച്ചിട്ടുണ്ട്. പക്ഷേ, അതില് പാചകത്തിനാവശ്യമുള്ള സാധനങ്ങളില്ലെന്ന പരാതി ഉയര്ന്നു. കിറ്റുകള് തീരുന്ന മുറയ്ക്കു കിട്ടുമെന്ന കാര്യത്തില് സംഘാടകര് ഉറപ്പൊന്നും നല്കുന്നുമില്ല.
കാസര്ഗോട്ട് സമൂഹ അടുക്കള ഒഴിയണമെന്ന് കെട്ടിടം ഉടമ ആവശ്യപ്പെട്ടത് അധികൃതരെ അങ്കലാപ്പിലാക്കി. ഉടമ ഭീഷണിപ്പെടുത്തുന്നെന്ന് ആരോപിച്ച് അതിഥി തൊഴിലാളികള്ക്കിടയില് സന്ദേശങ്ങള് പ്രചരിക്കുന്നുണ്ട്. ഈ സന്ദേശങ്ങള് അവര് നാട്ടിലേക്കയച്ചാല് അവിടെയുള്ള മലയാളികള്ക്ക് ഭീഷണിയാകുമെന്ന ഭയവുമുണ്ട്. അതിനിടയില് പ്രവാസികള് നാട്ടിലേക്ക് മടങ്ങിയെത്തിയാലുണ്ടാകുന്ന പ്രതിസന്ധികള് തരണം ചെയ്യാന് സംസ്ഥാന സര്ക്കാര് തിരക്കിട്ട് പദ്ധതികള് ഒരുക്കവേ ആലപ്പുഴയില് കായല്പ്പരപ്പില് ഐസൊലേഷന് കേന്ദ്രങ്ങളൊരുങ്ങുന്നു. രണ്ടായിരത്തോളം ആളുകളെ പാര്പ്പിക്കാന് ഹൗസ് ബോട്ടുകളാണ് സജ്ജമാക്കുന്നത്.
രാജ്യത്താദ്യമായി ജലയാനങ്ങളില് കോവിഡ് കെയര് സെന്റര് ഒരുക്കുന്നുവെന്ന പ്രത്യേകതയുമുണ്ട്. ഇതിന്റെ വെല്ലുവിളികള് എന്തെല്ലാം എന്നറിയാനായി ആലപ്പുഴ ജില്ലാ ഭരണകൂടം ഇന്നലെ സംഘടിപ്പിച്ച മോക്ക് ഡ്രില് വിജയകരമായതോടെ തുടര്നടപടികളിലേക്ക് കടക്കുകയാണ്. ആവശ്യമായി വന്നാല് കൂടുതല് പേരെ ഐസൊലേഷനില് പാര്പ്പിക്കാനാണ് ഹൗസ് ബോട്ടുകളില് പ്രത്യേക സൗകര്യങ്ങളോടെ മുറികള് സജ്ജമാക്കുന്നതെന്ന് ജില്ലാ കലക്ടര് എം. അഞ്ജന പറഞ്ഞു.
പുന്നമട ഫിനിഷിങ് പോയിന്റിലും സമീപത്തുമായി ഹൗസ് ബോട്ടുകള് ഒരുമിച്ച് പാര്ക് ചെയ്താണ് ഐസൊലേഷന് മുറികള് ഒരുക്കുന്നത്. ആദ്യ ഘട്ടത്തില് 140 ഹൗസ് ബോട്ടുകളാണ് ഒരുക്കിയിട്ടുള്ളത്. ആവശ്യമെങ്കില് എഴുനൂറോളം ഹൗസ് ബോട്ടുകളില് ഐസൊലേഷന് മുറികള് ഒരുക്കും. 1500 മുതല് 2000 വരെ ആളുകളെ പാര്പ്പിക്കാം.
