രാവണന്റെ കഥ പറയുന്ന ആദിപുരുഷുമായി ബന്ധപ്പെട്ട് സംഘപരിവാര് ഭീഷണി ഉയര്ത്തിയ സാഹചര്യത്തില് ബോളിവുഡ് നടന് സെയ്ഫ് അലി ഖാന് മാപ്പു പറഞ്ഞു. തന്റെ പുതിയ സിനിമയുമായി ബന്ധപ്പെട്ട് രാവണനെ കുറിച്ച് സെയ്ഫ് അലി ഖാന് നടത്തിയ പരാമര്ശങ്ങള്ക്കെതിരേ ബിജെപിയും സംഘപരിവാര് സംഘടനകളും നടത്തിയ ഭീഷണിയെ തുടര്ന്നായിരുന്നു നടന്റെ ഖേദ പ്രകടനം. ബിജെപി നേതാവ് രാം കദമാണ് താരത്തിനെതിരേ രംഗത്ത് വന്നത്.
സെയ്ഫ് അലി ഖാന് പറഞ്ഞത്
''ഒരു അഭിമുഖവുമായി ബന്ധപ്പെട്ട് താന് നടത്തിയ പ്രസ്താവനകള് വിവാദമാകുകയും ഒരു വിഭാഗത്തിന്റെ വികാരം വൃണപ്പെടുത്തുന്ന സാഹചര്യം ഉണ്ടാകുകയും ചെയ്തു. അക്കാര്യം ഒരിക്കലും ഈ രീതിയില് ഉദ്ദേശിച്ച് നടത്തിയതായിരുന്നില്ല. എന്നിരുന്നാലും തന്റെ പ്രസ്താവന ആരെയെങ്കിലും മാനസീകമായി മുറിപ്പെടുത്തിയിട്ടുണ്ടെങ്കില് ഖേദം പ്രകടിപ്പിക്കുകയും പ്രസ്താവന നിരുപാധികമായി പിന്വലിക്കുകയും ചെയ്യുന്നു. ശ്രീരാമന് എല്ലായ്പ്പോഴും തനിക്ക് ആദര്ശത്തിന്റെയും വീരപുരുഷത്വത്തിന്റെയും അടയാളമാണ്. തിന്മയ്ക്ക് മേല് നന്മ വിജയിക്കുന്നതാണ് ആദിപുരുഷും പറയുന്നത്. പുരാണം യാതൊരു രീതിയിലും വളച്ചൊടിക്കാതെ അവതരിപ്പിക്കാനാണ് എല്ലാവരും ശ്രമിക്കുന്നത്.'' തന്റെ മാപ്പപേക്ഷയില് സെയ്ഫ് അലി ഖാന് പറയുന്നു.
ബിജെപി നേതാവ് പറഞ്ഞത്
നടന് സെയ്ഫ് അലിഖാനും ആദിപുരുഷിന്റെ സംവിധായകന് ഓം റൗത്തിനും എതിരേ ബിജെപി നേതാവ് രാം കദം പ്രതിഷേധമറിയിച്ചത് ട്വിറ്ററിലൂടെയാണ്. '' ആദിപുരുഷുമായി ബന്ധപ്പെട്ട് ഞെട്ടിക്കുന്ന പ്രസ്താവനയാണ് സെയ്ഫ് അല ഖാന്റേത്. സിനിമയില് രാവണനായിട്ടാണ് സെയ്ഫ് അഭിനയിക്കുന്നത്. സീതാദേവിയെ തട്ടിക്കൊണ്ടു പോയ രാവണനെ ന്യായീകരിക്കുന്നതാണ് സിനിമ. രാവണന്റെ മാനുഷിക വശവും രാമനെതിരേ നടത്തിയ പോരാട്ടത്തെ ന്യായീകരിക്കുകയും ചെയ്യുന്നു.
ഹിന്ദു അഭിമാനത്തെ ഉയര്ത്തിപ്പിടിക്കുകയും മറാത്തി വാദത്തെ ന്യായീകരിക്കുന്ന ലോകം മുഴുവന് സ്വീകരിക്കപ്പെട്ട തന്ഹാജി സിനിമ ഒരുക്കിയയാളാണ് ഓം റൗത്ത്്. എന്നാല് സീതാദേവിയെ തട്ടിക്കൊണ്ടുപോയ മനുഷ്യത്വരഹിതമായ പ്രവര്ത്തി ചെയ്ത രാവണനെ പോസിറ്റീവായി കാണിക്കാനുള്ള മ്രമാണ് ആദിപുരുഷില് ലക്ഷ്യമിടുന്നത്. അത് ഒരിക്കലും അനുവദിക്കില്ല. അത് സംഭവിക്കാന് അനുവദിക്കില്ല. ഇക്കാര്യം പരിഗണിക്കുമെന്നും കണക്കാക്കുന്നു.'' ബിജെപി നേതാവിന്റെ ട്വീറ്റില് പറയുന്നു.
ബോളിവുഡില് ഹിന്ദു വികാരം വ്രണപ്പെടുത്തുന്നത് ഒരു ട്രെന്റായി മാറുകയാണ്. ഏതോ ഗൂഡ ലക്ഷ്യമിട്ട് നടത്തുന്ന കാര്യങ്ങള് ഹിന്ദുക്കളെ മുറിപ്പെടുത്തുന്നത് ഞങ്ങള് ശ്രദ്ധിക്കുന്നുണ്ട്. എന്തുകൊണ്ടാണ് അവര് മറ്റു മതങ്ങളെ വിമര്ശിക്കാത്തതെന്ന് ചോദിക്കുന്ന കാദം. ഒരു ഹിന്ദു എന്ന നിലയില് ഞങ്ങളുടെ വികാരം ഒരു തരത്തിലും മുറിപ്പെടുത്താന് അനുവദിക്കില്ലെന്നും കാദം പറയുന്നു.
രാവണനെക്കുറിച്ച് സെയ്ഫ് അലിഖാന് അഭിമുഖത്തില് പറഞ്ഞത്
ആദിപുരുഷനില് രാവണനെ അവതരിപ്പിക്കുന്ന സെയ്ഫ് അലി ഖാന് ഒരു പത്രത്തിന് നല്കിയ അഭിമുഖത്തിലാണ് വിവാദ പരാമര്ശം നടത്തിയത്. ''അസുരരവാജാവിനെ അവതരിപ്പിക്കുന്നത് ഏറെ രസകരമായിരുന്നു. സിനിമ രാവണനെ മോശക്കാരനായി ചിത്രീകരിക്കുന്നില്ല. ആ കഥാപാത്രത്തിന്റെ മാനുഷിക വശം കാണിച്ചു തരുകയാണ്. സീതയെ തട്ടിക്കൊണ്ടു പോയതിനെ ന്യായീകരിക്കുകയും തന്റെ സഹോദരി ശൂര്പ്പണഖയുടെ മൂക്കും മാറിടവും ലക്ഷ്മണനെക്കൊണ്ടു മുറിച്ചു മാറ്റിയ രാമനോട്് പ്രതികാരം ചെയ്യാനുണ്ടായ സാഹചര്യവുമാണ് സിനിമ പറയുന്നത്.'' സെയ്ഫ് അലി ഖാന് പറയുന്നു.
ഓം റൗത്ത് സംവിധാനം ചെയ്ത് പുറത്തുവരാനിരിക്കുന്ന സിനിമയില് അസുരരാജാവായ ലങ്കേശ്വരനാകുന്നത് സെയ്ഫ് അലിഖാനാണ്. ബാഹുബലിയിലൂടെ പ്രശസ്തനായ പ്രഭാസാണ് ശ്രീരാമന്റെ വേഷം ചെയ്യുന്നത്. 2022 ആഗസ്റ്റ് 11 ആണ് സിനിമ പുറത്തുവരിക.
