പാലക്കാട്: തെരഞ്ഞെടുപ്പ് ഫലത്തിന് പിന്നാലെ പാലക്കാട് നഗരസഭാ മന്ദിരത്തില് ബിജെപി പ്രവര്ത്തകര് 'ജയ് ശ്രീറാം' എന്ന് രേഖപ്പെടുത്തിയ ശ്രീരാമന്റെ ചിത്രത്തോട് കൂടിയ ഫ്ളക്സ് തൂക്കിയ സംഭവം വിവാദമാകുന്നു. ഭരണഘടനാ സ്ഥാപനങ്ങളില് മതചിഹ്നം തൂക്കാനാകില്ലെന്നിരിക്കേ സംഭവത്തില് കൈമലര്ത്തി ജില്ലാ ഘടകം രംഗത്ത വരികയും ചെയ്തു.
അതേസമയം സംഭവം കോണ്ഗ്രസ് നേതാക്കള് ഉള്പ്പെടെ ഏറ്റെടുത്ത് രംഗത്ത് വന്നിട്ടുണ്ട്. ഫഌക്സ് സ്ഥാപിച്ച നടപടി വര്ഗ്ഗീയ വെല്ലുവിളിയാണെന്നും ജാമ്യമില്ലാ വകുപ്പു പ്രകാരം കേസെടുക്കണമെന്നും പാലക്കാട് ഡിസിസി പ്രസിഡന്റ് വി.കെ. ശ്രീകണ്ഠന് പറഞ്ഞു.
ഇക്കാര്യത്തില് പരാതി നല്കിയിട്ടില്ലെങ്കില് തങ്ങള് പാലക്കാട് എസ്പിയ്ക്ക് പരാതി നല്കുമെന്നും പറഞ്ഞു. ബിജെപിയുടെ നിയമവിരുദ്ധ നടപടിയാണെന്നും നിയമവ്യവസ്ഥ തകര്ന്നതായും കോണ്ഗ്രസ് പറഞ്ഞു.
എന്നാല് ഫ്ളക്സ് തൂക്കിയത് നേതൃത്വത്തിന്റെ അറിവോടെയല്ലാ എന്നാണ് ബിജെപി ജില്ലാ നേതൃത്വത്തിന്റെ പ്രതികരണം. സംഭവം വിവാദമാക്കേണ്ട കാര്യമില്ലെന്നും ശ്രദ്ധയില് പെട്ടപ്പോള് തന്നെ നീക്കം ചെയ്തെന്നും അദ്ദേഹം പറഞ്ഞു.
