കൊച്ചി: വൃക്ക രോഗിയായ നിര്ധന യുവാവിന്റെ ചികിത്സയ്ക്ക് മനസ്സുതുറന്നു സഹായവുമായി ഒരു നാട്. കടവന്ത്ര സ്വദേശിയായ റിന്സണ് എന്ന യുവാവിന്റെ ചികിത്സയ്ക്ക് ആവശ്യമായി വന്ന 10 ലക്ഷം രൂപ സമാഹരിക്കാന് തൃക്കാക്കര എം.എല്.എ പി.ടി തോമസും സെന്റ് ജോസഫ് പള്ളി വികാരി ഫാ.ബെന്നി മാരാംപറമ്പിലും മറ്റ് ജനപ്രതിനിധികളും മുന്നിട്ടിറങ്ങിയപ്പോള് ആ നാട് ജാതിമത ചിന്തകളില്ലാതെ സംഭാവന നല്കി. മൂന്നു മണിക്കൂറുകൊണ്ട് ഇവര്ക്ക് ലഭിച്ചത് 27.5 ലക്ഷം രൂപ.
സെന്റ് ജോസഫ് ഇടവകാതിര്ത്തിയിലുള്ള നാനാജാതി മതസ്ഥരെയും വിവിധ രാഷ്ട്രീയ പ്രവര്ത്തകരെയും റസിഡന്സ് അസോസിയേഷനുകളെയും ഒരുമിപ്പിച്ച് വികാരിയുടെ നേതൃത്വത്തില് ഒരു ജനകീയ സമിതിയുണ്ടാക്കി. അവിടെ രാഷ്ട്രീയത്തിനും ജാതമത ചിന്തകള്ക്കും സ്ഥാനമുണ്ടായിരുന്നില്ല. സകലരും MLA രക്ഷാധികാരിയും ഇടവക വികാരി കൗണ്വീനറുമായ സമിതിയില് ഒറ്റക്കെട്ടായി. റസിഡെന്സ് അസോസിയേഷനുകളും ക്ളബുകളുമടക്കം സകലരും ഒരു കുടക്കീഴില് അണി നിരന്നു. സമിതിയുടെ കീഴില് വിവിധ ഇടങ്ങളിലായി 17 ലോക്കല് കമ്മിറ്റികള്. റിന്സണ് എന്ന യുവാവിന് വേണ്ടി 10 ലക്ഷം രൂപ സ്വരൂപിക്കണമെന്ന ഒറ്റ ലക്ഷ്യം.
അധികം തുകയുണ്ടായാല് ആ പ്രദേശത്തെ അര്ഹതപ്പെട്ട ഏതൊരാളുടെയും ചികില്സക്കായി ഉപയോഗിക്കുമെന്ന തീരുമാനത്തോടെ വ്യക്തമായ പദ്ധതികള് രൂപീകരിച്ചു. വികാരിയച്ചനും കൗണ്സിലറും റിന്സന്റെ പിതാവും ചേര്ന്ന സംയുക്ത ബാങ്ക് അക്കൗണ്ട് തുടങ്ങി. ആഗസ്റ്റ് 16ന് രാവിലെ 9 മണി മുതല് 12 മണി വരെ മാത്രം വീടുകള് സന്ദര്ശിച്ച് സംഭാവനകള് സ്വീകരിക്കാന് തീരുമാനിച്ചു.
