പാറ്റ്ന: ദളിത് - സ്ത്രീ പീഡനങ്ങളും അക്രമവും ആയുധക്കടത്തും ഉള്പ്പെടെയുള്ള അനേകം ക്രിമിനല് കേസുകളില് പ്രതിയാണെങ്കിലും ബീഹാറില് സ്ഥാനാര്ത്ഥികളാകാന് പരിഗണിക്കുന്നത് വ്യക്തികളുടെ പോപ്പുലാരിറ്റിയും അതിലൂടെയുള്ള വിജയ സാധ്യതയും. എല്ലാ പാര്ട്ടികളും ഇതുവരെ പ്രഖ്യാപിച്ച സ്ഥാനാര്ത്ഥികളില് പലരും പല കേസുകളിലും പ്രതികളായ കോടതിവിധി വരാന് കാത്തിരിക്കുന്ന കേസുകളില് പെട്ടവര്.
അടുത്തിടെയാണ് വീട്ടില് നിന്നും സ്ഫോടക വസ്തുക്കളും എ കെ 47 തോക്കും കണ്ടെത്തിയതിന് അനന്ദ് കുമാര് സിംഗിനെ പാറ്റ്നയിലെ ബേവുര് ജയിലില് പാര്പ്പിച്ചത്. പട്ടികജാതി പീഡനവും സ്ത്രീ വിരുദ്ധതയും ഉള്പ്പെടെ 38 കേസുകളില് പ്രതിയായ ഇദ്ദേഹം ബീഹാറിലെ മോകാമാ മണ്ഡലത്തിലെ സിറ്റിംഗ് എംഎല്എ യാണ്. സാമ്പത്തീക ക്രമക്കേട് ഉള്പ്പെടെയുള്ള കേസുകള് പേരിലുണ്ടെങ്കിലും ആര് ജെ ഡി അനന്ദ് കുമാറിന് സീറ്റ് നല്കിയിരിക്കുകയാണ്.
സിംഗിനെ പോലെ നിരവധി കേസുകളില് പ്രതിയായ അജയ് യാദവിനെയാണ് അത്തരായിയില് സ്ഥാനാര്ത്ഥിയായി ആര് ജെ ഡി കാണുന്നത്. ക്രിമിനല് കേസുകളില് പ്രതിയാണെങ്കിലും തെരഞ്ഞെടുപ്പ് നടക്കാനിരിക്കുന്ന ബീഹാറില് ആര് ജെ ഡി ഇതുവരെ പ്രഖ്യാപിച്ച 42 ല് 20 എണ്ണവും അനേകം ക്രിമിനല് കേസുകളില് പ്രതികള്.
അജയ് യാദവിനെതിേര ഗയ ജില്ലയില് മാത്രം 14 ക്രിമിനല് കേസുകളുണ്ട്. കേസുകളില് പ്രതികളാണെങ്കിലും വില്ലന്മാര് എന്ന നിലയിലുള്ള ഇവരുടെ പോപ്പുലാരിറ്റി ജയ സാധ്യത കൂട്ടുന്നെന്നാണ് വിലയിരുത്തല്. ഇവര് രാഷ്ട്രീയമായി ഏറെ ആക്ടീവാണെന്നും ജനങ്ങളുടെ ക്ഷേമത്തിനായി അതാതു മേഖലകളില് പ്രവര്ത്തിക്കുന്നവരാണ് എന്നും പാര്ട്ടി പറയുന്നു. സ്ഥാനാര്ത്ഥികളാകുന്നവരുടെ പേരിലുള്ള ക്രിമിനല് കേസുകള് അതാത് വെബ്സൈറ്റിലും പത്രങ്ങളിലും സാമൂഹ്യമാധ്യമങ്ങളിലും പ്രസിദ്ധീകരിക്കണമെന്നും എന്തുകൊണ്ടാണ് അവരെ സ്ഥാനാര്ത്ഥികളാക്കുന്നതെന്ന കാരണം പറയണമെന്നും സുപ്രീംകോടതി രാഷ്ട്രീയ പാര്ട്ടികളോട് ആവശ്യപ്പെട്ടത് ഈ വര്ഷം ഫെബ്രുവരിയിലായിരുന്നു.
അനന്ദ് കുമാറിനെയും അജയ് യാദവിനെയും പോലെ അനേകം ക്രിമിനല് കേസുകള് പേരിലുള്ള മുകേഷ് കുമാര് റൗഷാനാണ് മഹുവയില് മത്സരിക്കുന്നത്. മുന്നാ യാദവാകട്ടെ മിനാപ്പൂരിലും, പ്രഹ്ലാദ് യാദവ് സൂര്യഗറിലും ഭരത് ബിന്ദ് ഭഭുവാ സീറ്റിലും മത്സരിക്കുന്നു. ഇവര്ക്കെല്ലാം അനേകം കേസുകളുണ്ടെങ്കിലും വിജയിക്കാനുള്ള സാധ്യത കൂടുതലാണെന്നത് കൊണ്ടാണ് സീറ്റ് നല്കിയിരിക്കുന്നത്.
ഇവര്ക്കെല്ലാം എതിരേ പീഡനത്തിനും ആയുധം കൈവശം വെച്ചതിനും കേസുകളുണ്ട്. 2016 ല് തെരഞ്ഞെടുക്കപ്പെട്ട 243 നിയമസഭാംഗങ്ങളില് 136 പേര്ക്ക് എതിരേയും ക്രിമിനല് കേസുകള് ഉണ്ടായിരുന്നു. ഇത്തവണ ആര്ജെഡി നിര്ത്തുന്ന 80 എംഎല്എ മാരില് 45 നും എതിരേ കേസുണ്ട്. ജെഡിയുവിന്റെ 69 എംഎല്എ മാരില് 34 ന് എതിരേയും കേസുണ്ട്. ബിജെപിയുടെ 54 സ്ഥാനാര്ഥികളില് 34 എണ്ണവും കോണ്ഗ്രസിന്റെ 15 ല് 14 ലും ക്രിമിനലുകളാണ്.
