മുംബൈ: ആര്തര്റോഡ് ജയിലിന് പിന്നാലെ ബൈക്കുള വനിതാ ജയിലിലും കോവിഡ് ഭീതിയില്. ഒരു തടവുകാരിക്കും ഒരു ഡോക്ടര്ക്കും പരിശോധന പോസിറ്റീവാണെന്ന് കണ്ടെത്തി. 54 കാരിയായ തടവുകാരിക്കാണ് കോവിഡ് സ്ഥിരീകരിച്ചിരിക്കന്നത്. ഇവര്ക്ക് പിന്നാലെ ഒരു മെഡിക്കല് ഓഫീസറുടെ സാമ്പിള് പരിശോധനയും പോസിറ്റീവായിരിക്കുകയാണ്. ഇരുവരെയും ആശുപത്രിയില് പ്രവേശിപ്പിച്ചിരിക്കുകയാണ്.
മുംബൈയിലെ ആര്തര് റോഡിലെ സെന്ട്രല് ജയിലില് 77 തടവുകാര്ക്കും 26 ജയില് ജീവനക്കാര്ക്കും കോവിഡ് സ്ഥിരീകരിച്ചത് വലിയ വാര്ത്തയായിരുന്നു. കോവിഡ് വ്യാപനം തുടരുന്നതിനിടയില് മഹാരാഷ്ട്രയിലെ ജയിലുകള് എത്രമാത്രം സുരക്ഷിതമാണെന്ന ചര്ച്ച ഉയര്ന്നപ്പോള് ഇക്കാര്യം ശ്രദ്ധയിലുണ്ടെന്നാണ് മഹാരാഷ്ട്ര നല്കിയ മറുപടി. എന്നാല് ഈ വാദങ്ങള് തള്ളിയാണ് കോവിഡ് വ്യാപനം സംഭവിച്ചിരക്കുന്നത്.
ആദ്യ പരിശോധനയില് നെഗറ്റീവ് ആയ 54 കാരിയിലാണ് രോഗം രണ്ടാമത്തെ ടെസ്റ്റില് സ്ഥിരീകരിച്ചത്. കടുത്ത ശ്വാസോച്ഛ്വാസ പ്രശ്നം ഇവരില് കണ്ടതോടെയാണ് പരിശോധന നടത്തിയത്.
വനിതാ തടവുകാരുടെ എണ്ണം വളരെ കൂടുതലായ ജയിലാണ് ബൈക്കുള. 200 പേരാണ് ശേഷിയെങ്കിലും പാര്പ്പിച്ചിരിക്കുന്നത് 352 പേരെയാണ്. എല്ഗാര് പരിക്ഷത്ത് കേസില് പങ്ക് ആരോപിക്കപ്പെട്ട് യുഎപിയ ചുമത്തപ്പെട്ട മനുഷ്യാവകാശ പ്രവര്ത്തകയും അഭിഭാഷകയുമായ സുധ ഭരദ്വാജ്, നാഗ്പൂര് സര്വകലാശാലയില് നിന്നും വിരമിച്ച പ്രൊഫസര് ഷോമ സെന് ഉള്പ്പെടെയുള്ളവര് ഈ ജയിലിലാണ്.
സ്ത്രീകള്ക്കായുള്ള ജയിലാണെങ്കിലും നിസ്സാര കുറ്റങ്ങള് ചുമത്തപ്പെട്ട പുരുഷ തടവുകാരെയും പാര്പ്പിക്കുന്നുണ്ട്. ജയിലില് തടവുകാരായ അമ്മമാരുടെ 26 കുട്ടികളും ഇവിടെയുണ്ട്. ആറ് വയസ്സുവരെ പ്രായമുള്ള ഇവരുടെ കാര്യത്തില് ആശങ്ക ഏറുകയാണ്. ഇവരെ അമ്മമാരോടൊപ്പം പ്രത്യേക വാര്ഡിലാക്കിയിട്ടുണ്ട്.
നിയമം അനുസരിച്ച് ആറ് വയസ്സുവരെയാണ് കുട്ടികള്ക്ക് മാതാവിനൊപ്പം ജയിലില് കഴിയാന് നിയമം അനുവദിക്കുക. എന്നാല് അതിന് ശേഷം കുട്ടിയെ ആരും ഏറ്റെടുക്കാത്ത സാഹചര്യം ഉണ്ടായാല് കുട്ടികളുടെ ഭക്ഷണം, അഭയം, ആരോഗ്യം, വസ്ത്രം, വിദ്യാഭ്യാസം, വിനോദം എന്നിവ ലഭ്യമാകുന്നുണ്ടെന്ന് അധികൃതര് ഉറപ്പാക്കേണ്ടതുണ്ട്. സംസ്ഥാനത്ത് മൊത്തം 60 ജയിലുകളില് ഒരെണ്ണം മാത്രമാണ് സ്ത്രീ തടവുകാര്ക്കായി മാറ്റി വെച്ചിട്ടുള്ളത്.
