ന്യൂഡല്ഹി: ശ്രീരാമന് കാരുണ്യവും സ്നേഹവും ഉള്പ്പെടെയുള്ള എല്ലാ സദ്ഗുണങ്ങളുടെയും രൂപമാണെന്നും അന്യായവും ക്രൂരതയും അദ്ദേഹം പൊറുക്കില്ലെന്നും രാഹുല്ഗാന്ധിയുടെ ട്വീറ്റ്. അയോദ്ധ്യയില് രാമക്ഷേത്ര നിര്മ്മാണവുമായി ബന്ധപ്പെട്ട് ശിലാ സ്ഥാപന ചടങ്ങുകള് പ്രധാനമന്ത്രി നടത്തിയതിന് തൊട്ടു പിന്നാലെയാണ് ശ്രീരാമനെ സ്തുതിച്ചും ബിജെപിയെ വിമര്ശിച്ചും രാഹുലിന്റെ ഹിന്ദിയിലുള്ള ട്വീറ്റ്.
മര്യാദാ പുരുഷോത്തമനായ ഭഗവാന് രാമന് സര്വ്വ ഗുണങ്ങളുടെയും സ്വരൂപമാണെന്നും മാനവീകതയുടെ മുല രൂപമായിട്ടാണ് ഭക്തരുടെ മനസ്സില് നിറഞ്ഞു നില്ക്കുന്നതെന്നും രാഹുല് പറയുന്നു. രാമന് സ്നേഹമാണ് അവിടെ വെറുപ്പിനും വൈരാഗ്യത്തിനും സ്ഥാനമില്ല. രാമന് കരുണയാണ്. അവിടെ ക്രൂരത പ്രകടിപ്പിക്കാനാകില്ല. രാമന് ന്യായമാണ് അവിടെ അന്യായം പ്രകടിപ്പിക്കാനാകില്ല. രാഹുല് ട്വീറ്റില് പറയുന്നു. അയോദ്ധ്യയില് ക്ഷേത്രം നിര്മ്മിക്കാനുള്ള ഭൂമിപൂജയ്ക്കും തറക്കല്ലിടലിനും തൊട്ടു പിന്നാലെയായിരുന്നു രാഹുലിന്റെ ട്വീറ്റും വന്നത്.
അയോദ്ധ്യയില് പ്രത്യേക പൂജകള്ക്കും മറ്റും ശേഷം 12.45 ഓടെയായിരുന്നു പ്രധാനമന്ത്രി നരേന്ദ്രമോഡി രാമക്ഷേത്രത്തിന് തറക്കല്ലിട്ടത്. 40 കിലോയോളം വരുന്ന വെള്ളിക്കട്ടയാണ് സ്ഥാപിച്ചത്. പ്രോട്ടോകോള് പാലിച്ചായിരുന്നു ചടങ്ങുകള്. സരയൂ നദീതീരത്ത് യാഥാര്ത്ഥ്യമായത് സുവര്ണ്ണ ചരിത്രമാണെന്നും നൂറ്റാണ്ടുകളുടെ കാത്തിരിപ്പാണ് അവസാനിച്ചതെന്നും പ്രധാനമന്ത്രി ചടങ്ങിന് ശേഷം അഭിസംബോധന ചെയ്തു സംസാരിച്ചപ്പോള് പറഞ്ഞു. ലോകമെങ്ങും ജയ് ശ്രീറാം വിളികള് മുഴങ്ങട്ടെ എന്നും ലോകത്തുടനീളമുള്ള രാമഭക്തരെ അനുമോദിക്കുന്നതായും പറഞ്ഞു.
അഭിമാന നിമിഷമെന്നായിരുന്നു യുപി മുഖ്യമന്ത്രി യോഗി ആദിത്യനാഥിന്റെ പ്രതികരണം. 500 വര്ഷത്തെ കാത്തിരിപ്പാണ് ഫലവത്തായതെന്ന് യോഗി പറഞ്ഞു. ആര്എസ്സഎസിന്െ്റ ലക്ഷ്യം ഫലം കണ്ടെന്ന് മോഹന് ഭഗവത് പ്രതികരിച്ചു. ശിലാ സ്ഥാപനത്തിന് ആശംസയുമായി രാഷ്ട്രപതിയും എത്തി. ക്ഷേത്രം ആധുനിക ഇന്ത്യയുടെ അടയാളമായി മാറുമെന്നായിരുന്നു രാഷ്ട്രപതി രാംനാഥ് കോവിന്ദിന്റെ പ്രതികരണം.
