ആരാധകര് കാത്തിരിയ്ക്കുന്ന ചിത്രമാണ് പ്രിയദര്ശന് സംവിധാനം ചെയ്ത മോഹലാല് ചിത്രം മരയ്ക്കാര് അറബിക്കടലിന്റെ സിംഹം. ഇപ്പോള് ആരാധകര്ക്ക് പ്രതീക്ഷ പകരുന്ന ഒരു വാര്ത്തയാണ് പുറത്ത് വരുന്നത്. ദേശീയ അവാര്ഡിനായുള്ള പരിഗണനയ്ക്ക് മരയ്ക്കാര് അറബിക്കടലിന്റെ സിംഹത്തിന് മേഖലാ ജൂറിയൂടെ ഏഴ് നോമിനേഷനുകള് ലഭിച്ചെന്നാണ് റിപ്പോര്ട്ട്. മികച്ച ചിത്രം, സംവിധാനം, അഭിനയം, വസ്ത്രാലങ്കാരം തുടങ്ങിയവയ്ക്കാണ് നോമിനേഷന് ലഭിച്ചത്.
റഹ്മാന് സഹോദരന്മാര് ഒരുക്കിയ വാസന്തി, ലിജോ ജോസ് പെല്ലിശ്ശേരിയുടെ ജെല്ലിക്കട്ട്, മധു സി. നാരായണന് സംവിധാനം ചെയ്ത കുമ്പളങ്ങി നൈറ്റ്സ് തുടങ്ങി 17 മലയാള ചിത്രങ്ങള്ക്കാണ് വിവിധ അവാര്ഡുകള്ക്കുള്ള എന്ട്രി ലഭിച്ചത്. മികച്ച നടനുള്ള പുരസ്കാരത്തിന് ഏറ്റവും കൂടുതല് അംഗങ്ങള് ശുപാര്ശ ചെയ്തത് തമിഴ്നടന് പാര്ത്ഥിപന്റെ പേരാണ്. പാര്ത്ഥിപന് രചനയും സംവിധാനവും നിര്വഹിച്ച 'ഒത്ത സെരുപ്പി'ന് (ഒറ്റച്ചെരുപ്പ്) അഞ്ച് നോമിനേഷന് ലഭിച്ചു. ഐ.എഫ്.എഫ്.ഐയില് ഇന്ത്യന് പനോരമ വിഭാഗത്തില് ചിത്രം പ്രദര്ശിപ്പിച്ചിരുന്നു. വെട്രിമാരന് സംവിധാനം ചെയ്ത ധനുഷ് ചിത്രം അസുരന്, മധുമിത ഒരുക്കിയ കറുപ്പുദൂരൈ എന്നിവയുള്പ്പെടെ 12 തമിഴ് ചിത്രങ്ങള്ക്കും നോമിനേഷന് ലഭിച്ചു.
മലയാളത്തില് നിന്നുള്ള 65 എണ്ണമുള്പ്പെടെ 109 ചിത്രങ്ങളാണ് മേഖലാ ജൂറിക്കു മുന്നിലെത്തിയത്. ആകെ അഞ്ച് മേഖലാ ജൂറികളാണ് ദേശീയ അവാര്ഡിന് പ്രാഥമിക തിരഞ്ഞെടുപ്പ് നടത്തുന്നത്. അതില് നിന്നാണ് പ്രധാന ജൂറി അവാര്ഡ് തീരുമാനിക്കുന്നത്. മേഖല ജൂറി നിരസിച്ച ചിത്രങ്ങളെ തിരിച്ചു വിളിക്കാനുള്ള അധികാരവും പ്രധാന ജൂറിക്കുണ്ട്.
