ലക്നൗ: യുപിയില് ബ്രാഹ്മണര്ക്ക് നേരെ നടക്കുന്ന അതിക്രമങ്ങള്ക്ക് തടയിടാന് ടി20 ടീമുമായി കോണ്ഗ്രസ് നേതാവ്. കീഴില് ബ്രാഹ്മണര്ക്ക് നേരെ നടക്കുന്ന അതിക്രമങ്ങള് തടയാനും അക്രമങ്ങള്ക്ക് ഇരയായവര്ക്ക് നിയമസഹായം നല്കുന്നതിനുമായി ബ്രാഹ്മിണ് ചേതനാ പരിക്ഷത്തിന് കീഴില് എല്ലാ ജില്ലകളിലും 'ടി 20' എന്ന പേരില് 20 പേര് വരുന്ന രീതിയില് ഉണ്ടാക്കുന്ന പ്രത്യേക ടീമാണ് ഇത്. ഇവര്ക്ക് ഒരു മുന് സര്ക്കാര് ഉദ്യോഗസ്ഥരുടെ ഒരു ഉപദേശക സമിതിയും ഉണ്ടാകുമെന്നും യുപി യിലെ കോണ്ഗ്രസ് നേതാവ് ജിതിന് പ്രസാദയാണ് പ്രഖ്യാപനം നടത്തിയിരിക്കുന്നത്.
25 ജില്ലാ പ്രസിഡന്റുമാരുടെ പേരുകള് ബുധനാഴ്ച ജിതിന് പ്രസാദ പുറത്തുവിട്ടിട്ടുണ്ട്. ഇത് പിന്നീട് സംസ്ഥാനം മുഴുവനുമായി വ്യാപിപ്പിക്കും. ബ്രാഹ്മണര്ക്ക് നേരെയുള്ള അതിക്രമങ്ങള് ജില്ലയില് വര്ദ്ധിച്ചു വരികയാണെന്നും കഴിഞ്ഞ മൂന്ന് വര്ഷമായി അതിന്റെ തോത് ഉയരുകയാണെന്നും ജിതിന് പ്രസാദ പറയുന്നു. കൊലപാതകം, തട്ടിക്കൊണ്ടു പോകലുകള്, ബലാത്സംഗം തുടങ്ങിയ അതിക്രമങ്ങള് കൂടുകയാണ്. മിക്ക കുടുംബങ്ങളും ദാരിദ്ര്യത്തില് കഴിയുന്നതിനാല് നിയമ പോരാട്ടം നടത്താന് ഇവര്ക്ക് പണമോ പണ്ടമോ ഇല്ല. അതുകൊണ്ടു തന്നെ ആള്ക്കും വേണ്ടവിധമുള്ള നിയമസഹായം കിട്ടുക തുടങ്ങിയ കാര്യങ്ങള് ദുഷ്ക്കരമാണ്.
മെയിന്പുരിയിലെ നവോദയാ സ്കൂള് വിദ്യാര്ത്ഥിയുടെയും ബസ്തിയില് ഒരു വിദ്യാര്ത്ഥി നേതാവിന്റെയും കൊലപാതകങ്ങളില് കുടുംബം ഇപ്പോഴും നീതിക്ക് വേണ്ടി പോരാടുകയാണ്. സര്ക്കാര് സഹായം വാഗ്ദാനം ചെയ്തിരുന്നെങ്കിലും ഒന്നുമുണ്ടായില്ല. ഇത്തരം സാഹചര്യത്തില് അവര്ക്ക് വേണ്ടി ശബ്ദമുയര്ത്താനും സഹായിക്കാനുമാണ് സംഘടനയെന്ന് ജിതിന് പ്രസാദ പറയുന്നു. സംസ്ഥാനത്തെ ബ്രാഹ്മണര് വ്യാജ എന്കൗണ്ടറുകളില് കൊല്ലപ്പെടുന്നു. ഇവരെ കള്ളക്കേസുകളില് കുടുക്കുകയും ചെയ്യുന്നതായി പ്രസാദ പറയുന്നു. പുതിയതായി രൂപീകരിച്ച ടി 20 ടീമില് നിയമജ്ഞന്മാര് വരെ ഉണ്ടാകും.
യോഗി ആദിത്യനാഥിന്റെ സര്ക്കാര് സംവിധാനത്തിന് കീഴില ബ്രാഹ്മണ സംഘടനകള്ക്ക് ആശങ്ക പെരുകുകയാണ്. കൊടും കുറ്റവാളി വികാസ് ദുബേയെ പോലീസ് എന്കൗണ്ടറിന് വിധേയമാക്കിയ സംഭവം ബ്രാഹ്മണനും ഠാക്കൂര്മാരുമായുള്ള മത്സരമാക്കി ചിത്രീകരിക്കുന്നതിനെ ബ്രാഹ്മണ സമൂഹം ചോദ്യം ചെയ്യുന്നു. ആഗസ്റ്റില് താന് ബ്രാഹ്മണനായതിന്റെ പേരില് എന്കൗണ്ടറിന് ഇരയാകുമെന്ന് നിഷാദ് പാര്ട്ടി എംഎല്എ വിജയ് മിശ്ര ആശങ്ക പ്രകടിപ്പിച്ചിരുന്നു. ഇതിന് തൊട്ടു പിന്നാലെ ഭൂമി തട്ടിപ്പിന്റെ പേരില് ഇദ്ദേഹത്തെ അറസ്റ്റ് ചെയ്ത് ജയിലിലാക്കുകയും ചെയ്തു.
കഴിഞ്ഞ രണ്ടു വര്ഷത്തിനിടയില് യുപിയില് 500 ബ്രാഹ്മണര് കൊല്ലപ്പെട്ടതായും ഠാക്കൂര്മാരുടെ ഈ സര്ക്കാരിന് കീഴില് ബ്രാഹ്മണ സമൂഹം സുരക്ഷിതരല്ലെന്നും അഖിലേന്ത്യ ബ്രാഹ്മിന് മഹാസഭ (ആര്) പ്രസിഡന്റ് രാജേന്ദ്രനാഥ് ത്രിപാഠിയെ ഉദ്ധരിച്ച് പ്രിന്റ് റിപ്പോര്ട്ട് ചെയ്യുന്നു. യുപിയില് ജനസംഖ്യയില് 12 ശതമാനം മാത്രമാണ് ബ്രാഹ്മണരുള്ളത്. പ്രതിപക്ഷ പാര്ട്ടികളും ഇപ്പോള് ബ്രാഹ്മണരുടെ വോട്ട് ലക്ഷ്യമാക്കിയുള്ള പ്രവര്ത്തനം തുടങ്ങിയിട്ടുണ്ട്്. കോണ്ഗ്രസ്, സമാജ്വാദി പാര്ട്ടി, ബഹുജന് സമാജ് പാര്ട്ടി എന്നിവരെല്ലാം വിഷയം ഏറ്റുപിടിച്ചിട്ടുണ്ട്.
അധികാരത്തില് എത്തിയാല് പരശുരാമന്റെ 108 അടി ഉയരമുള്ള പ്രതിമ നിര്മ്മിക്കും എന്നാണ്് സമാജ്വാദി പാര്ട്ടിയുടെ വാഗ്ദാനം. എന്നാല് 2022 ല് അധികാരത്തില ഏറ്റിയാല് അതിനേക്കാര് വലിയ പ്രതിമ സ്ഥാപിക്കുമെന്നാണ് ബിഎസ്പി അദ്ധ്യക്ഷ മായാവതി പറയുന്നത്. പാര്ക്കുകള്ക്കും ആശുപത്രികള്ക്കും പരുശുരാമന്റെ പേര് വെയ്ക്കാമെന്നും മായാവതി പറയുന്നു. നവംബര് 3 ന് ഡിയോറിയയില് നടക്കുന്ന ഉപതെരഞ്ഞെടുപ്പില് ബിജെപിയും കോണ്ഗ്രസും എസ്പിയും ബിഎസ്പിയും സ്ഥാനാര്ത്്ഥികളെ നിര്ത്തിയിട്ടുണ്ട്. സ്ഥാനാര്ത്്ഥികള് നാലു പേരും ത്രിപാഠി എന്ന കുടുംബപ്പേരിലുള്ളവരാണ്.
