റിയല് എസ്റ്റേറ്റ് അപ്പലേറ്റ് അതോറിറ്റി അധ്യക്ഷനായി റിട്ട. ജസ്റ്റിസ് പി ഉബൈദിനെ നിയമിച്ച സംഭവത്തില് പ്രതികരണവുമായി രാഷ്ട്രീയ നിരീക്ഷകനും അഭിഭാഷകനുമായ എ ജയശങ്കര്. പരിഹാസ രൂപേണയായിരുന്നു ജയശങ്കറിന്റെ പ്രതികരണം. റിയല് എസ്റ്റേറ്റ് അപ്പലേറ്റ് അതോറിറ്റി അധ്യക്ഷനായി റിട്ട. ജസ്റ്റിസ് പി ഉബൈദിനെ നിയമിച്ചതില് യാതൊരു വിധ ബാഹ്യ പരിഗണനയും ഉണ്ടായിട്ടില്ല. ലാവലിന് കേസില് നിന്ന് പിണറായി വിജയനെ ഒഴിവാക്കിയതിന്റെ പ്രതിഫലമോ പ്രത്യുപകാരമോ അല്ല ഈ നിയമനം.- ജയശങ്കര് ഫേസ്ബുക്കില് കുറിച്ചു.
ഫേസ്ബുക്ക് കുറിപ്പിന്റെ പൂര്ണരൂപം;
ഉദ്ദിഷ്ട കാര്യത്തിന് ഉപകാര സ്മരണയല്ല. (ഒരിക്കലും അല്ല).
റിയല് എസ്റ്റേറ്റ് അപ്പലേറ്റ് അതോറിറ്റി അധ്യക്ഷനായി റിട്ട. ജസ്റ്റിസ് പി ഉബൈദിനെ നിയമിച്ചതില് യാതൊരു വിധ ബാഹ്യ പരിഗണനയും ഉണ്ടായിട്ടില്ല. ലാവലിന് കേസില് നിന്ന് പിണറായി വിജയനെ ഒഴിവാക്കിയതിന്റെ പ്രതിഫലമോ പ്രത്യുപകാരമോ അല്ല ഈ നിയമനം.
അപ്പലേറ്റ് അതോറിറ്റി അധ്യക്ഷ സ്ഥാനത്തേക്ക് റിട്ടയേഡ് ജഡ്ജിമാരായ കെപി ജ്യോതീന്ദ്രനാഥ്, എഎം ബാബു, പി ഉബൈദ്, ആനി ജോണ് എന്നിവരുടെ പേരുകളാണ് ബഹു ഹൈക്കോടതി നിര്ദ്ദേശിച്ചത്. ഇവരില് നിന്ന് ഒരാളെ നിയമിക്കാന് സര്ക്കാരിന് പരിപൂര്ണ്ണ അധികാരമുണ്ട്.
നിഷ്പക്ഷത, നീതിബോധം, നിയമപരിജ്ഞാനം, സാമൂഹിക പ്രതിബദ്ധത എന്നീ സദ്ഗുണങ്ങളാണ് സര്ക്കാര് പരിഗണിച്ചത്. നലമുള്ളൊരു നവഗുണ പരിമളനാണ് ജസ്റ്റിസ് ഉബൈദ്. അദ്ദേഹത്തിന്റെ മഹത്വത്തിനു മുന്നില് മറ്റു മൂന്നു പേരും നിഷ്പ്രഭരായിപ്പോയി. അങ്ങനെ നിയമന ഉത്തരവ് പുറത്തിറങ്ങി.
ചീഫ് ജസ്റ്റിസായിരുന്ന രഞ്ജന് ഗൊഗോയിയെ രാഷ്ട്രപതി രാജ്യസഭയിലേക്ക് നാമനിര്ദ്ദേശം ചെയ്തതും ഉബൈദിന്റെ ഉദ്യോഗ ലബ്ധിയുമായി ആരും തുലനം ചെയ്യരുത്. അതും ഈ കൊറോണക്കാലത്ത് ഒരിക്കലും പാടില്ല.
