കോട്ടയം: പുന്നത്തുറ സെന്റ് തോമസ് (വെള്ളാപ്പള്ളി) പള്ള വികാരി ഫാ.ജോര്ജ് എട്ടുപറയിലിന് സഭയില് നിന്ന് സമ്മര്ദ്ദം ഉണ്ടായിരുന്നുവെന്ന് ഇടവകാംഗമായ ജോളി എട്ടുപറ. വൈദികന് ഈ പള്ളിയില് നിന്ന് അതിരൂപത നേതൃത്വത്തോട് സ്ഥലംമാറ്റം ചോദിച്ചിരുന്നു. ഇതുമായി ബന്ധപ്പെട്ട് ഇന്നലെ ഉച്ചകഴിഞ്ഞ് മൂന്നു മണിക്ക് ബിഷപുമായി കൂടിക്കാഴ്ച അനുവദിച്ചിരുന്നു. എന്നാല് അദ്ദേഹം ബിഷപ് ഹൗസില് എത്തിയിരുന്നില്ല. കാണാതെ വന്നതോടെ പരിചയക്കാരുടെയോ ബന്ധുക്കളുടെയോ വീട്ടില് പോയതാവാമെന്ന് കരുതി. രാത്രി വൈകിയിട്ടും കാണാതെ വന്നതോടെയാണ് പോലീസില് പരാതി നല്കിയത്്. വൈദികനെ കാണാത്തതിനാല് പള്ളി ജീവനക്കാരന് അത്താഴം മുറിക്ക് പുറത്തുവച്ചിട്ട് പോകുകയായിരുന്നു.
ഈ പള്ളിയില് വരുന്ന വൈദികനും അധികകാലം ഇരിക്കില്ലെന്ന് ഇടവകക്കാര് പറയുന്നു. ഇതിനു മുന്പ് ഇരുന്ന വൈദികന് എട്ടു മാസം കഴിഞ്ഞപ്പോള് സ്ഥലംമാറിപ്പോയി. അദ്ദേഹം മുന്പ് ചാന്സലറായിരുന്നതിനാല് അതിരുപതയില് സ്വാധീനിച്ച് സ്ഥലം മാറ്റം തരപ്പെടുത്തുകയായിരുന്നു. എന്നാല് ഫാ.ജോര്ജ് വിദേശത്തുനിന്ന് വന്നതിനാല് ഇവിടുത്തെ പ്രശ്നങ്ങള് അറിയാതെ ചുമതലയേല്ക്കുകയായിരുന്നു. പ്രശ്നങ്ങള് അറിഞ്ഞതോടെ ഇവിടെ നിന്ന് സ്ഥലം മാറിപ്പോകാന് ആഗ്രഹിച്ചിരുന്നു.
ഇടവകക്കാരുടെ ആഗ്രഹത്തിന് വിരുദ്ധമായി പള്ളിയിലെ അള്ത്താരയില് സ്ഥാപിച്ചിരുന്ന ക്രൂശിത രൂപം മാറ്റിയതോടെയാണ് പ്രശ്നങ്ങളുടെ തുടക്കം. പതിറ്റാണ്ടുകളായി ഞങ്ങളുടെ പൂര്വ്വികര് വണങ്ങിയ കുരിശ് മാറ്റിയതോടെ വൈകാരികമായ പ്രശ്നങ്ങളുണ്ടായി. ഇതോടെ 500 ഓളം ഇടവകക്കാരുള്ള പള്ളിയില് ആളുകള് വരുന്നത് കുറഞ്ഞു. മറ്റ് പള്ളികളിലാണ് ആളുകള് പോയിരുന്നത്. ആഴ്ചയില് 18,000 രൂപ വരെ സ്തോത്രക്കാഴ്ച കിട്ടിയിരുന്ന പള്ളിയിലെ വരുമാനം ഇതോടെ കുറഞ്ഞു 4000 രൂപ വരെയായി. ഇതോടെ പള്ളിയുടെ ദൈന്യംദിന ചെലവുകള് നടത്താന് കഴിയാത്ത സ്ഥിതിയായി. ഇത് അദ്ദേഹത്തെ വല്ലാതെ വിഷമിപ്പിച്ചിരുന്നു.
ഇത്രയും നല്ലൊരു പുരോഹിതന് ഈ ഇടവകയില് വന്നിട്ടില്ലെന്നാണ് ഇടവകക്കാര് പറയുന്നത്. മരണത്തില് ദുരൂഹതയുണ്ടോയെന്ന് പോലീസ് അന്വേഷിക്കണം- ജോളി എട്ടുപറ പറഞ്ഞു. മാറ്റിയ ക്രൂശിത രൂപം പുനഃസ്ഥാപിക്കണമെന്ന് ആവശ്യപ്പെട്ട് കോടതില് കേസ് നടക്കുന്നുമുണ്ട്.
പള്ളിയിലെ അള്ത്താരയില് സ്ഥാപിച്ചിരുന്ന ക്രൂശിത രൂപം മാറ്റിയതുമായി ബന്ധപ്പെട്ട് വലിയ തര്ക്കങ്ങളും സംഘര്ഷങ്ങളും മുന്പ് ഈ പള്ളിയില് നടന്നിരുന്നു. പ്രതിഷേധിച്ച ഇടവകക്കാരെ പോലീസ് അറസ്റ്റു ചെയ്തുനീക്കുകയും വന് പോലീസ് സന്നാഹത്തോടെ പുതിയ കുരിശ് സ്ഥാപിക്കുകയും ചെയ്തിരുന്നു.
