ഇന്ന് പുലർച്ചെ അന്തരിച്ച മുൻ മന്ത്രി കെ.കെ. രാമചന്ദ്രൻ ഇന്നലെ ഫോണിൽ കൂടി ആവശ്യപ്പെട്ടത് തനിക്ക് ഉമ്മൻ ചാണ്ടിയെ ഒന്നു കാണണം എന്നായിരുന്നുവെന്ന് ടി.സിദ്ധിഖ്. തന്റെ ഫേസ്ബുക്ക് പേജിലൂടെയാണ് അദ്ദേഹം ഇക്കാര്യം പറഞ്ഞിരിക്കുന്നത്.
ഫേസ്ബുക്ക് പോസ്റ്റിൻറെ പൂർണ്ണരൂപം :
കോൺഗ്രസ് നേതാവും മുൻ മന്ത്രിയുമായിരുന്ന കെകെ രാമചന്ദ്രൻ മാസ്റ്റർ നമ്മെ വിട്ടു പോയത് സഹിക്കാൻ പറ്റാത്ത വേദനയായി. കോവിഡ് പോസ്റ്റിറ്റീവായതിനാൽ കടുത്ത പനിയുമായി കിടക്കുമ്പോൾ അദ്ദേഹത്തെ അവസാനമായി ഒരു നോക്കു കാണാൻ പോലും കഴിയാതെ...
ഇന്നലെ പോലും ഫോണിൽ സംസാരിച്ചിരുന്നു. മുൻ മുഖ്യമന്ത്രി ഉമ്മൻ ചാണ്ടി സർ രാമചന്ദ്രൻ മാസ്റ്ററെ ഒന്ന് കാണണമെന്ന് എന്നോട് പറഞ്ഞിരുന്നു. അതിനു വേണ്ടി കഴിഞ്ഞ തവണ ഉമ്മൻ ചാണ്ടി സർ കോഴിക്കോട് എത്തിയപ്പോൾ ആദ്യത്തെ പരിപാടി അദ്ദേഹത്തെ കാണലായിരുന്നു.
എന്നാൽ അദ്ദേഹം അപ്പോൾ ഗുരുവായൂർ പോയതായി പറഞ്ഞു. ഉമ്മൻ ചാണ്ടിയെ കാണാൻ കഴിയാത്തതിൽ നിരാശ തോന്നിയ അദ്ദേഹം ഉമ്മൻ ചാണ്ടിയെ വീണ്ടും കൂട്ടി വരാൻ ആവശ്യപ്പെട്ടു. ഞാൻ എത്രയും പെട്ടെന്ന് വീണ്ടും വരും എന്ന് ഉറപ്പ് നൽകി. ഇന്നലേയും അതേ കുറിച്ച് എന്നെ ഓർമ്മപ്പെടുത്തി. എന്നാൽ അദ്ദേഹം പെട്ടെന്നങ്ങ് പോയി...
വയനാട്ടിലും കോഴിക്കോടും കോൺഗ്രസിനെ ശക്തിപ്പെടുത്തിയതിലും നിലനിർത്തിയതിലും അദ്ദേഹം വഹിച്ച പങ്ക് ആർക്കും വിസ്മരിക്കാനാവില്ല... എകെ ആന്റണി മന്ത്രിസഭയിലും ഉമ്മൻ ചാണ്ടി മന്ത്രിസഭയിലും അംഗമായിരുന്നു അദ്ദേഹം... ആത്മശാന്തിക്കായി പ്രാർത്ഥിക്കുന്നു... കുറച്ച് ദിവസങ്ങൾക്ക് മുമ്പ് അദ്ദേഹത്തെ കാണാൻ പോയപ്പോൾ എടുത്തതാണു ഈ ചിത്രം...
#kkramachandranmaster #RIP
