കൊച്ചി: വൈറ്റില മേല്പ്പാലം ഉദ്ഘാടനത്തിന് കാലതാമസമുണ്ടായിട്ടില്ലെന്നും പാലാരിവട്ടം ആവര്ത്തിക്കാനുള്ള ശ്രമമാണ് മേല്പ്പാലം തുറന്നുകൊടുത്തതിലൂടെ നടത്തിയെതെന്നും പൊതുമരാമത്ത് മന്ത്രി ജി സുധാകരന് മാധ്യമങ്ങളോട് പറഞ്ഞു.
ഒരു പാലം നിര്മ്മിച്ചു കഴിഞ്ഞാല് അത് പൂര്ത്തിയായെന്ന് ചീഫ് എന്ജിനിയര് സര്ക്കാരിന് സര്ട്ടിഫിക്കറ്റ് നല്കണം. അപ്പോഴും നടപടിക്രമം പൂര്ത്തിയായിട്ടില്ല. ചീഫ് എന്ജിനിയര്മാരുടെ ടീം പരിശോധിച്ച് ഫിറ്റ് ഫോര് കമ്മീഷന് എന്ന സര്ട്ടിഫിക്കറ്റ് നല്കണം. അത് വൈറ്റില മേല്പ്പാലത്തിന് ലഭിച്ചത് അഞ്ചാം തീയതിയാണ്. മുഖ്യമന്ത്രിയെ കണ്ട് പാലം ഉദ്ഘാടനത്തിന് ഒമ്പതിന് ഡേറ്റ് തന്നു. ഒരു നിമിഷം പോലും നഷ്ടപ്പെടുത്തിയിട്ടില്ലെന്ന് മന്ത്രി പറഞ്ഞു.
പണി പൂര്ത്തിയാകുന്നതിന് മുന്പ് പാലം തുറന്നു കൊടുത്താല് പാലാരിവട്ടം ആവര്ത്തിക്കും. അത് ആവര്ത്തിക്കണമെന്നാണ് പാലം അനധികൃതമായി തുറന്നു കൊടുത്തവവര് ആഗ്രഹിക്കുന്നത്. എത്രയും വേഗം പാലം തുറന്നു കൊടുക്കണമെന്നു പറഞ്ഞ് ധൃതിപിടിച്ചാല് എവിടെയെങ്കിലും കുഴപ്പമുണ്ടായാല് അപ്പോള് പറയും പാലാരിവട്ടം ആവര്ത്തിച്ചുവെന്ന്. ഇതു പോലെ ധൃതിപിടിപ്പിച്ചാതാണ് ഇബ്രാഹിം കുഞ്ഞിനെയും. 2016 ലെ തിരഞ്ഞെടുപ്പിന് മുന്പ് ഉദ്ഘാടനം ചെയ്യിക്കാന് വേണ്ടി സിമന്റും കമ്പിയും ഒന്നും ചേര്ക്കാതെ പണിതതാണ് പാലാരിവട്ടത്തിന്റെ കാര്യത്തില് സംഭവിച്ചതെന്നും സുധാകരന് പറഞ്ഞു.
