റിയാദ്: കോവിഡ് 19 പ്രതിസന്ധിയെ തുടര്ന്ന് അസംസ്കൃത എണ്ണ വിലയില് വന് ഇടിവ്. ഇപ്പോള് അസംസ്കൃത എണ്ണ വില ബാരലിന് 18.2 ഡോളറാണ്. ഇതേത്തുടര്ന്നു ലോകത്തെ ഏറ്റവും വലിയ എണ്ണ ഉല്പ്പാദക കമ്പനിയായായ സൗദി അരാംകോ മേയ് ഒന്ന് മുതല് എണ്ണ ഉല്പ്പാദനം 85 ലക്ഷം ബാരലായി കുറയ്ക്കും .
കുറഞ്ഞ നിലയിലേക്ക് അസംസ്കൃത എണ്ണ വില കൂപ്പുകുത്തിയതിനെ തുടര്ന്ന് മേയ്, ജൂണ് മാസങ്ങളില് പ്രതിദിന ഉല്പാദനത്തില് 97 ലക്ഷം ബാരലിന്റെ വീതം കുറവ് വരുത്തുന്നതിന് ഒപെക് പ്ലസ് ഗ്രൂപ്പ് ധാരണയിലെത്തിയിരുന്നു. ഇതിന്റെ അടിസ്ഥാനത്തിലാണ് അരാംകോയും ഉല്പ്പാദനത്തില് കുറവ് വരുത്തുന്നത് .
കോവിഡ് -19 െവെറസ് വ്യാപനത്തിന്റെ പശ്ചാത്തലത്തില് ആഗോള തലത്തില് എണ്ണയാവശ്യം കുത്തനെ കുറഞ്ഞതോടെ വിപണിയിലെ അമിത ലഭ്യത കുറയ്ക്കുകയെന്ന ലക്ഷ്യത്തോടെയാണ് ഒപെക് പ്ലസ് ഗ്രൂപ്പ് ഉല്പാദനം വന്തോതില് വെട്ടിക്കുറയ്ക്കുന്നത്.
സൗദി ഊര്ജ മന്ത്രി അബ്ദുല് അസീസ് ബിന് സല്മാന് രാജകുമാരനും റഷ്യന് ഊര്ജ മന്ത്രി അലക്സാണ്ടര് നൊവാകും കഴിഞ്ഞ ദിവസം ഇതു സംബന്ധിച്ച് ഫോണില് ചര്ച്ച നടത്തിയിരുന്നു. എണ്ണ വിപണിയില് സ്ഥിരതയുണ്ടാക്കുന്നതിന് അനിവാര്യമെങ്കില് ഒപെക് പ്ലസ് ഗ്രൂപ്പിലെ മറ്റു രാജ്യങ്ങളുമായി ചേര്ന്നു കൂടുതല് നടപടി സ്വീകരിക്കുന്നതിന് സൗദി അറേബ്യയും റഷ്യയും ഒരുക്കമാണെന്നു ചര്ച്ചക്കു ശേഷം പുറത്തിറക്കിയ സംയുക്ത പ്രസ്താവനയില് വ്യക്തമാക്കി.
എണ്ണ വില ഇടിയുന്നതോടെ എണ്ണ ഉത്പാദക രാജ്യങ്ങളുടെ പ്രധാന വരുമാനവും ഇടിയുകയാണ്. എണ്ണ വിലയിലെ തകര്ച്ച എണ്ണ ഉത്പാദിപ്പിയ്ക്കുന്ന രാജ്യങ്ങള്ക്ക് 50 കോടി ഡോളറിന്റെ നഷ്ടമാണ് ദിനംപ്രതി ഉണ്ടാക്കുന്നത്.
