ന്യൂഡല്ഹി: ജമ്മു കശ്മീരിലെ രാഷ്ട്രീയ സഖ്യത്തെ ഗുപ്കര് ഗ്യാംഗ് എന്ന് ആക്ഷേപിച്ച കേന്ദ്ര ആഭ്യന്തര മന്ത്രി അമിത് ഷായ്ക്ക് മറുപടിയുമായി ജമ്മു കശ്മീര് മുന് മുഖ്യമന്ത്രി ഒമര് അബ്ദുള്ള. ബി.ജെ.പിയെ എതിര്ക്കുന്നവരെ അഴിമതിക്കാരും ദേശവിരുദ്ധരുമായി ചിത്രീകരിക്കുകയാണെന്ന് ഒമര് അബ്ദുള്ള വിമര്ശിച്ചു. ഞങ്ങള് ഗ്യാംഗ് അല്ല, തിരഞ്ഞെടുപ്പില് മത്സരിച്ചിട്ടുള്ള, തുടര്ന്ന് മത്സരിക്കുന്ന രാഷ്ട്രീയ സഖ്യമാണെന്നും ഒമര് പറഞ്ഞു.
തിരഞ്ഞെടുപ്പില് മത്സരിച്ചതിനും ജനാധിപത്യ പ്രക്രിയയില് പങ്കെടുത്തതിനും നേതാക്കളെ ദേശവിരുദ്ധരെന്ന് മുദ്രകുത്തി ജയിലിലടയ്ക്കാന് ജമ്മു കശ്മീരില് മാത്രമേ സാധിക്കൂ എന്ന് ഒമര് പറഞ്ഞു. ബി.ജെ.പിയെ എതിര്ക്കുന്നവരെ ദേശവിരുദ്ധരും അഴിമതിക്കാരുമായി മുദ്രകുത്തുന്നു എന്നതാണ് സത്യം. വരാനിരിക്കുന്ന തദ്ദേശ തിരഞ്ഞെടുപ്പില് അനായാസ വിജയം നേടാമെന്ന മോഹത്തിനേറ്റ തിരിച്ചടിയാണ് അമിത് ഷായുടെ ഇച്ഛാഭംഗത്തിന് കാരണമെന്നും ഒമര് പറഞ്ഞു. തിരഞ്ഞെടുപ്പ് മോഹങ്ങള്ക്ക് ഏറ്റ തിരിച്ചടിയാണ് അമിത് ഷായുടെ ഇച്ഛാഭംഗത്തിന് കാരണമെന്നും അത് മനസിലാക്കാവുന്നതോയുള്ളൂവെന്നും ഒമര് അബ്ദുള്ള പറഞ്ഞു. അമിത് ഷായ്ക്ക് മുന്നില് കീഴടങ്ങില്ലെന്നും ഒമര് പറഞ്ഞു.
ജമ്മു കശ്മീരിലെ പ്രതിപക്ഷ സഖ്യത്തിന്റെ നേതാവും മുന് മുഖ്യമന്ത്രിയുമായ മെഹബൂബ മുഫ്തിയും നേരത്തെ അമിത് ഷായ്ക്കെതിരെ രംഗത്ത് വന്നിരുന്നു. നേരത്തെ തുക്ഡെ തുക്ഡെ ഗ്യാംഗ് രാജ്യത്തിന്റെ അഖണ്ഡതയെ വെല്ലുവിളിക്കുന്നു എന്നായിരുന്നു ബി.ജെ.പിയുടെ ആരോപണം. ഇപ്പോള് ഞങ്ങളെ ദേശവിരുദ്ധരായി ചിത്രീകരിക്കാന് ഗുപ്കര് ഗ്യാംഗ് എന്ന് വിളിച്ച് ആഷേപിക്കുകയാണെന്നും മെഹബൂബ മുഫ്തി പറഞ്ഞു.
ജമ്മു കശ്മീരിലെ രാഷ്ട്രീയ സഖ്യത്തെ ഗുപ്കര് ഗ്യാംഗ് എന്ന് ആക്ഷേപിച്ച് അമിത് ഷാ രംഗത്ത് വന്നിരുന്നു. ഗുപ്കര് ഗ്യാംഗ് ദേശവിരുദ്ധരാണെന്നും ജമ്മു കശ്മീരില് തീവ്രവാദവും അരക്ഷിതാവസ്ഥയും തിരികെ കൊണ്ടുവരാന് അവര് വിദേശ ശക്തികളുടെ സഹായം തേടുന്നുവെന്ന് അടക്കം അമിത് ഷാ ആരോപിച്ചിരുന്നു.
