ചെന്നൈ: തമിഴ്നാട്ടില് നിയമസഭാ തിരഞ്ഞെടുപ്പ് അടുത്തിരിക്കെ ഭരണകക്ഷിയായ എഐഎഡിഎംകെ പ്രതിസന്ധി നേരിടുന്ന ഘട്ടത്തില് അനധികൃത സ്വത്ത് സമ്പാദന കേസില് ജയിലില് കഴിയുന്ന ശശികലയുടെ നേതൃത്വത്തിലുള്ള വിഭാഗം എഐഎഡിഎംകെയുമായി ലയിക്കാനുള്ള ചര്ച്ചകള് ആരംഭിച്ചു. പ്രതിസന്ധി കണക്കിലെടുത്താണ് പഴയ ശത്രുക്കള് ഒന്നിക്കാന് തീരുമാനിച്ചിരിക്കുന്നത്.
ലയിച്ച് ഒന്നാകുന്ന പാര്ട്ടിയുടെ ജനറല് സെക്രട്ടറി സ്ഥാനം ശശികലയ്ക്ക് നല്കണമെന്നതാകും ഇവരുടെ പ്രധാന ആവശ്യം. നിലവിലെ മുഖ്യമന്ത്രി എടപ്പാടി പളനിസാമിക്കും ഉപമുഖ്യമന്ത്രി ഒ. പനീര് ശെല്വത്തിനും അധികാരത്തില് തുടരാം. ടി.ടി.വി ദിനകരന് പാര്ട്ടിയിലെ സുപ്രധാന ചുമതല ലഭിക്കണം. എന്നിങ്ങനെയാണ് മറ്റ് നിര്ദ്ദേശങ്ങള്.ലയിക്കുന്നതില് ഇരുവിഭാഗത്തിനും തത്വത്തില് യോജിപ്പാണെന്നാണ് റിപ്പോര്ട്ട്.
അതേസമയം ശശികല വിഭാഗവും നിലവിലെ എഐഎഡിഎംകെയും ഒന്നിക്കാനുള്ള ചര്ച്ചകള്ക്ക് തുടക്കമിട്ടുകൊടുത്തത് ബിജെപിയാണെന്നാണ് റിപ്പോര്ട്ടുകള്. നിലവില് ശശികല വിഭാഗം അമ്മ മക്കള് മുന്നേറ്റ കഴഗം എന്ന പാര്ട്ടിയായാണ് അറിയപ്പെടുന്നത്.
ശശികല ജയിലിലായതിനാല് പാര്ട്ടിയെ നയിക്കുന്നത് ടി.ടി.വി ദിനകരനാണ്. ഇദ്ദേഹം രണ്ടുദിവസങ്ങള്ക്ക് മുമ്പ് ഡല്ഹിയിലെത്തി ബിജെപി നേതാക്കളുമായി ചര്ച്ച നടത്തിയിരുന്നുവെന്നാണ് റിപ്പോര്ട്ടുകള്.
