മുംബൈ: ബോളിവുഡ് നടന് സുശാന്ത് സിങ് രാജ്പുത്തിന് കഞ്ചാവ് സംഘടിപ്പിച്ചു നല്കിയതായി കാമുകി റിയ ചക്രവര്ത്തിയുടെ സഹോദരന് ഷോവിക് ചക്രവര്ത്തിയുടെ കുറ്റസമ്മതം. ലോക്ക്ഡൗണ് കാലയളവിലും അതിനു മുന്പും സുശാന്തിന്റെ വീട്ടില് ഹാഷിഷും കഞ്ചാവും എത്തിച്ചിരുന്നതായി ഷോവിക് സമ്മതിച്ചിട്ടുണ്ട്.
നാര്കോട്ടിക്സ് കണ്ട്രോള് ബ്യൂറോ(എന്.സി.ബി.) അറസ്റ്റ് ചെയ്ത ബാസിത് പരിഹാറും സൂര്യദീപ് മല്ഹോത്രയും മയക്കുമരുന്ന് നല്കിയിരുന്നുവെന്നും ഷോവിക്കിന്റെ മൊഴി പറയുന്നു. സുശാന്തിന്റെ വീട്ടിലെത്തിച്ച കഞ്ചാവിന് റിയ തന്റെ ക്രെഡിറ്റ് കാര്ഡില്നിന്നാണ് പണം നല്കിയതെന്നും ഷോവിക് വെളിപ്പെടുത്തി.
മയക്കുമരുന്നതിനെക്കുറിച്ച് റിയയും ബാസിത് പരിഹാറും ചര്ച്ച ചെയ്യുന്ന വാട്സ് ആപ്പ് ചാറ്റുകളെക്കുറിച്ചും ഷോവിക് ചക്രവര്ത്തി മൊഴിയില് സമ്മതിച്ചിട്ടുണ്ട്. 2020 മാര്ച്ച് 16-ന് സുശാന്തുമായി സംസാരിച്ചശേഷം സുശാന്ത് ഹാഷിഷും കഞ്ചാവും ആവശ്യപ്പെട്ടതായി റിയയോടു പറഞ്ഞു.
ദിവസം നാലഞ്ചുതവണ സുശാന്ത് കഞ്ചാവ് ഉപയോഗിക്കുമെന്ന് റിയ വാട്സ്ആപ്പ് ചാറ്റിലൂടെ പറഞ്ഞു. ഇതേത്തുടര്ന്ന് താന് അഞ്ചുഗ്രാം കഞ്ചാവ് ലഭ്യമാക്കി. ഇത് 20 തവണ ഉപയോഗിക്കാന് പോന്നതായിരുന്നു.-ഷോവിക്കിന്റെ മൊഴി വ്യക്തമാക്കുന്നു.
ബോളിവുഡ് നടന് സുശാന്ത് സിങ് രാജ്പുത്തിന്റെ മരണവുമായി ബന്ധപ്പെട്ട മയക്കുമരുന്ന് കേസില് അറസ്റ്റിലായ നടി റിയ ചക്രവര്ത്തിയുടെയും സഹോദരന് ഷോവിക് ചക്രവര്ത്തിയുടെയും ജാമ്യാപേക്ഷയില് മുംെബെയിലെ പ്രത്യേകകോടതി ഇന്നു വിധി പറയും.
കഴിഞ്ഞ ബുധനാഴ്ച മജിസ്ട്രേറ്റ് കോടതി ജാമ്യാപേക്ഷ തള്ളിയതിനേത്തുടര്ന്നാണ് ഇരുവരും പ്രത്യേകകോടതിയെ സമീപിച്ചത്. നിരപരാധിയായ തന്നെ കേസില് കുടുക്കുകയായിരുന്നെന്നു സുശാന്തിന്റെ കാമുകികൂടിയായ റിയയുടെ ജാമ്യാപേക്ഷയില് പറയുന്നു. ചോദ്യംചെയ്യലില് നിര്ബന്ധിച്ച് കുറ്റസമ്മതം നടത്തിക്കുകയായിരുന്നു.
മജിസ്ട്രേറ്റ് കോടതിയില് നല്കിയ ജാമ്യാപേക്ഷയില് കുറ്റസമ്മതമൊഴി നിഷേധിച്ചതാണെന്നും അവര് അപ്പീലില് വ്യക്തമാക്കി. സുശാന്തിനു റിയയാണു മയക്കുമരുന്ന് സംഘടിപ്പിച്ചു കൊടുത്തിരുന്നതെന്നാണു നര്കോട്ടിക്സ് കണ്ട്രോള് ബ്യൂറോയുടെ റിമാന്ഡ് റിപ്പോര്ട്ടില് പറയുന്നത്. കുറഞ്ഞതു 10 വര്ഷം തടവുശിക്ഷയും രണ്ടുലക്ഷം രൂപ പിഴയും ലഭിക്കാവുന്ന കുറ്റങ്ങളാണ് അവര്ക്കും സഹോദരനുമെതിരേ ചുമത്തിയിട്ടുള്ളത്.
