ലണ്ടന് : കാര്ഷിക നിയമം എടുത്തുമാറ്റണമെന്ന് ആവശ്യപ്പെട്ട് കര്ഷകര് ഡല്ഹിയില് നടത്തുന്ന സമരത്തിന് അന്താരാഷ്ട്ര വേദിയില് നിന്നും കൂടുതല് പിന്തുണ. കേന്ദ്രസര്ക്കാരിന്റെ ഭീഷണി മറികടന്ന് കനേഡിയന് പ്രധാനമന്ത്രി ജസ്റ്റിന് ട്രൂഡോ പരസ്യമായി പിന്തുണ പ്രഖ്യാപിച്ചതിന് പിന്നാലെ ബ്രിട്ടീഷ് പാര്ലമെന്റിലെ 36 എംപിമാരും പിന്തുണയുമായി രംഗത്ത് വന്നിട്ടുണ്ട്.
ഇന്ത്യയുമായി ചര്ച്ച ചെയ്യണമെന്ന് കാണിച്ച് എംപിമാര് യുകെ വിദേശകാര്യ സെക്രട്ടറി ഡൊമിനിക് റാബിന് കത്തയച്ചു. ലേബര്പാര്ട്ടിയുടെ ഇന്ത്യന് വംശജനായ പ്രതിനിധി തന്മന്ജിത്തിന്റെ നേതൃത്വത്തിലുള്ള സംഘമാണ് കത്തയച്ചത്. കൃഷിയെ ആശ്രയിച്ചു ജീവിക്കുന്ന കര്ഷകരെ ചൂഷണം ചെയ്യാന് സഹായിക്കുന്ന നിയമം എടുത്തുമാറ്റുന്ന കാര്യത്തില് ഇന്ത്യയില് സമ്മര്ദ്ദം ചെലുത്തണമെന്നും ഇന്ത്യന് സര്ക്കാരുമായി പഞ്ചാബിലും പുറത്തുമുള്ള സിഖ് കര്ഷകര്ക്ക വേണ്ടി സംസാരിക്കണം എന്ന് റോബിനയച്ച കത്തില് തന്മന്ജിത്ത് ആവശ്യപ്പെടുന്നു. നിയമം എങ്ങിനെയാണ് കര്ഷകരെ ബാധിക്കുന്നതെന്ന കാട്ടി എംപിമാര് ലണ്ടനിലെ ഇന്ത്യന് ഹൈക്കമ്മീഷണര്ക്കും എഴുതിയ കാര്യവും കത്തില് ചൂണ്ടിക്കാട്ടിയിട്ടുണ്ട്. പാര്ട്ടിയിലെ ബ്രിട്ടീഷ് സിഖുകാരുടെ ഒരു വിര്ച്വല് യോഗവും കഴിഞ്ഞയാഴ്ച തന്മന്ജിത് സിംഗ് വിളിച്ചിരുന്നു. യോഗത്തില് 14 എംപിമാര് പങ്കെടുക്കുകയും ചെയ്തു.
ഒരാഴ്ച പിന്നിട്ടിട്ടും തലസ്ഥാനത്ത് തുടരുന്ന കര്ഷകരുടെ സമരം ആഗോള ശ്രദ്ധ പിടിച്ചു പറ്റിയിരിക്കുകയാണ്. കര്ഷകരുമായി കേന്ദ്രം ഇന്ന് വീണ്ടും ചര്ച്ച നടത്താനിരിക്കെ ഡിസംബര് 8 ന് ഭാരത് ബന്ദ് പ്രഖ്യാപിച്ചിരിക്കുകയാണ്.
നേരത്തേ കനേഡിയന് പ്രധാനമന്ത്രി ജസ്റ്റീന് ട്രൂഡോ സമരത്തിന് പിന്തുണ പ്രഖ്യാപിച്ച് രംഗത്ത് വന്നിരുന്നു. എന്നാല് ഇന്ത്യയും കാനഡയും തമ്മിലുള്ള ബന്ധത്തെ ഇക്കാര്യം ബാധിക്കുമെന്ന മുന്നറിയിപ്പാണ് സര്ക്കാര് നല്കിയത്. എന്നാല് ലോകത്ത് എവിടെ ഇത്തരം സമരങ്ങള് നടന്നാലും അതിന് പിന്തുണ നല്കുമെന്നും ഇന്ത്യയിലെ കര്ഷകര്ക്കൊപ്പം ഉറച്ചു നില്ക്കുന്നതായുമാണ് ട്രൂഡോയുടെ വെളിപ്പെടുത്തല്.
