ലിയോണേല് മെസ്സിയുടെ കൂടുമാറ്റം സംബന്ധിച്ച ചര്ച്ചകളാണ് കായികലോകത്തെ ഏറ്റവും ചൂടുള്ള വാര്ത്ത. മെസ്സി സ്പെയിന് വിടുമെന്നും ഇംഗ്ളീഷ് ക്ലബ്ബ് മാഞ്ചസ്റ്റര് സിറ്റിയില് എത്തുമെന്നും റിപ്പോര്ട്ടുകള് പ്രചരിക്കുന്നതിനിടയില് മെസ്സി ക്ലബ്ബില് തുടരുമെന്ന പ്രതീക്ഷയില് ബാഴ്സ. മെസ്സിയെ കേന്ദ്രബിന്ദുവാക്കി അടുത്ത സീസണിലേക്കുള്ള കളി തന്ത്രങ്ങള് മെനയുകയാണ് ബാഴ്സയെന്നും താരത്തെ കൂടുമാറ്റത്തില് നിന്നും പറഞ്ഞ് പിന്തിരിപ്പിക്കാന് കഴിയുമെന്നും ബാഴ്സ സ്പോര്ട്ടിംഗ് ഡയറക്ടര് റാമോണ് പ്ളേന്സ് പ്രതികരിച്ചു.
ആറു തവണ ബാലന് ഡി ഓര് പുരസ്ക്കാരം നേടുകയും 634 ഗോളുകള് അടിച്ചു കൂട്ടുകയും ചെയ്ത അര്ജന്ീന മുന്നേറ്റക്കാരന് തന്നെ ഫ്രീ ട്രാന്സ്ഫറില് പേകാന് അനുവദിക്കണമെന്ന് നേരത്തേ ക്ലബ്ബ് അധികൃതര്ക്ക് സന്ദേശം അയച്ചിരുന്നു. എന്നാല് സംഭവിക്കുന്നതെല്ലാം സംഭവിക്കട്ടെ എന്നും എന്നാല് തങ്ങള് ഇപ്പോഴും ലോകത്തെ ഏറ്റവും വിലയേറിയ താരശത്ത ചുറ്റിപ്പറ്റി ടീമിനെ നെയ്തെടുക്കുന്ന തിരക്കിലാണെന്നും പ്ളേന്സ് പറയുന്നു. തങ്ങള് ആഗ്രഹിക്കുന്നത് ലോകത്തെ ഏറ്റവും മികച്ച താരത്തിനൊപ്പം ചരിത്രത്തിലെ തന്നെ ഏറ്റവും മികച്ച നിലയിലുള്ള വിജയങ്ങളുടെ മറ്റൊരു സീസണാണ്. ബാഴ്സിലോണയും മെസ്സിയും വിവാഹിതരായവരെ പോലെയാണ്. ക്ലബ്ബും കളിക്കാരനും പരസ്പരം ഏറെ നല്കി ആരാധകര്ക്ക് അനേകം സന്തോഷങ്ങളാണ് കൊണ്ടുവന്നത്. ഭാവി കാര്യവും പോസിറ്റീവായി കാണാനാണ് താന് ആഗ്രഹിക്കുന്നതെന്നും സ്പോര്ട്ടിംഗ് ഡയറക്ടര് പറയുന്നു.
ക്ളബ്ബ് കരിയറില് ബാഴ്സിലോണയ്ക്ക് മാത്രം കളിച്ചിട്ടുള്ള മെസ്സിക്ക് പക്ഷേ ട്രോഫിയില്ലാ സീസണായിരുന്നു കഴിഞ്ഞത്. അതിന് പുറമേ യുവേഫാ ചാംപ്യന്സ് ലീഗ് ഫുട്ബോളിന്റെ ക്വാര്ട്ടറില് ജര്മ്മന് ക്ബ്ബ് ബയേണ് മ്യൂണിക്കിനോട് 8-2 ന് കൂറ്റന് തോല്വിയും നേരിട്ടു അപമാനിതരാകുകയും ചെയ്തു. അതെല്ലാം കഴിഞ്ഞ കാര്യങ്ങളാണെന്നും അടുത്ത വര്ഷം വരെ മെസ്സിക്ക് ബാഴ്സയില് കാലാവധിയുണ്ടെന്നുമാണ് ബാഴ്സിലോണ അധികൃതര് പറയുന്നത്. മെസ്സിയെ പോലെ പരിചയ സമ്പന്നനായ താരത്തെ ഭാവിയിലെ ടീമിനെ ഉണ്ടാക്കാനും തങ്ങള്ക്ക് ഇനിയും വേണം. ബാഴ്സിലോണയും മെസ്സിയും തമ്മിലുള്ള ബന്ധം തുടരുമെന്ന് കരുതുന്നതായും പ്ലാന്സ് പറയുന്നു.
ക്ലബ്ബ് വിടാനുള്ള താല്പ്പര്യം മെസ്സി ക്ലബ്ബിനെ അറിയിച്ചിട്ടുണ്ടെങ്കിലും ഒരു വര്ഷം കൂടി കരാറില് ഉള്ളതിനാല് കരാര് തര്ക്കങ്ങള് പരിഹരിച്ചല്ലാതെ മെസ്സിക്ക് ക്ലബ്ബ് വിടാനാകില്ല. അങ്ങിനെ ചെയ്താല് ഫിഫയുടെ നിരോധനം അടക്കമുള്ള കാര്യങ്ങള് താരത്തെ തേടിവരും. താരം സ്പെയിന് വിടുന്നത് ആരാധകരെയും ഞെട്ടിച്ചിരിക്കുകയാണ്. മെസ്സി ക്ലബ്ബ് വിടാന് താല്പ്പര്യം പ്രകടിപ്പിച്ചതായുള്ള വാര്ത്തകള്ക്ക് പിന്നാലെ ആരാധകര് ക്ലബ്ബിന് മുന്നില് തടിച്ചു കൂടുകയും ബോര്ഡ് അധികൃതര്ക്കെതിരേ പ്രതിഷേധിക്കുകയും ചെയ്തിരുന്നു. 2017 നവംബറിലായിരുന്നു മെസ്സി ബാഴ്സയുമായി നാലു വര്ഷത്തേക്ക് കൂടി കരാര് പുതുക്കിയത്. മാഞ്ചസ്റ്റര് സിറ്റിയുമായി ബന്ധപ്പെട്ട് വാര്ത്തകള് ഉണ്ടെങ്കിലും താരം ക്ലബ്ബ് വിടില്ലെന്നാണ് ആരാധകരുടെ വിശ്വാസം.
