തിരുവനന്തപുരം: തര്ക്കവും പ്രതിഷേധവും ശക്തമായ സാഹചര്യത്തില് മുന്നണി വിപുലീകരണം ചര്ച്ചചെയ്യാതെ യു.ഡി.എഫ്. യോഗം. ഇന്നലെ ചേരുന്ന യു.ഡി.എഫ്. യോഗത്തില് തങ്ങളുടെ കാര്യത്തില് തീരുമാനമുണ്ടാകുമെന്നു പി.സി. ജോര്ജ് പ്രഖ്യാപിച്ചിരുന്നു. എന്നാല്, ശക്തമായ എതിര്പ്പിനെത്തുടര്ന്ന് അക്കാര്യം യു.ഡി.എഫ്. യോഗം പരിഗണിച്ചില്ല. എന്.സി.പി. ഇടതുമുന്നണി വിടാത്ത സാഹചര്യത്തില് അതിനെക്കുറിച്ചും ചര്ച്ചയുണ്ടായില്ല.
മുന്നണി വിപുലീകരണം പരിഗണനയിലില്ലെന്നു നേരത്തെ കെ.പി.സി.സി. പ്രസിഡന്റ് പരസ്യമായി വ്യക്തമാക്കിയിരുന്നു.
മുന്നണി പ്രവേശനത്തില് ആരുടെയും അപേക്ഷ ഔദ്യോഗികമായി ലഭിച്ചിട്ടില്ലെന്നും അതുകൊണ്ടു മുന്നണി വിപുലീകരണം യു.ഡി.എഫ്. ചര്ച്ചചെയ്തില്ലെന്നും പിന്നീടു പത്രസമ്മേളനത്തില് പ്രതിപക്ഷ നേതാവ് രമേശ് ചെന്നിത്തല പറഞ്ഞു.
"യു.ഡി.എഫിന്റെ ഭാഗമാകണമെന്ന താല്പര്യം പി.സി. ജോര്ജ് പുറത്തു പ്രകടിപ്പിച്ചതല്ലാതെ ഔദ്യോഗികമായി ഈ ആവശ്യം ഉന്നയിച്ചിട്ടില്ല. എന്.സി.പി. ഇപ്പോള് ഇടതുമുന്നണിയുടെ ഭാഗമാണ്. അവര് മുന്നണിവിടും വരെ അവരുടെ കാര്യത്തില് അഭിപ്രായം പറയുന്നതു ശരിയല്ല.
ഘടകകക്ഷികളുമായുള്ള സീറ്റ് വിഭജന ചര്ച്ച എത്രയുംവേഗം ആരംഭിക്കും. ഇത്തവണ ഇത്ര സീറ്റ് ലഭിക്കണമെന്ന് ഒരു ഘടകകക്ഷിയും പരസ്യമായി ആവശ്യമുന്നയിക്കില്ല. സ്ഥാനാര്ഥി നിര്ണയത്തിന്റെ പൊതുമാനദണ്ഡം ജയസാധ്യതയായിരിക്കും. ആരൊക്കെ സ്ഥാനാര്ഥിയാകണമെന്ന് അതതു കക്ഷികളാണ് തീരുമാനിക്കുക. സംസ്ഥാന കോണ്ഗ്രസ് നേതൃത്വത്തില് മാറ്റംവേണമെന്നു ലീഗ് ആവശ്യപ്പെട്ടിട്ടില്ല.
പ്രതിപക്ഷനേതാവെന്ന നിലയിലെ ഉത്തരവാദത്വം നിര്വഹിക്കുന്നതിനാണ് തന്റെ നേതൃത്വത്തില് യു.ഡി.എഫ്. ജാഥ നടത്തുന്നത്. യു.ഡി.എഫ്. ഒരിക്കലും മുഖ്യമന്ത്രി സ്ഥാനാര്ഥിയെ ഉയര്ത്തിക്കാട്ടാറില്ല. കോണ്ഗ്രസിന്റെ മുഖ്യമന്ത്രിയെ ഹൈക്കമാന്ഡ് തീരുമാനിക്കും"- ചെന്നിത്തല പറഞ്ഞു.
കേരളം യു.ഡി.എഫ്. ഭരിക്കണോ ഇടതുമുന്നണി ഭരിക്കണോ എന്ന കാര്യത്തിലായിരിക്കും അടുത്ത നിയമസഭാ തെരെഞ്ഞടുപ്പില് തീരുമാനമുണ്ടാകുകയെന്നു പി.കെ. കുഞ്ഞാലിക്കുട്ടി വ്യക്തമാക്കി. മൂന്നാമതൊരു മുന്നണിക്ക് അതില് ഇടമില്ല. എന്തുകൊണ്ടു യു.ഡി.എഫിനെ ജയിപ്പിക്കണമെന്ന ചോദ്യത്തിനു വ്യക്തമായ ഉത്തരവുമായി മുന്നണി രംഗത്തുവരുമെന്നും അദ്ദേഹം പറഞ്ഞു.
