നെന്മാറ: നെല്ലിയാമ്പതിയിലേക്ക് എത്തുവാനുള്ള ഏക മാര്ഗമായ നെന്മാറ-നെല്ലിയാമ്പതി റോഡില് കാട്ടാനക്കൂട്ടമിറങ്ങുന്നത് പതിവാകുന്നത് യാത്രക്കാര്ക്ക് ഭീഷണിയാവുന്നു. നെന്മാറ-നെല്ലിയാമ്പതി പാതയില് ചെറുനെല്ലിക്കും മരപാലത്തിനും ഇടക്കാണ് നാലെണ്ണം ഉള്പ്പെടുന്ന കാട്ടാനക്കൂട്ടം കഴിഞ്ഞ ദിവസം നിലയുറപ്പിച്ചത്. ഉച്ചക്ക്ശേഷം കാട്ടാനക്കൂട്ടം റോഡില് നിലയുറപ്പിച്ചതോടെ മണിക്കൂറുകളോളം ഗതാഗതം സ്തംഭിച്ചു.
കഴിഞ്ഞ കുറച്ചു മാസങ്ങളായി ഈ പാതയില് കാട്ടാനക്കൂട്ടം നിലയുറപ്പിക്കുന്നതിനാല് തോട്ടം തൊഴിലാളികളുടെ വിവിധ ആവശ്യങ്ങള്ക്കായുള്ള ഏകആശ്രയമായ നെന്മാറ നഗരത്തിലേക്കുള്ള യാത്ര ഭീതി നിറഞ്ഞതാവുന്നു. കോവിഡ് കാരണം സ്വകാര്യ, കെ.എസ്.ആര്.ടി.സി ബസുകള് നെല്ലിയാമ്പതിയിലേക്കുള്ള സര്വീസ് നിര്ത്തിയതോടെ ഭൂരിഭാഗം നിവാസികളും ഇരുചക്ര വാഹനങ്ങളെയാണ് ആശ്രയിക്കുന്നത്.
കാട്ടാനയ്ക്കും മറ്റു മൃഗങ്ങള്ക്കും റോഡിനു താഴെ പോത്തുണ്ടി അണക്കെട്ടു ഭാഗത്തേക്ക് പോകാന് കഴിയാത്തവിധം റോഡിന്റെ വശം ആശാസ്ത്രീയമായി കുത്തനെ കെട്ടി ഉയര്ത്തിയതിനാലാണ് ഇവ റോഡില് തമ്പടിക്കാന് കാരണം. പൊതുഗതാഗതം നിലച്ചിരിക്കുന്ന നെല്ലിയാമ്പതിയില് ഇരുചക്ര വാഹനങ്ങളെയാണ് ഇപ്പോള് കൂടുതല് പേരും ആശ്രയിക്കുന്നത്. ആനകള് പകല് റോഡിലിറങ്ങുന്നത് നെല്ലിയാമ്പതിയില് ജോലിക്കും കച്ചവടത്തിന്നും പോകുന്ന ഇരുചക്ര വാഹനയാത്രക്കാര്ക്കാണ് ഏറെ ഭീഷണിയാവുന്നത്.
സ്ഥിരമായി സഞ്ചരിക്കുന്ന ആനത്താരയും മറ്റും വയനാട്, ചെങ്കോട്ട റോഡുകളിലേതുപോലെ ഇടക്കിടെ താഴോട്ട് വന്യ മൃഗ സഞ്ചാരത്തിന് റാമ്പുകള് ഇല്ലാത്തതിനാലാണ് ആന, മാന് തുടങ്ങിയവ റോഡില് നിലയുറപ്പിക്കുന്നത്. ഇരുവശത്തും വാഹനങ്ങള് നിരയായി നില്കുന്നതും ഒരുവശം കുത്തനെയുള്ള കയറ്റമായതും ആനകള്ക്ക് വഴി മാറാന് കഴിയാതാക്കുന്നു. ഇത്തരം സാഹചര്യത്തില് വാഹനങ്ങളെ നിയന്ത്രിച്ച് ആനകളുടെ സഞ്ചാരപാത ഒഴിവാക്കി കൊടുക്കാന് നടപടിയുണ്ടാവണമെന്നും ആവശ്യമുണ്ട്.
