ബംഗലുരു: ഇന്ത്യ ബംഗ്ളാദേശിനെ തോല്പ്പിച്ച 2007 ലോകകപ്പില് ഇതിഹാസ താരങ്ങളായ സച്ചിനെയും ഗാംഗുലിയെയും ദ്രാവിഡിനെയും കാണാനുള്ള തിടുക്കമായിരുന്നു തനിക്കെന്ന് ബംഗ്ളാദേശ് ഏകദിന നായകന് തമീം ഇഖ്ബാല്. ഗ്രൂപ്പ് സ്റ്റേജില് വെച്ച് തന്നെ ഇന്ത്യയെ ലോകകപ്പിന്റെ പടിയിറക്കിവിട്ട മത്സരത്തിലെ ഹീറോ അര്ദ്ധശതകം കുറിച്ച തമീം ഇഖ്ബാലായിരുന്നു.
53 പന്തില് 51 റണ്സാണ് തമീം എടുത്തത്. തന്റെ ആരാധനാ പാത്രങ്ങളായിരുന്ന സച്ചിനെയും ഗാംഗുലിയെയും ദ്രാവിഡിനെയും കാണുകയായിരുന്നു ആഗ്രഹം. എന്നാല് ഇതിഹാസ താരങ്ങളുടെ സാന്നിദ്ധ്യത്തില് കളിക്കാന് തന്നെ കഴിഞ്ഞു. മത്സരത്തില് ഇന്ത്യ 190 ന് പുറത്തായപ്പോള് തങ്ങള്ക്ക് ജയിക്കാമെന്ന് തോന്നി. ആദ്യ പന്തില് തന്നെ മണിക്കൂറില് 140 കി. മീ വേഗതയില് ഏറിയുന്ന സഹീര്ഖാനെയാണ് നേരിടേണ്ടി വന്നത്. ആദ്യ പന്ത് ഒരു വിധത്തില് തട്ടിയിട്ടു. എന്നാല് രണ്ടാമത്തെ പന്ത് ബൗണ്ടറി അടിച്ചതോടെ ആത്മവിശ്വാസം കൈവന്നു. അദ്ദേഹം പറഞ്ഞു.
2007 ലോകകപ്പില് ഇന്ത്യ ശ്രീലങ്കയോടും ബംഗ്ളാദേശിനോടും തോറ്റ് ആദ്യ റൗണ്ടില് തന്നെ പുറത്തായിരുന്നു. 191 റണ്സായിരുന്നു ബംഗ്ളാദേശിനെതിരേ അടിച്ചത്. അവര് ഒമ്പത് പന്ത് ബാക്കി നില്ക്കേ തന്നെ ലക്ഷ്യം നേടി. തന്റെ ഹീറോകള്ക്കെതിരേ വിജയം നേടാനായത് വളരെ സന്തോഷം നല്കിയ കാര്യമായിരുന്നു. ബംഗ്ളാദേശ് ക്രിക്കറ്റിനും 2007 ലോകകപ്പില് നേടിയ ഇന്ത്യയ്ക്കെതിരേയുള്ള വിജയം കളിക്കാര്ക്കും ആരാധകര്ക്കും മഹത്തരമായ കാര്യമായി മാറി. ഈ ടീമിനും എന്തെങ്കിലുമൊക്കെ ചെയ്യാനാകുമെന്ന് ആള്ക്കാരിലും ടീമിലും പ്രതീക്ഷയേകുകയും ചെയ്തു.
മൊഷറഫ് മൊര്ത്താസ പടിയിറങ്ങിയ സാഹചര്യത്തില് ബംഗ്ളാദേശ് ടീമിന്റെ പുതിയ ഏകദിന നായകന് തമീം ഇഖ്ബാലാണ്. ബംഗ്ളാദേശിന്റെ ഏറ്റവും മികച്ച ബാറ്റ്സ്മാന്മാരില് ഒരാളായ തമീം ഇതുവരെ 60 ടെസ്റ്റുകളില് ബംഗ്ളാദേശ് ജഴ്സിയണിഞ്ഞു. 78 ഏകദിനത്തിലും കളിച്ചു. എല്ലാ ഫോര്മാറ്റിലും കൂടി 13,365 റണ്സാണ് അടിച്ചുകൂട്ടിയിരിക്കുന്നത്.
