ചണ്ഡീഗഢ്: കേരളവും തമിഴ്നാടും പോലെയുള്ള സംസ്ഥാനങ്ങള് അന്യസംസ്ഥാനക്കാരെ അതിഥി തൊഴിലാളികള് എന്ന വിശേഷിപ്പിക്കുമ്പോള് നാട്ടുകാര്ക്ക് തൊഴില് സംവരണം ഏര്പ്പെടുത്തി ഹരിയാന സര്ക്കാര്. ഇനിമുതല് ഫാക്ടറി, ബ്ലൂ കോളര് ജോലികള് എന്നിവയ്ക്ക് 75 ശതമാനം തദ്ദേശീയരായ ആളുകള്ക്ക് സംവരണം ഉറപ്പാക്കുന്ന ബില് നിയമസഭ പാസ്സാക്കി.
വ്യാഴാഴ്ച്ച ചേര്ന്ന സഭയിലായിരുന്നു നിര്ണ്ണായക ബില് പാസ്സാക്കിയത്. ഈ നിയമം അനുസരിച്ച് പത്തുപേരില് കൂടുതല് ആള്ക്കാര് ജോലിയെടുക്കുന്ന സ്ഥാപനങ്ങളിലെല്ലാം സംവരണം പാലിക്കണം. 10 ശതമാനത്തില് കൂടുതല് അന്യസംസ്ഥാനക്കാര് വരുന്ന സ്ഥാപനങ്ങള്ക്കും നിയമം ബാധകമാണ്. 50,000 രൂപ വരെ മാസ ശമ്പളം നല്കുന്ന ജോലികളെല്ലാം ഇനിമുതല് ഈ നിയമത്തിന്റെ പരിധിയില്പ്പെടും. നിയമം ലംഘിക്കുന്ന സ്ഥാനപങ്ങള്ക്ക് 10,000 മുതല് 50,000 രുപ വരെ പിഴ വിധിക്കാനും ബില്ലില് ശുപാര്ശ ചെയ്യുന്നു. അതേസമയം നിലവില് പ്രവര്ത്തിച്ചുവരുന്ന സ്ഥാപനങ്ങള്ക്ക് പുതിയ നിയമം ബാധകമാകില്ല. ഇനി റജിസ്റ്റര് ചെയ്യുന്ന സ്ഥാപനങ്ങളാണ് നിയമപ്രകാരം സംവരണ തത്വം പാലിക്കേണ്ടത്.
പുതിയതായി പ്രവര്ത്തനം ആരംഭിക്കുന്ന സ്വകാര്യ കമ്പനികള്, സൊസൈറ്റികള്, ട്രസ്റ്റുകള്, പങ്കാളിത്ത സ്ഥാപനങ്ങള് തുടങ്ങി സ്വകാര്യ ഉടമസ്ഥതയില് ആരംഭിക്കുന്ന സ്ഥാപനങ്ങള്ക്ക് തൊഴില് സംവരണനിയമം ബാധകമാകും. പുതിയ നിയമം മറ്റ് സംസ്ഥാനങ്ങളില് നിന്ന് തൊഴില് തേടിയെത്തുന്ന പുതിയ ആള്ക്കാര്ക്ക് തിരിച്ചടിയാകും. കുടിയേറ്റ തൊഴിലാളികള് അധികമായി കടന്നുവരുന്നതിനാല് ഹരിയാനയിലെ ആളുകള്ക്ക്് അവസരങ്ങള് നഷ്ടമാകുന്ന സാഹചര്യം പരിഹരിക്കാനാണ് ബില് പാസ്സാക്കിയതെന്നും സര്ക്കാര് പറയുന്നു.
അതേസമയം ജോലിയില് പ്രവേശിക്കാന് മതിയായ യോഗ്യതകളോ പ്രവര്ത്തി പരിചയമോ ഉള്ള ആളുകളെ ലഭിക്കാതെ വരുന്ന സാഹചര്യം മുന് നിര്ത്തി ബില്ലില് നിന്നും 10,000 മുതല് 50,000 വരെയുള്ള പിഴശിക്ഷ എന്നത് മാറ്റണമെന്ന് തൊഴിലുടമകളില് നിന്നും ആവശ്യം ഉയര്ന്നിട്ടുണ്ട്. ബിജെപിയ്ക്കൊപ്പം അധികാരത്തില് പങ്കാളിത്തം വഹിക്കുന്ന ഹരിയാനയിലെ ജെജെപി 2019 ലെ പ്രകടന പത്രികയില് പറഞ്ഞിരുന്ന കാര്യമാണ് 75 ശതമാനം തൊഴില് സംവരണമെന്നത്.
നേരത്തേ കര്ണാടകയും ആന്ധ്രയും ഈ രീതിയിലുള്ള ആലോചനകള് കൊണ്ടുവന്നിരുന്നു. കര്ണ്ണാടകയില് 70 ശതമാനം തൊഴില് സംവരണം ഉറപ്പുവരുത്തുന്ന വ്യവസായ ബില് പാസ്സാക്കിയിരുന്നു. ആന്ധ്രാപ്രദേശ് സര്ക്കാരും തങ്ങളുടെ നയമായി സ്വീകരിച്ചിരിക്കുകയാണ് തൊഴില് സംവരണം. ഇത് തിരിച്ചടിയാകുന്നത് അന്യ സംസ്ഥാനങ്ങളില് നിന്ന് കുടിയേറി പാര്ത്തവര്ക്കും തൊഴില് തേടി എത്തുന്നവര്ക്കുമാണ്.
