സാവോ പോളോ: അസഹനീയമായ നടുവേദനയുമായി ആശുപത്രിയില് ചികിത്സയ്ക്കെത്തിയ യുവാവിന്റെ സിടി സ്കാന് ഫലം കണ്ട് ശരിക്കും ഞെട്ടിയത് ഡോക്ടര്മാരായിരുന്നു. യുവാവിന് രണ്ട് വൃക്കകള്ക്ക് പകരം മൂന്ന് വൃക്കകള്!
ബ്രസീലിലെ സാവോ പോളോയിലെ ഡോ റിം ആശുപത്രിയിലാണ് സംഭവം. 38കാരനാണ് ചികിത്സ തേടി ഇവിടെയെത്തിയത്. നടുവ് വേദനയുടെ കാരണം കണ്ടെത്തുന്നതിനായി ഡോക്ടര്മാര് ഇയാളെ സിടി സ്കാനിന് വിധേയമാക്കി. ഇയാള് ഡിസ്ക് സ്ഥാനംതെറ്റിയ അവസ്ഥയിലാണെന്നും സാധാരണ ഗതിയിലുള്ള രണ്ട് കിഡ്നികള്ക്കൊപ്പം ഇടതുഭാഗത്ത് മുകളിലായി മറ്റൊരു കിഡ്നി കൂടിയൂണ്ടെന്നും കണ്ടെത്തി.
എന്നാല് ഇയാളില് വൃക്ക സംബന്ധമായ ഒരു രോഗലക്ഷണവുമുണ്ടായിരുന്നില്ല. ആ വൃക്കയും സാധാരണ രീതിയില് പ്രവര്ത്തിക്കുകയും ചെയ്തിരുന്നു. വൃക്കകളില് നിന്നും മൂത്രനാളി വഴി മൂത്രാശയത്തിലേക്ക് ബന്ധിപ്പിക്കുന്ന രണ്ട് സാധാരണ വൃക്കകള്ക്കൊപ്പം മൂത്രനാളിയിലേക്ക് ബന്ധിച്ചിരിക്കുന്ന അവസ്ഥയിലാണ് മൂന്നാമത്തെ വൃക്കയും. ദി ന്യൂ ഇംഗ്ലണ്ട് ജേര്ണല് ഓഫ് മെഡിസിന് ആണ് ഈ റിപ്പോര്ട്ട് പുറത്തുവിട്ടത്.
മൂന്നാമത്തെ വൃക്ക നീക്കം ചെയ്യണമെന്നോ മറ്റ് ചികിത്സ വേണമെന്നോ യുവാവ് ആവശ്യപ്പെട്ടില്ല. ഇതേതുടര്ന്ന് ഇദ്ദേഹത്തിന് വേദനസംഹാരികളും മറ്റും നല്കുക മാത്രമാണ് ചെയ്തതെന്ന് ഡോക്ടര്മാര് വ്യക്തമാക്കി.
മൂന്നു വൃക്കകള് ഉണ്ടായിരിക്കുക എന്നത് അപൂര്വ്വ സംഭവമാണ്. വൈദ്യശാസ്ത്ര രംഗത്ത് ഇതുവരെ നൂറില് താഴെ പേര്ക്കാണ് ഇത്തരം അവസ്ഥ ഉണ്ടായിരുന്നതെന്ന് 2013ല് പുറത്തിറങ്ങിയ ദ ഇന്റര്നെറ്റ് ജേര്ണല് ഓഫ് റേഡിയോളജി വ്യക്തമാക്കുന്നു.
