അര്മ്മേനിയന് പ്രധാനമന്ത്രിയുടെ പത്നി സൈനിക പരിശീലനം ആരംഭിച്ചു ; പോര്മുഖത്തേയ്ക്ക് പെണ് കരുത്തും
അര്മ്മേനിയന് പ്രധാനമന്ത്രിയുടെ പത്നി സൈനിക പരിശീലനം ആരംഭിച്ചു ; പോര്മുഖത്തേയ്ക്ക് പെണ് കരുത്തും
Authored by Web Desk | Last updated: 29 Oct 2020, 10:34 AM | 1 min read
ദശകങ്ങളായി തുടര്ന്നുവരുന്ന അര്മ്മേനിയ അസര്ബൈജാന് സംഘര്ഷങ്ങളില് അസര്ബൈജാനെതിരെ പോരാടാനൊരുങ്ങി അര്മ്മേനിയന് പ്രധാനമന്ത്രി നിക്കോള് പാഷിയാന്റെ ഭാര്യ അന്ന ഹകോബയാന്.
താന് ഉള്പ്പെടുന്ന 13അംഗ വനിതാ സ്കാഡ് ഉടന്തന്നെ സൈനികപരിശീലനം ആരംഭിക്കുമെന്നും വരുന്ന ദിവസങ്ങളില് അതിര്ത്തി സംരക്ഷിക്കാനായി പുറപ്പെടുമെന്നും അന്ന തന്റെ ഫേസ്ബുക്ക് പോസ്റ്റിലൂടെ പങ്കുവെയ്ക്കുന്നു. ഇത് അന്നയുടെ രണ്ടാമത്തെ സൈനികപരിശീലനമാണ്. കഴിഞ്ഞമാസം അന്നയും കരാബഖില് നിന്നുള്ള വനിതാ സംഘവും അര്മ്മേനിയയിലെ മിലിട്ടറി ബേസില് നിന്ന് ഏഴ് ദിവസത്തെ സൈനിക പരിശീലനം നേടിയിരുന്നു.
മുന് സോവിയറ്റ് റിപ്പബ്ലിക്കുകളായ അസര്ബൈജാനും അര്മ്മേനിയയും തമ്മില് നാഗൊര്ണൊ-കരാബാഖ് എന്ന മേഖലയെച്ചൊല്ലി തര്ക്കങ്ങള് നിലനില്ക്കുകയാണ്. 90കളില് ഈ മേഖലയെച്ചൊല്ലിയുണ്ടായ തര്ക്കത്തില് ഇരുരാജ്യങ്ങള്ക്കും വലിയ നഷ്ടങ്ങളാണുണ്ടായത്. മുപ്പതിനായിരത്തോളം ആളുകള് മരിച്ചുവീഴുകയും പത്തു ലക്ഷത്തില് അധികമാളുകള് പലായനം ചെയ്യുകയുമുണ്ടായി.
ഇരുരാജ്യങ്ങളും അവകാശവാദമുന്നയിക്കുന്ന നാഗൊര്ണൊ-കരാബാഖ് മലനിരകള് രാജ്യാന്തര അതിര്ത്തിയനുസരിച്ച് അസര്ബൈജാന്റെ ഭാഗമാണ്. എന്നാല് ക്രിസ്ത്യാനികളായ അര്മീനിയന് വംശജര് കൂടുതലായി കാണുന്ന ഈ പ്രദേശത്തിനുവേണ്ടി അര്മേനിയ അവകാശവാദം ഉന്നയിക്കുകയായിരുന്നു. തര്ക്കങ്ങള്ക്കുശേഷം ഈ പ്രദേശം അര്മീനിയന് വിമതര് നിയത്രിക്കുന്ന സ്വയംഭരണ പ്രദേശമാക്കിമാറ്റി. ഇന്നും നിരവധി തര്ക്കങ്ങള്ക്കും യുദ്ധങ്ങള്ക്കുമിടയിലെ രക്തരൂക്ഷിതമായ അദ്ധ്യായമായി നിലനില്ക്കുകയാണ് നാഗൊര്ണൊ-കരാബാഖ് മലനിരകള്.
