ടി എസ് സുരേഷ് ബാബു സംവിധാനം ചെയ്ത് മുരളി, ഗീത, ജഗദീഷ് എന്നിവര് കേന്ദ്രകഥാപാത്രങ്ങളായ ചിത്രമായിരുന്നു പ്രായിക്കരപാപ്പാന്. 25 വര്ഷം മുന്പ് ഇറങ്ങിയ ചിത്രം വന് വിജയമായിരുന്നു. മാത്രമല്ല, ചിത്രത്തിന് അവാര്ഡുകളും ലഭിച്ചിരുന്നു. എന്നാല് പ്രായിക്കര പാപ്പാനായി താന് കണ്ടത് മുരളിയ്ക്ക് പകരം മോഹന്ലാലിനെയായിരുന്നുവെന്ന് തുറന്നു പറയുകയാണ് ടി.എസ് സുരേഷ് ബാബു.
'' ഒരു പടത്തിന്റെ സ്ക്രിപ്റ്റ് വര്ക്കുമായി തിരുവനന്തപുരത്ത് ഉള്ള സമയത്താണ് ഷാജി പാണ്ടവത്ത് അദ്ദേഹം എഴുതിയ ഒരു കഥയ്ക്ക് സജക്ഷന്സ് ചോദിക്കുന്നത്. വളരെ നല്ല കഥ ആയിരുന്നു അത്, കൊമെഴ്ഷ്യല് അല്ലാത്ത ഒരു ക്ലാസിക് പടം. എനിക്ക് അത് വല്ലാതെ ഇഷ്ടപ്പെട്ടു. അത് മറ്റൊരു സംവിധായകനു വേണ്ടി എഴുതിയത് ആയിരുന്നു. ആ സംവിധായകന് അത് ഇഷ്ടമായില്ലെങ്കില് നല്ലൊരു കൊമെഴ്ഷ്യല് പടമായി ഇത് ചെയ്യാം എന്ന് ഞാന് പറഞ്ഞു. രണ്ട് ദിവസം കഴിഞ്ഞ് ഷാജി വിളിച്ചു.
കഥയിലെ ടെക്നിക്കുകള് ഇന്ത്യയില് ചെയ്യാന് പറ്റില്ല അത് കൊണ്ട് പടം ചെയ്യാന് ബുദ്ധിമുട്ടാണ് എന്ന് അറിയിച്ചു എന്ന് പറഞ്ഞു. അങ്ങനെ കഥ ഞങ്ങള് കൊമെഴ്ഷ്യലായി ചെയ്യാന് തീരുമാനിച്ചു. മോഹന്ലാല് ആയിരുന്നു എന്റെ മനസില്. രണ്ട് മൂന്ന് പാട്ട്, ആക്ഷന് അങ്ങനെ ആയിരുന്നു എന്റെ മനസില്. ഷാജിയ്ക്ക് താല്പര്യം മുരളിയും. ആദ്യത്തെ കഥ വച്ച് മുരളിയായിരുന്നു നല്ലത്. പക്ഷേ കൊമെഴ്ഷ്യല് ആകുമ്പോള് മോഹന്ലാല് ആണ് കുറച്ചു കൂടെ നല്ലത് എന്നാണ് എനിക്ക് തോന്നിയത്. അങ്ങനെ മോഹന്ലാലുമായി മുന്നോട്ട് പോകാന് തീരുമാനിച്ചിരിക്കുമ്പോള് എനിക്ക് മുരളിചേട്ടന്റെ കോള് വന്നത്.
ഷാജി കഥ പറഞ്ഞുവെന്നും കഥ വളരെ ഇഷ്ടമായി ഇത് നമ്മുക്ക് ചെയ്യണം എന്നായിരുന്നു മുരളിചേട്ടന് പറഞ്ഞത്. ഷാജി ആദ്യമേ മുരളി ചേട്ടനോട് പറഞ്ഞിരുന്നു. അന്ന് കഥയ്ക്ക് വാരിക്കുഴി എന്നോ മറ്റോ ആയിരുന്നു പേരിട്ടത്. ഞാന് വല്ലാത്ത ധര്മ്മ സങ്കടത്തിലായി, ഷാജിയാണെങ്കില് മുരളിചേട്ടന് ചെയ്യുവാണെങ്കില് ഗംഭീരമാകും എന്ന് പറഞ്ഞു കൊണ്ടേയിരുന്നു. പിന്നെ പിറ്റേ ദിവസം തന്നെ മുരളിചേട്ടനെ കണ്ട് കഥ പറഞ്ഞു, പടത്തിന് പ്രായിക്കരപാപ്പാന് എന്ന് പേരുമിട്ട് തുടങ്ങി. ഇതിലെ ജഗദീഷ് പാടുന്ന ഒരു പാട്ടുണ്ട്. അത് ആദ്യം ഇടുന്നത് മോഹന്ലാലിന്റെ കാറിലാണ്. ഒരു വാക്ക് പറഞ്ഞിരുന്നെങ്കില് പടം ചെയ്തെനെ എന്ന് അദ്ദേഹം പറഞ്ഞിരുന്നു. മോഹന്ലാലിന്റെ രീതിയിലാണെങ്കില് കഥ മറ്റൊരു തരത്തിലേക്ക് വന്നേനെ.'' - ടി.എസ് സുരേഷ് ബാബു പറയുന്നു.
