കോട്ടയം/കൊച്ചി: വിദേശത്തുനിന്നു റമദാന് റിലീഫിന്റെ പേരില് പാരിതോഷികം സ്വീകരിച്ച മന്ത്രി കെ.ടി. ജലീലിന്റെ നടപടി ഫെമ നിയമപ്രകാരം കുരുക്കാകും. വിദേശനാണ്യ വിനിമയച്ചട്ടം (ഫെമ) അനുസരിച്ച് റിസര്വ് ബാങ്കിന്റെയോ കേന്ദ്ര വിദേശകാര്യമന്ത്രാലയത്തിന്റെയോ അനുമതി ഇല്ലാതെ യു.എ.ഇ. കോണ്സലേറ്റില്നിന്നു പണമോ പാരിതോഷികമോ വാങ്ങാന് കഴിയില്ല. ഇത് ലംഘിച്ചാല് ഒരു വര്ഷം വരെ കഠിനതടവ് ലഭിക്കാവുന്ന കുറ്റമാണ്.
യു.എ.ഇ. കോണ്സലേറ്റില് നിന്നുളള റിലീഫ് കിറ്റുകള് വാങ്ങുന്നതുമായി ബന്ധപ്പെട്ടാണ് സ്വര്ണക്കള്ളക്കടത്തുകാരി സ്വപ്നയുടെ ഫോണിലേക്കു വിളിക്കേണ്ടിവന്നതെന്ന സ്വന്തം വാദമാണ് ജലീലിനു കുരുക്കായത്. മന്ത്രി ഫെയ്സ് ബുക്കില് ഇട്ട കുറിപ്പുകളും ഇത്തരത്തില് തിരിച്ചടിയാകും. മേയ് 14-നായിരുന്നു പെരുന്നാള്. എന്നാല് മന്ത്രിയുടെ ഫെയ്സ് ബുക്കില് ജൂണ് 16-ന് റിലീഫ് ആവശ്യത്തിനായി യു.എ.ഇ. സഹായം ഉപയോഗിച്ച് സാധനങ്ങള് വാങ്ങിയതിന്റെ ബില്ലാണ് ഇട്ടിരിക്കുന്നത്. ഇത് ചോദ്യംചെയ്ത് പ്രതിപക്ഷം രംഗത്തു വരികയും ചെയ്തു.
മന്ത്രി ജലീലിന്റെ ഇടപെടലുകള് സംശയാസ്പദമാണെന്നും സ്വര്ണക്കടത്തിന്റെ അന്വേഷണപരിധിയില് ജലീലിനെ ഉള്പ്പെടുത്തണമെന്നും തിരുവഞ്ചൂര് രാധാകൃഷ്ണന് എം.എല്.എ. ആവശ്യപ്പെട്ടു. സ്വപ്നയുമായി ഫോണില് സംസാരിച്ചുവെന്ന് മന്ത്രി തന്നെ സമ്മതിച്ച പഴ്സണല് സ്റ്റാഫ് മന്ത്രിയുടെ സ്റ്റാഫ് ആകുന്നതിനു മുമ്പ് കരിപ്പൂര് വിമാനത്താവളത്തില് കരാര് തൊഴിലാളിയായി പ്രവര്ത്തിച്ചിട്ടുണ്ട്. ഇദേഹത്തിന്റെ മുന്കാല പ്രവര്ത്തനങ്ങളും അന്വേഷണത്തിന്റെ ഭാഗമാക്കണം. പരസ്യമായി നിയമലംഘനം സമ്മതിച്ച മന്ത്രി കെ.ടി. ജലീല് രാജിവയ്ക്കുകയാണ് വേണ്ടത്. സി.പി.എം ഓഫീസില്വച്ചാണ് കിറ്റ് വിതരണം ചെയ്തത്.
കുറ്റക്കാര് രക്ഷപെടാന് ശ്രമിക്കുന്നത് അറ്റാഷെയെ ചാരിയാണന്നും തിരുവഞ്ചൂര് പറഞ്ഞു. ഭരണഘടനാ ലംഘനം നടത്തിയ മന്ത്രി ജലീലിനെ പുറത്താക്കാന് ഗവര്ണര് തയറാകണമെന്നു കോണ്ഗ്രസ് നിയമസഭാ കക്ഷി ഉപനേതാവ് കെ. സി. ജോസഫ് ആവശ്യപ്പെട്ടു. പ്രളയസമയത്ത് യു.എ.ഇ. കേരളത്തിന് വാഗ്ദാനം ചെയ്ത 900 കോടി രൂപ ആത്മാഭിമാനം മുന്നിര്ത്തി വേണ്ടന്ന് വെച്ച രാജ്യമാണ് ഇന്ത്യ. ഈ അവസരത്തിലാണ് ഭക്ഷണക്കിറ്റിന് വേണ്ടി കേരളത്തിന്റെ ഒരു മന്ത്രി വിദേശ കോണ്സുലേറ്റിനെ സമീപിച്ചത്. ഇത് കേരളത്തിനാകെ അപമാനമാണെന്നും കെ.സി. ജോസഫ് പറഞ്ഞു.
അഖിലേന്ത്യാ സര്വീസ് ചട്ടം ലംഘിച്ചതിനു മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറിനെ സസ്പെന്ഡ് ചെയ്തതോടെ സി.ബി.ഐ. അന്വേഷണത്തിനും കളമൊരുങ്ങി. 2018-ലെ അഴിമതി നിരോധന (ഭേദഗതി) നിയമപ്രകാരം കേസെടുക്കാമെന്നാണു നിയമോപദേശം. പ്രതിഫലമായി പണംതന്നെ കൈപ്പറ്റണമെന്നില്ലെന്ന് ഇതിലെ 13-ാം വകുപ്പ് പറയുന്നു. ശിവശങ്കറും സ്വപ്നയും തമ്മില് പരിധിവിട്ട ബന്ധമുണ്ടെന്നാണു അന്വേഷണ റിപ്പോര്ട്ട്. സ്വപ്നയെ ശിവശങ്കര് പലതരത്തില് സഹായിച്ചിട്ടുണ്ട്. ഇവര് തമ്മിലുള്ള ബന്ധത്തെപ്പറ്റിയും സംശയമുള്ള സാഹചര്യത്തിലാണു സി.ബി.ഐ. അന്വേഷണത്തിനു സാധ്യതയേറിയത്.
