പാരിസ്: ചരിത്രം കുറിക്കാനെത്തിയ മെസ്സിയുടെ നാട്ടുകാരിയെ തകര്ത്താണ് 81 വര്ഷത്തെ ചരിത്രം ഈ 19 കാരി വഴിമാറ്റിയത്. 1939 നു ശേഷം ഫ്രഞ്ച് ഓപ്പണ് ഫൈനലില് ഇതാദ്യമായി ഒരു പോളണ്ട് വനിതയുടെ രംഗപ്രവേശം. പോളണ്ടിനു മുന്നില് കടന്നുപോയത് ഒന്നും രണ്ടും വര്ഷമല്ല 81 വര്ഷത്തെ ചരിത്രമാണ്. അത് തിരുത്തിയത് ഇഗ സ്യാംതെക് എന്ന 19 കാരിയും!
അര്ജന്റീന താരം 23 കാരി നാദിയ പൊഡൊറോസ്കയെ 6-2, 6-1 എന്നിങ്ങനെ നേരിട്ടുള്ള സെറ്റുകള്ക്ക് തകര്ത്താണ് ഇഗ ചരിത്രം കുറിച്ച് ഫ്രഞ്ച് ഓപ്പണ് വനിതാ സിംഗിള്സില് ഫൈനല് പ്രവേശം നേടിയത്. 54-ാം റാങ്ക് താരമാണ് ഇഗ സ്യാംതെക്. ഫൈനലില് ചെക്ക് റിപ്പബ്ലിക്കിന്റെ നാലാം സീഡ് താരം സോഫിയ കെനിനെ നേരിടും.
ഇതിനു മുമ്പ് 1939 ല് റോളണ്ട് ഗാരോസില് ജഡ്വിഗ ജെഡ്രെജോവ്സ്കെയെന്ന പോളണ്ട് താരമാണ് ഫ്രഞ്ച് ഓപ്പണില് ഫൈനല് പ്രവേശം നേടിയത്. റോളണ്ട് ഗാരോസില് നടന്ന ഫൈനല് പോരാട്ടത്തില് എന്നാല് ജഡ്വികയ്ക്ക് കിരീടം ഉയര്ത്താനായില്ല. ആദ്യ റണ്ണറപ്പായിരുന്നു. അതേസമയം ഓപ്പണ് കാലഘട്ടത്തില് ഗ്രാന്ഡ്സ്ലാം ഫൈനലിലെത്തുന്ന രണ്ടാമത്തെ പോളിഷ് വനിതയെന്ന നേട്ടവും ഇനി ഇഗയ്ക്ക് സ്വന്തം. 2012 ല് വിംമ്പിള്ഡനില് അഗ്നിസ്ക റാഡ്വാന്സ്ക ആണ് ഇതിനു മുമ്പ് ഒരു ഗ്രാന്ഡ്സ്ലാം ഫൈനലില് എത്തിയ പോളണ്ട് വനിതാ താരം. റോളണ്ട് ഗാരോസില് സ്വീഡില്ലാതെ ഫൈനലിലെത്തുന്ന ഏഴാമത്തെ മാത്രം താരമാണ് ഇഗ. 2017 ല് ജെലീന ഒസ്തപെങ്കോ മാത്രമാണ് സ്വീഡ് ചെയ്യപ്പെടാതെ എത്തി ഫൈനലില് കിരീടമുയര്ത്തിയത്.
