ബക്സര്: ബിഹാറില് കോണ്ഗ്രസ് നേതാവും ബക്സര് സദര് എം.എല്.എയുമായ സഞ്ജയ് കുമാര് തിവാരി എന്ന മുന്ന തിവാരിയുടെ കാറില് നിന്ന് മദ്യക്കുപ്പികള് പിടിച്ചെടുത്തു. ബുധനാഴ്ച പോലീസ് മദ്യക്കുപ്പികള് കണ്ടെടുത്ത്. നാലു പേരെ പോലീസ് കസ്റ്റഡിയില് എടുത്തു. കാറില് എം.എല്.എ ഉണ്ടായിരുന്നില്ല. കാറുടമയ്ക്കും അറസ്റ്റിലായ നാലു പേര്ക്കുമെതിരെ കേസെടുത്തതായി ബക്സര് എസ്.പി ഉപേന്ദ്ര നാഥ് ശര്മ്മ അറിയിച്ചു.
അതേസമയം, ലോക്ഡൗണ് കാലത്ത് റേഷന് വിതരണത്തിന് വിട്ടുനല്കിയതാണ് തന്റെ വാഹനമെന്ന് എം.എല്.എ പറയുന്നു. ബുധനാഴ്ച ജഗദീഷ്പുരില് റേഷന് വിതരണത്തിന് കൊണ്ടുപോയതാണ് വാഹനം. സിമ്രി പോലീസ് സ്റ്റേഷന് പരിധിയില് വാഹനം എങ്ങനെയെത്തി എന്നറിയില്ല. റേഷന് വിതരണത്തിന് പോയവരുമായി തനിക്ക് ഇതുവരെ സംസാരിക്കാന് കഴിഞ്ഞിട്ടില്ലെന്നും എം.എല്.എ വ്യക്തമാക്കി.
സംഭവത്തില് അടിയന്തര നടപടി സ്വീകരിക്കാന് ജില്ലാ ഭരണകൂടത്തോട് ആവശ്യപ്പെട്ടിട്ടുണ്ട്. തനിക്കെതിരെ ഗൂഢാലോചന എന്തെങ്കിലും നടന്നിട്ടുണ്ടെങ്കില് സര്ക്കാര് ഉചിതമായ നടപടി സ്വീകരിക്കണമെന്നും എം.എല്.എ ആവശ്യപ്പെട്ടു.
