തിരുവനന്തപുരം: സ്ത്രീകള്ക്കെതിരെ മോശം പരാമര്ശം നടത്തിയ യൂട്യൂബര് വിജയ് പി നായരെ കൈയേറ്റം ചെയ്ത കേസില് ഭാഗ്യലക്ഷ്മിയും സുഹൃത്തുക്കളും ഇന്ന് ഹൈക്കോടതിയെ സമീപിച്ചേക്കുമെന്ന് സൂചന. സെഷന്സ് കോടതി മുന്കൂര് ജാമ്യാപേക്ഷ തള്ളിയ സാഹചര്യത്തിലാണ് ഇവര് ഹൈക്കോടതിയെ സമീപിക്കുന്നത്.
നിലവില് ഭാഗ്യലക്ഷ്മി അടക്കമുള്ളവര് പോലീസിന്റെ നിരീക്ഷണത്തിലാണ്. കേസില് മുന്കൂര് ജാമ്യം തള്ളിയതോടെ അറസ്റ്റിന് തുനിഞ്ഞ പൊലീസ് തല്ക്കാലം ഹൈക്കോടതിയില് ഇവര് സമര്പ്പിക്കുന്ന മുന്കൂര് ജാമ്യാപേക്ഷ കൂടി നോക്കിയ ശേഷം മതി തുടര്നടപടി സ്വീകരിക്കാമെന്ന നിലപാടിലാണ്.
വിജയ് പി നായരുടെ ലാപ്ടോപ്പും മൊബൈല്ഫോണും പോലീസിലേല്പ്പിച്ചു എന്നതിനാല് മോഷണക്കുറ്റം ചുമത്തിയ നടപടിയും കൈയേറ്റവും നിലനില്ക്കില്ലെന്നാകും പ്രധാനമായും വാദിക്കുക. അതുകൊണ്ടു തന്നെ തങ്ങള്ക്കെതരെ ചുമത്തിയ കുറ്റങ്ങള് പരസ്പര വിരുദ്ധമാണെന്നും വാദിക്കും.
എന്നാല്, വീഡിയോ സഹിതം തെളിവുള്ളതിനാല് പിടിച്ചുപറി എന്നതിലുപരി, ദേഹോപദ്രവമേല്പ്പിച്ചുള്ള മോഷണക്കുറ്റം എന്ന നിലയിലേക്ക് പോലീസ് നിലപാട് കടുപ്പിക്കും.
കൈയേറ്റം വ്യക്തമാണെന്നിരിക്കെ മുന്കൂര് ജാമ്യ ഹര്ജിയില് ഹൈക്കോടതി സ്വീകരിക്കുന്ന തീരുമാനമെന്താകുമെന്നത് നിര്ണായകമാണ്. ഭാഗ്യലക്ഷ്മി അടക്കമുള്ളവരുടെ ജാമ്യ ഹര്ജിയെ സെഷന്സ് കോടതിയില് പൊലീസ് ശക്തമായി എതിര്ത്തിരുന്നു. അറസ്റ്റ് ഉടനെയില്ലെങ്കിലും പൊലീസിന്റെ നിരീക്ഷണ വലയത്തിലാണ് ഭാഗ്യലക്ഷ്മിയും ദിയസനയും ശ്രീലക്ഷ്മിയും. അതിനിടെ സൈനികരെ അപമാനിച്ചെന്ന പരാതിയിലും പൊലീസ് വിജയ് പി നായരുടെ അറസ്റ്റ് രേഖപ്പെടുത്തി
